पाटसच्या यात्रेवर गुन्हेगारीचे सावट, नागरिकांमध्ये चिंतेचे वातावरण; पोलिसांनी वेळीच लक्ष घालण्याची मागणी

पोलीस प्रशासनाने स्पष्ट इशारा दिला आहे की, सोशल मीडियावर धार्मिक तेढ निर्माण करणारी पोस्ट किंवा मेसेज टाकणाऱ्यांवर कठोर कारवाई करण्यात येईल. तरीही, मागील काही महिन्यांपासून पाटस परिसरात दोन-तीन गटांमध्ये धुसफूस सुरू असून, काही तरुण गुन्हेगारी प्रवृत्तींकडे वळताना दिसत आहेत. काही दिवसांपूर्वी चौफुला येथील तमाशा कार्यक्रमात झालेल्या कोयत्याच्या हल्ल्याने याच गोष्टीची जाणीव करून दिली आहे.

यात्रेतील सुरक्षेचे नियोजन करण्याची मागणी

स्थानिक नागरिकांच्या मते, यात्रेतील गर्दीचा फायदा घेऊन जुन्या वादाचा वचपा काढण्याचा प्रयत्न होऊ शकतो, अशी चर्चा सध्या गावात सुरू आहे. यात्रेदरम्यान मंदिर परिसरात आणि पाळणा स्थळी टवाळखोरांकडून त्रास देणे, महिला व मुलींशी गैरवर्तन करणे, तसेच व्यापाऱ्यांना धमकावण्याच्या घटनाही मागील वर्षी घडल्या होत्या. त्यामुळे यंदा या प्रकारांना आळा बसावा अशी अपेक्षा ग्रामस्थांनी व्यक्त केली आहे. स्थानिक पुढारी आणि यात्रा कमिटीने केवळ बघ्याची भूमिका न घेता पोलिस प्रशासनाला सक्रीय सहकार्य करणे आवश्यक आहे. जो कोणी कायदा तोडेल त्याला राजकीय किंवा सामाजिक पाठबळ न देता कठोर कारवाई व्हावी, अशी नागरिकांची मागणी आहे. तसेच, दौंड तालुका दंडाधिकारी तथा तहसीलदार यांच्या अध्यक्षतेखाली पोलीस प्रशासन, ग्रामपंचायत आणि नागरिकांची संयुक्त बैठक तातडीने घेऊन यात्रेतील सुरक्षेचे नियोजन करण्यात यावे, अशी मागणी पाटस येथील नागरिकांनी केली आहे.

संबंधित बातम्या