गुंतवणुकीतून ज्यादा परताव्याचे आमिष दाखवून व्यावसायिकाला गंडा; तब्बल 6 कोटींची फसवणूक

एप्रिल २०२२ ते मार्च २०२३ या काळात सलमान पठाण यांनी काही रकमेची गुंतवणूक केली. एप्रिल २०२४ ते ऑक्टोबर २०२४ या काळात सलमान पठाण यांनी शेख रियाज याच्या सांगण्यावरून दोन कोटीची गुंतवणूक केली.

धाराशिव : इलेक्ट्रॉनिक्स बाजारात पैसे गुंतवणुकीवर नऊ ते बारा टक्के परतावा देण्याचे आमिष दाखवून एका व्यावसायिकाला जावई व सासऱ्याच्या जोडीने तब्बल सहा कोटी नऊ लाख ५७ हजार १०३ रूपयांचा गंडा घातला. गंडा घालणाऱ्या जावयाचे नाव शेख रियाज व त्याचे सासरे सय्यद अनिस रझवी (रा. बड़े नवाब बाडा, चेलूपर, ह.मु. युनाईटेट अरब इमिरेटस, दुबई) असे आहे.

या प्रकरणात सलमान लियाकत खां पठाण (वय ३५, रा. वाळुज) यांनी दिलेल्या तक्रारीनुसार, सलमान पठाण हे एसएसपी असोसिऐट्स नावाची फर्म चालवतात. त्यांची ओळख गुंतवणूकीच्या संबंधातून शेख रियाज शेख गुलाब रब्बानी (रा. नॅशनल कॉलनी, मौलाना आइसाद कॉलेजसमोर) याच्याशी वर्ष २०१५ मध्ये झाली. शेख रियाज याने इलेक्ट्रॉनिक्स वस्तू खरेदी विक्रीचा व्यवसाय करतो असे सांगितले. शेख रियाजने सुरवातीच्या काही रकमेवर चांगला परतावा देऊन सलमान पठाण यांचा विश्वास संपादन केला.

दरम्यान, कोरोना संकटामुळे शेख रियाज यांना फटका बसला. यानंतर त्याने मार्च २०२२ मध्ये त्याच्या सासऱ्यासोबत दुबई व्यवसाय करण्याचे सांगितले. यासाठी सुप्रिम इलेक्ट्रॉनिक्समध्ये गुंतवणूक करण्याचे सांगितले.

आरोपींमध्ये जावयासह सासऱ्याचा समावेश

एप्रिल २०२२ ते मार्च २०२३ या काळात सलमान पठाण यांनी काही रकमेची गुंतवणूक केली. एप्रिल २०२४ ते ऑक्टोबर २०२४ या काळात सलमान पठाण यांनी शेख रियाज याच्या सांगण्यावरून दोन कोटीची गुंतवणूक केली. तसेच जुलै २०२४ ते जुलै २०२४ या काळात विविध खात्यातून तसेच रोखीने सलमान पठाण यांनी २ कोटी १५ लाख ५० हजार रूपये दिले, या गुंतवणूकीतील एक कोटी १३ लाख १६ हजार ५०० रूपये शेख रियाज याने दिले.

नंतर पैसे देणे झाले बंद

यानंतर शेख रियाज याने पैसे देणे बंद केले. एकूण व्यवहारामध्ये त्यांची ६ कोटी नऊ लाख ५७ हजार १०३ रूपयांची फसवणूक झाली. याप्रकरणी गंडा घालणाऱ्या शेख रियाज आणि त्याचा सासरा सय्यद अनिस रझवी या दोघांच्या विरोधात सिटीचौक पोलिस ठाण्यात गुन्हा दाखल करण्यात आला.

व्यवसायात मंदी झाल्याने करावा लागला बंद

कोरोना काळामुळे शेख रियाज याचा इलेक्ट्रॉनिक्सचा धंदा मंदी आल्याने त्याने बंद केला. सलमान पठाण यांना जाळ्यात अडविण्यासाठी शेख रियाज याने त्याचे सासरे सय्यद अनिस रझवी यांची दुबईत पेपरची आणि सॉफ्टवेअर कंपनी तर दुबईत इलेक्ट्रॉनिक्स कंपनी असल्याचे सांगितले. सासऱ्यांना चीन, रशिया, सौदी अरेबियात आयफोन पाठविण्याचे ऑर्डर मिळाल्याची थाप त्याने मारली.