वैष्णवीच्या अंगावर तब्बल 29 मारहाणीचे व्रण
पिंपरी : वैष्णवी हगवणे आत्महत्या प्रकरणाची केवळ पुण्यातच नाहीतर संपूर्ण राज्यभरात चर्चा सुरु आहे. या आत्महत्येनंतर राजकीय स्तरावरही तीव्र पडसाद उमटत आहेत. त्यातच सासू लता हगवणे, ननंद करिष्मा हगवणे आणि पती शशांक हगवणे यांना पोलिसांनी न्यायालयात हजर केलं. यावेळी न्यायालयाकडून त्यांना 28 मेपर्यंत पोलिस कोठडी सुनावण्यात आली आहे. यापूर्वी दिलेली पोलीस कोठडी संपल्यानंतर सोमवारी त्यांना पुन्हा न्यायालयात हजर करण्यात आले होते. त्यानंतर ही शिक्षा सुनावली.
वैष्णवी यांच्या पोस्टमॉर्टम रिपोर्टनुसार, वैष्णवीच्या अंगावर तब्बल 29 मारहाणीचे व्रण आढळले असून, त्यातील ५ ते ६ जखमा आत्महत्येच्या अगदी काही तासांपूर्वी झाल्याचे स्पष्ट झाले आहे. हे अत्यंत गंभीर असून, तिच्यावर सतत शारीरिक आणि मानसिक छळ होत असल्याची शक्यता पोलिसांनी व्यक्त केली आहे. पोलिसांनी कडक कारवाई करत हगवणे कुटुंबियांची सर्व बँक खाती गोठवण्यात आली आहेत. वैष्णवीच्या नावावरचं सोनं तारण ठेवून त्यातून मिळालेल्या रकमेचा वापर कुठे झाला, हे अद्याप स्पष्ट नाही.
दरम्यान, या प्रकरणातील फरार आरोपी निलेश चव्हाण आणि हगवणे कुटुंबीयांमधील संबंधांचा तपास करणे गरजेचे आहे. तिन्ही आरोपींची एकत्रित चौकशी करणे आवश्यक असल्यामुळे पोलिसांनी वाढीव कोठडीची मागणी केली होती.
सासरच्या छळाला कंटाळून उचललं टोकाचं पाऊल?
पोलिसांच्या तपासात, वैष्णवीला तिच्या सासरच्या मंडळींकडून सतत मानसिक त्रास दिला जात होता. तिला वेळोवेळी मारहाण करण्यात येत होती. कौटुंबिक कलह, हुंड्याची मागणी आणि आर्थिक कारणांमुळे हा छळ दिवसेंदिवस वाढत गेला. अखेर सहनशक्तीचा अंत होऊन वैष्णवीने आत्महत्या केल्याचा निष्कर्ष पोलिसांनी मांडला आहे.
मुळशीत वैष्णवीचे आत्महत्याप्रकरण
मुळशी तालुक्यातील आपल्या सासरच्या घरी वैष्णवी हगवणे हिनं गळफास घेऊन आत्महत्या केल्याने राज्यभरात खळबळ उडाली आहे. या प्रकरणात वैष्णवीच्या वडिलांनी, अनिल कस्पटे यांनी मुळशी पोलीस ठाण्यात तक्रार दाखल करत सासरच्या पाच सदस्यांवर – शशांक (पती), लता (सासू), करिश्मा (नणंद), राजेंद्र (सासरे) आणि सुशील (दीर) – मानसिक आणि शारीरिक छळ केल्याचे गंभीर आरोप केले आहेत.
.png "Videos"){kind=small}
