Gopal Khemka Murder : व्यावसायिक गोपाल खेमका यांची गोळ्या झाडून हत्या; हत्येचं CCTV फुटेज आलं समोर

बिहारची राजधानी पटना येथे एक धक्कादायक घटना घडली असून, भाजपाशी संलग्न आणि व्यावसायिक असलेल्या गोपाल खेमका यांची गोळ्या झाडून हत्या करण्यात आली आहे. या हत्येचा थरार सीसीटीव्ही कॅमेऱ्यात कैद झाला आहे.

बिहारची राजधानी पटना येथे एक धक्कादायक घटना घडली असून, भाजपाशी संलग्न आणि व्यावसायिक असलेल्या गोपाल खेमका यांची गोळ्या झाडून हत्या करण्यात आली आहे. ही घटना गांधी मैदान पोलीस ठाण्याच्या हद्दीत, पनाशे हॉटेलजवळील द्विन टॉवर सोसायटी परिसरात ४ जुलैच्या रात्री घडली. या हत्येचा थरार सीसीटीव्ही कॅमेऱ्यात कैद झाला आहे.

Crime News : जुन्या वादातून दोघांवर कोयत्याने हल्ला; सपासप वार केले अन्…

सीसीटीव्हीमध्ये काय दिसले?

सीसीटीव्ही फुटेजमध्ये दिसते की, काळा हेल्मेट आणि निळा शर्ट घातलेला एक दुचाकीस्वार खेमका यांच्या निवासस्थानाबाहेर वाट पाहत थांबलेला होता. गोपाल खेमका यांची कार त्यांच्या घराच्या गेटसमोर थांबलेली होती, कारण गेट बंद होता. हीच वेळ साधून, त्या व्यक्तीने थेट कारच्या ड्रायव्हर सीटवर बसलेल्या खेमका यांच्यावर गोळ्या झाडल्या. हल्ल्यानंतर तो घटनास्थळावरून पळून गेला. सीसीटीव्हीमध्ये घरातील सुरक्षा रक्षक गेटकडे चालताना दिसतो. गेट उघडताच, खेमका हे मृतावस्थेत कारमध्ये पडल्याचे दिसून आले. .

 

See more

VIDEO | Patna, Bihar: Prominent businessman Gopal Khemka was shot dead near his residence in Patna by a bike-borne assailant late Friday. CCTV visuals of the incident.#PatnaNews #BiharNews

(Viewers discretion is advised)

(Source: Third Party) pic.twitter.com/4prOkBy3zH

— Press Trust of India (@PTI_News) July 5, 2025

मागच्या गाडीत महिला आणि पुरूषाची गडबडीत बाहेर

खेमका यांच्या गाडीच्या मागे उभी असलेल्या दुसऱ्या कारमधून एक महिला आणि एक पुरुष घाईघाईने बाहेर पडताना सीसीटीव्हीमध्ये दिसून आले आहेत. या घटनेत खेमका यांचा जागेवरच मृत्यू झाला होता असे पोलिसांनी सांगितले.

घटनास्थळी पोलिसांचा तपास सुरू

घटनास्थळी एक गोळी आणि एक रोल जप्त करण्यात आला आहे. एसपी दीक्षा यांनी सांगितले की, “४ जुलैच्या रात्री ११ वाजता माहिती मिळताच आम्ही घटनास्थळी पोहोचलो. परिसर सील केला असून सीसीटीव्ही फुटेज तपासले जात आहेत. पुढील कारवाई सुरू आहे.” पोलिसांनी तपासासाठी एसआयटी (विशेष तपास पथक) नेमले आहे. मारेकऱ्यांचा शोध घेण्याचे काम युद्धपातळीवर सुरू आहे.

पूर्वीही खेमका कुटुंबावर झाला होता जीवघेणा हल्ला

या घटनेत धक्कादायक बाब म्हणजे, डिसेंबर २०१८ मध्ये गोपाल खेमका यांचे सुपुत्र गुंजन खेमका यांचीही अशाच प्रकारे हत्या करण्यात आली होती. गुंजन यांची हाजीपूर औद्योगिक परिसरात त्यांच्या कारखान्याबाहेर गोळ्या झाडून हत्या झाली होती. सहा वर्षांनंतर पुन्हा अशीच हत्या वडिलांची झाली असून, त्यामुळे बिहारमध्ये खळबळ उडाली आहे. दरम्यान या घटनेनंतर भाजपाने मारेकऱ्याला कठोर शिक्षा देण्याची मागणी केली, तर विरोधी पक्षांनी कायदा आणि सुव्यवस्थेवर प्रश्न उपस्थित केले.

कमी दारु दिल्याचा राग; कामगाराने डोक्यात सिमेंटचा ब्लॉक मारुन केला खून