Cyber Scam: इन्स्टाग्रामवरील ‘जिन्न’च्या नावाखाली फसवणूक! मुंबईच्या तरुणीला १५ लाखांहून अधिक रुपयांचा चुना

फसवणूक झाल्याचे लक्षात येताच महिलेने पोलिसांत धाव घेतली. मुंबई सायबर सेलने याप्रकरणी गुन्हा दाखल केला असून आरोपीचा शोध सुरू आहे.

• ऑब्सेशन हीलर’च्या जाळ्यात सायनची तरुणी अडकली
• व्हॉट्सॲप आणि इन्स्टाग्रामवरून फसवणुकीचा नवा फंडा
• सोशल मीडियावरील ‘पॉवरफुल हीलर’च्या जाहिरातींना बळी पडू नका- सायबर सेलचा इशारा

मुंबईच्या सायन परिसरातून एक धक्कादायक प्रकरण समोर आले आहे. एका २२ वर्षीय तरुणीला ‘पॉवरफुल ऑब्सेशन हीलर’ (Powerful Obsession Healer) नावाच्या इन्स्टाग्राम पोस्टमधून जाळ्यात ओढण्यात आले. करिअर आणि वैयक्तिक आयुष्यातील समस्या सोडवण्याचा दावा करणाऱ्या या पोस्टमधील लिंकवर क्लिक केल्यानंतर पीडित महिला व्हॉट्सॲपच्या माध्यमातून वाहिद ऊर्फ साहिल नावाच्या व्यक्तीच्या संपर्कात आली.

अडीच वर्षे सुरू होता लुटीचा प्रकार

आरोपीने सुरुवातीला महिलेचा विश्वास संपादन केला आणि त्यानंतर आपल्याकडे ‘जिन्न’ व ‘तांत्रिक शक्ती’ असल्याचे सांगून तिला विविध विधी करण्याचा सल्ला दिला. जिन्न सर्व इच्छा पूर्ण करेल, असे आमिष त्याने दाखवले होते. मात्र, कालांतराने त्याने पीडितेच्या मनात भीती निर्माण करण्यास सुरुवात केली. पैसे न दिल्यास विधी अपूर्ण राहील किंवा दुष्ट शक्तींमुळे इजा होईल, अशी धमकी देऊन त्याने अडीच वर्षांत सुमारे १५,९३,९८० रुपये उकळले.

Mumbai Press Club: मुंबई प्रेस क्लबला बॉम्बची धमकी, एका ईमेलमुळे मोठी खळबळ

सायबर सेलकडून तपास सुरू

फसवणूक झाल्याचे लक्षात येताच महिलेने पोलिसांत धाव घेतली. मुंबई सायबर सेलने याप्रकरणी गुन्हा दाखल केला असून आरोपीचा शोध सुरू आहे. सोशल मीडियावरील अशा फसव्या जाहिरातींपासून नागरिकांनी सावध राहावे, असे आवाहन प्रशासनाकडून करण्यात आले आहे.

सोने विकूनही तिने पैसे दिले

सुरुवातीला, आरोपीने फक्त २५,००० रुपये मागितले. त्यानंतर, तो वेगवेगळ्या बहाण्यांनी पैशांची मागणी करू लागला. कधी विधी अपूर्ण आहे असे सांगून, कधी नकारात्मक ऊर्जा दूर करायची आहे असे सांगून, आणि कधी जिन्न रागावला आहे असे सांगून त्यांनी वारंवार तरुणीकडून पैसे उकळले. त्यानंतरही भीती आणि विश्वास यांच्या कात्रीत सापडलेली ती तरुणी पैसे पाठवत राहिली. तिने वेगवेगळ्या बँक खात्यांमध्ये पैसे हस्तांतरित केले. या खात्यांमध्ये सुमरा मोहम्मद, मोसिन सलीम आणि गुलनाज यांसारखी नावे वापरली होती.

Rupali Thombare Patil Post: ‘बजाव ताली… चाकणकर फरार!’ रुपाली ठोंबरेंच्या पोस्टचा नेमका अर्थ काय?

या फसवणुकीचा सर्वात धक्कादायक बाब म्हणजे,  तरुणीने तिच्या घरातील सोने विकूनही ते पैसे फसवणूक करणाऱ्यांना दिले होते. जेव्हा अडीच वर्षे पैसे देऊनही काहीच फायदा झाला नाही आणि मागण्या वाढतच गेल्या, तेव्हा तिला संशय आला. अखेरीस, तिने सायबर क्राईम हेल्पलाईन १९३० वर तक्रार दाखल केली.

संघटित टोळीचा संशय, तपास सुरू

तक्रारीनंतर, सायबर सेलने इंस्टाग्राम आयडी, मोबाईल नंबर आणि बँक खात्यांची चौकशी सुरू केली आहे. अंधश्रद्धेच्या नावाखाली सोशल मीडियाद्वारे लोकांना लक्ष्य करणाऱ्या एका मोठ्या आणि संघटित सायबर फसवणूक टोळीचे हे कृत्य असू शकते, असा पोलिसांना संशय आहे.