कोलवडीत व्यावसायिकावर लोखंडी रॉड, दांडक्याने हल्ला; सोन्याची चैन, घड्याळ अन् रोकड हिसकावली

फॉर्च्युनर घेऊन वाघोलीकडे जाण्यासाठी निघालेल्या व्यावसायिकाला अचानक तिघांनी घेरले. हातात लोखंडी रॉड आणि दांडके घेऊन पाठलाग करत मारहाण केली अन् त्यानंतर सोन्याची चैन, घड्याळ आणि रोकड हिसकावल्याचा आरोप आहे. कोलवडीतील या घटनेने परिसरात खळबळ उडाली आहे.

• व्यावसायिकावर दांडके व लोखंडी रॉडने हल्ला
• सोन्याची चैन, घड्याळ व रोकड हिसकावल्याचा आरोप
• फॉर्च्युनरचे नुकसान; तिघांविरुद्ध गुन्हा दाखल

 

पुणे : लोणीकंद पोलीस ठाण्याच्या हद्दीतील कोलवडी येथील माळवाडी परिसरात एका व्यावसायिकावर लाकडी दांडके आणि लोखंडी रॉडने हल्ला करून जखमी केल्याची घटना बुधवारी (दि. ३०) दुपारी घडली. यावेळी व्यावसायिकाच्या हातातील घड्याळ, गळ्यातील सोन्याची चैन आणि खिशातील रोख रक्कम हिसकावून घेतल्याचा आरोप आहे. तसेच त्यांच्या फॉर्च्युनर वाहनाचे नुकसान करण्यात आले. या प्रकरणी सचिन ज्ञानेश्वर लोणकर (वय ३६, रा. लोणकरवस्ती, कोलवडी) यांनी लोणीकंद पोलिसांत फिर्याद दिली आहे. त्यावरून गजानन गुलबा गायकवाड (वय ३५, रा. माळवाडी, कोलवडी), आकाश कैलास आडसुळ (वय ३०, रा. कोलवडी) यांच्यासह तिघांविरुद्ध भारतीय न्याय संहितेतील कलम ११८(१), ३०४(२), ३५२, ३५१(३) आणि ३२४(४) अन्वये गुन्हा दाखल करण्यात आला आहे.

हेही वाचा: हत्येपूर्वी दोन हॉटेलमध्ये मुक्काम; सियाच्या गुगल सर्च हिस्ट्रीमध्ये लोहगड, ट्रेकिंग अपघातांसह विविध कीवर्ड

कार्यालयाबाहेरच तिघांनी घेरले

पोलिसांनी दिलेल्या माहितीनुसार, ३० सप्टेंबर रोजी दुपारी साडेबारा वाजण्याच्या सुमारास केसनंद-कोलवडी रोडवरील माळवाडी येथील चिंतामणी एंटरप्रायजेसच्या कार्यालयाबाहेर फिर्यादी वाघोलीकडे जाण्यासाठी त्यांच्या फॉर्च्युनर वाहनाजवळ आले होते. त्यावेळी आरोपी हातात लाकडी दांडके आणि लोखंडी रॉड घेऊन त्यांच्या अंगावर धावून आले. आरोपींनी फिर्यादीचा पाठलाग करून दांडके आणि लोखंडी रॉडने मारहाण केल्याचे फिर्यादीत म्हटले आहे. तसेच शिवीगाळ करून जीवे मारण्याची धमकी दिल्याचा आरोपही करण्यात आला आहे.

दागिने, घड्याळ आणि रोकड हिसकावल्याचा आरोप

मारहाणीनंतर आरोपींनी फिर्यादीच्या हातातील घड्याळ, गळ्यातील सोन्याची चैन आणि खिशातील रोख रक्कम हिसकावून घेतल्याचा आरोप आहे. त्यानंतर त्यांच्या फॉर्च्युनर वाहनाचेही नुकसान करण्यात आल्याचे पोलिसांनी सांगितले. या घटनेचा पुढील तपास लोणीकंदच्या वरिष्ठ निरीक्षक सुनिता रोकडे यांच्या मार्गदर्शनाखाली सपोनि विलास मोटे करीत आहेत.