छत्रपती संभाजीनगर हादरले! ‘याला जिवंत सोडू नका’ मध्यरात्री पोलिसाला घेरले, तरुणीचा पोलीस अंमलदारावर चाकूने हल्ला अन्...
छत्रपती संभाजीनगर : रात्रीच्या वेळी विनाकारण थांबून गोंधळ घालणाऱ्या तरुण-तरुणींना तेथून जाण्यास सांगितल्याचा राग मनात धरून टोळक्याने पोलीस अंमलदारावर हल्ला केल्याची घटना छत्रपती संभाजीनगरमधील करोडी परिसरात घडली. आंबेडकर चौकात मध्यरात्री घडलेल्या या प्रकारात एका तरुणीने चाकूने वार केल्याचा आरोप आहे. फकिरा नब्बास तडवी (वय ३७) असे जखमी पोलीस अंमलदाराचे नाव आहे. या घटनेमुळे शहरात खळबळ उडाली आहे. या प्रकरणी दौलताबाद पोलिसांनी तीन तरुणींसह आठ जणांविरुद्ध गुन्हा दाखल केला आहे. सागर संजय इंगळे याला घटनास्थळावरून अटक करण्यात आली आहे. शाहरुख ऊर्फ जावेद, रोहिणी सुभाष बेळगे, अश्विनी सुभाष बेळगे, सागर संजय इंगळे, अभी गायकवाड आणि रोहित चव्हाण (सर्व रा. कमळापूर, रांजणगाव) अशी गुन्हा दाखल झालेल्यांची नावे आहेत. अन्य दोघांची ओळख अद्याप समोर आलेली नाही.
फकिरा तडवी हे दौलताबाद पोलीस ठाण्यात कार्यरत आहेत. ७ ऑक्टोबरच्या रात्री ते पोलीस अंमलदार गाडे आणि होमगार्ड नईम यांच्यासोबत डायल ११२ च्या वाहनातून गस्त घालत होते. मध्यरात्री साडेबारा वाजण्याच्या सुमारास भांगसीमाता गडाकडे जाणाऱ्या रस्त्यावरील मोकळ्या पटांगणात तीन महिला आणि पाच पुरुष बसलेले त्यांना आढळले. पोलिसांनी त्यांना रात्रीच्या वेळी तेथे थांबण्याचे कारण विचारले. तसेच सुरक्षेच्या दृष्टीने तेथून निघून जाण्यास सांगितले. त्यानंतर गस्ती पथक पुढे गेले.
रात्री सुमारे १ वाजून १० मिनिटांनी करोडी गावातील आंबेडकर चौकात चोर असल्याची माहिती एका प्रवाशाने गस्ती पथकाला दिली. त्यानुसार तडवी आणि त्यांचे सहकारी घटनास्थळी पोहोचले. तेव्हा यापूर्वी पटांगणात आढळलेले तेच आठ जण तेथे गोंधळ घालत असल्याचे दिसले. पोलिसांनी पुन्हा त्यांना थांबवून नावे विचारली आणि तेथून निघून जाण्यास सांगितले. यावरून संबंधितांनी पोलिसांना शिवीगाळ सुरू केली आणि त्यांच्यावर हल्ला चढवल्याचा आरोप आहे.
हल्ल्यादरम्यान, ‘याला जिवंत सोडू नका’, अशी चिथावणी देत काही जणांनी पोलीस अंमलदाराला पकडून ठेवल्याचे सांगण्यात येते. त्याचवेळी एका तरुणीने चाकूने हल्ला केल्याचा आरोप आहे. या हल्ल्यात फकिरा तडवी जखमी झाले. थेट पोलीस अंमलदारावरच हल्ला झाल्याने परिसरात खळबळ उडाली आहे. या प्रकरणी दौलताबाद पोलिसांनी गुन्हा दाखल केला असून, पुढील तपास सुरू आहे.
.png "Videos"){kind=small}
