Crime News: छत्रपती संभाजीनगर हादरलं ! महिन्याभराच्या बाळाचा पैशांत सौदा; आईच्या तक्रारीनंतर धक्कादायक प्रकार उघड
छत्रपती संभाजीनगर : मुकुंदवाडी परिसरात अवघ्या महिन्याभराच्या बाळाच्या कथित बेकायदेशीर खरेदी-विक्रीचा प्रकार उघडकीस आला आहे. बाळाच्या जन्मदात्या आई-वडिलांना पैसे देऊन त्यांच्याकडून बाळ घेतल्याचा आरोप दोन महिलांवर करण्यात आला आहे. आईने बाळ परत मागितल्यानंतरही ते न मिळाल्याने तिने पोलिसांकडे धाव घेतली आणि तपासातून कथित व्यवहाराची माहिती समोर आली.
पोलिसांच्या माहितीनुसार, संबंधित ३६ वर्षीय महिला काही वर्षांपासून मुंबईत राहत होती. पहिल्या पतीपासून विभक्त झाल्यानंतर ती एका पुरुषासोबत लिव्ह-इन रिलेशनशिपमध्ये राहत होती. ५ जुलै रोजी तिने घाटी रुग्णालयात मुलाला जन्म दिला. याच काळात तिची संजयनगर परिसरातील ६५ वर्षीय कौशल्या बारकू पवार यांच्याशी ओळख झाली. कौशल्या स्वयंपाकाचे काम करत असल्याची माहिती आहे.
तक्रारीनुसार, कौशल्या यांनी बाळाच्या आईच्या कौटुंबिक परिस्थितीचा उल्लेख करत तिची समजूत काढण्याचा प्रयत्न केला. बाळाचा सांभाळ कसा होईल, याबाबत चिंता व्यक्त करत त्यांनी आपली मुलगी सीमा बाळाला सांभाळण्यास तयार असल्याचे सांगितल्याचा आरोप आहे. सुरुवातीला आईने बाळ देण्यास नकार दिला. मात्र, त्यानंतर तिची आणि बाळाच्या वडिलांची समजूत काढण्यात आली.
पोलिसांच्या तपासानुसार, ८ ऑगस्ट रोजी सीमा अनिल रेशवाल हिने ₹१ लाख २० हजार रुपये रोख दिल्याचा आरोप आहे. तसेच बॉण्ड पेपरवर बाळ देण्याबाबतचा व्यवहार लिहून घेतल्याचे तपासात समोर आल्याचे पोलिसांनी सांगितले. अशा प्रकारे बाळाचा ताबा जन्मदात्या आई-वडिलांकडून दुसऱ्या व्यक्तीकडे गेला. मात्र, काही दिवसांनी आईला आपल्या मुलाची आठवण येऊ लागली आणि तिने बाळ परत मागण्यास सुरुवात केली.
आईने बाळ परत देण्याची विनंती केल्यानंतर सीमा रेशवाल हिने बाळ सध्या तिच्याकडे नसल्याचे सांगितल्याचा आरोप आहे. बाळ नातेवाईकांकडे असल्याचे सांगून वेळ मारून नेल्याचेही तक्रारीत नमूद आहे. वारंवार विनंती करूनही बाळ परत मिळत नसल्याने अखेर आईने मुकुंदवाडी पोलीस ठाणे गाठले. त्यानंतर पोलिसांनी प्रकरणाचा तपास सुरू केला.
पोलीस निरीक्षक विवेक सोनवणे यांच्या मार्गदर्शनाखाली सहायक पोलिस निरीक्षक हरेश्वर घुगे, सहायक फौजदार अशोक कचरे आणि अंमलदार राजाभाऊ कोल्हे यांनी तपास केला. तपासादरम्यान बाळाच्या कथित खरेदी-विक्रीचा प्रकार समोर आल्याचे पोलिसांनी सांगितले. तसेच सीमा रेशवाल हिच्याविरुद्ध यापूर्वीही फसवणुकीचा गुन्हा दाखल असल्याची माहिती तपासात समोर आली आहे.
या प्रकरणी २४ सप्टेंबर रोजी सरकारतर्फे फिर्याद दाखल करून गुन्हा नोंदवण्यात आला. त्यानंतर सीमा अनिल रेशवाल आणि तिची आई कौशल्या बारकू पवार यांना पोलिसांनी अटक केली. दोघींना न्यायालयात हजर केल्यानंतर कौशल्या पवार आणि सीमा रेशवाल यांना २९ सप्टेंबरपर्यंत पोलिस कोठडी सुनावण्यात आल्याची माहिती आहे. दरम्यान, बाळाची सध्या कोणत्या परिस्थितीत देखभाल केली जात आहे, कथित व्यवहारात आणखी कोणाचा सहभाग आहे आणि पैशांचा व्यवहार नेमका कसा झाला, याचा तपास पोलिसांकडून सुरू आहे. या प्रकरणातील पुढील तपासातून आणखी माहिती समोर येण्याची शक्यता आहे.
.png "Videos"){kind=small}
