कंपनीच्या मालकाचा फोटो व्हॉट्सअ‍ॅपला डीपी ठेवून फसवणूक; पुणे पोलिसांकडून आंतरराज्य टोळीचा पर्दाफाश

कंपनी मालकाचा डीपी वापरून व्हॉट्सअ‍ॅपवर मेसेज पाठवत मोठ्या रकमेची फसवणूक करणाऱ्या आंतरराज्यीय टोळीचा पर्दाफाश पुणे सायबर पोलिसांनी केला आहे.

• कंपनीच्या मालकाचा फोटो व्हॉट्सअ‍ॅपला डीपी ठेवून फसवणूक
• पुणे पोलिसांकडून आंतरराज्य टोळीचा पर्दाफाश
• दोघांना पोलिसांनी ठोकल्या बेड्या

पुणे : राज्यासह जगभरात फसवणुकीच्या घटनांमध्ये मोठी वाढ झाली आहे. नागरिकांच्या लाखो रुपयांवर दररोज चोरटे डल्ला मारत आहेत. अशातच आता एक मोठी बातमी समोर आली आहे. कंपनी मालकाचा डीपी वापरून व्हॉट्सअ‍ॅपवर मेसेज पाठवत मोठ्या रकमेची फसवणूक करणाऱ्या आंतरराज्यीय टोळीचा पर्दाफाश पुणे सायबर पोलिसांनी केला आहे. तब्बल १ कोटी ९५ लाख रुपये इतकी आर्थिक फसवणूक झाल्याचे तपासात उघड झाले असून, दोघांना अटक करण्यात आली आहे.

 

अजय रामविलास यादव (वय २२) व सलमान गौस मोहियुद्दीन अजनाल (वय ३२, रा. कर्नाटक) अशी अटक करण्यात आलेल्या दोघांची नावे आहेत. त्यांच्या इतर साथीदारांचा शोध घेतला जात आहे. ही कारवाई पोलिस उपायुक्त (आर्थिक व सायबर गुन्हे) विवेक मासाळ यांच्या मार्गदर्शनाखाली वरिष्ठ निरीक्षक स्वप्नाली शिंदे तसेच पोलिस निरीक्षक संगीतादेवी काटे, उपनिरीक्षक सुशील डमरे, पोलिस अंमलदार संदीप कणसे, प्रविणसिंग राजपूत, राजूदास चव्हाण, अमर बनसोडे, शीतल डांगरे व अनिकेत भिंगारे यांच्या पथकाने केली आहे.

कंपनी मालकाचा फोटो व्हॉट्सअ‍ॅप डीपीला ठेवून त्याद्वारे कंपनीतील ग्राहकांना थेट मेसेज पाठवून या ग्राहकांकडून १ कोटी ९५ लाख रुपये उकळल्याप्रकरणी आरोपींवर गुन्हा दाखल झाला होता. सायबर पोलिसांनी तांत्रिक तपास सुरू केला व फसवणुकीसाठी वापरण्यात आलेली बँक खाती कर्नाटकातील बेळगाव येथील असल्याचे निष्पन्न झाले. नंतर सायबर पोलिस पथकाने सापळा रचून अजय यादव व सलमान अजनाल या दोघांना अटक केली. त्यांच्याकडून ३ मोबाईल, बँकेचे पासबुक व डेबिट कार्ड जप्त करण्यात आले आहे. आरोपींकडून आणखी काही आर्थिक फसवणूक प्रकरणांचा उलगडा होण्याची शक्यता पोलिसांनी व्यक्त केली आहे.

हे सुद्धा वाचा : घरात घुसून चोरी करणाऱ्या चोरट्यांना ठोकल्या बेड्या; बारामती तालुका पोलिसांची कारवाई

खातरजमा केल्याशिवाय कोणतीही आर्थिक देवाणघेवाण करू नये

नागरिकांनी व्हॉट्सअ‍ॅप, ई-मेल किंवा कॉलद्वारे येणाऱ्या पेमेंट संदर्भातील संदेशांची खातरजमा केल्याशिवाय कोणतीही आर्थिक देवाणघेवाण करू नये, तसेच संशयास्पद बाब आढळल्यास तात्काळ सायबर पोलिसांशी संपर्क साधावा, असे आवाहन करण्यात आले आहे.