शेतकऱ्याच्या बंगल्यावर दरोडा, कुटुंबियांना लाठ्याकाठ्यांनी मारहाण; तब्बल 12 लाख लुटले
सिन्नर : सिन्नर तालुक्यातील पाथरे खुर्द परिसरात शेतवस्तीवरील बंगल्याला लक्ष्य करत चार अज्ञात दरोडेखोरांनी धुमाकूळ घातला. गुरुवारी (दि. १५) रात्री साडेअकराच्या सुमारास किचनचा दरवाजा तोडून घरात घुसलेल्या दरोडेखोरांनी शेतकरी राजेंद्र सिताराम दवंगे (वय ५५) यांना लाकडी काठ्यांनी मारहाण केली. कोयत्याचा धाक दाखवून कुटुंबीयांना धमकावत ५० हजार रुपयांची रोकड आणि ११ लाख ४७ हजार रुपयांचे सोन्या-चांदीचे दागिने असा एकूण ११ लाख ९७ हजार रुपयांचा ऐवज लुटून नेला. दरोडेखोरांनी जवळच्या दुसऱ्या वस्तीवरही चोरीचा प्रयत्न केल्याची माहिती समोर आल्याने परिसरात भीतीचे वातावरण पसरले आहे.
राजेंद्र दवंगे यांची जवळके रस्त्यावरील वारेगाव परिसरात दवंगे वस्ती येथे वस्ती आहे. गुरुवारी रात्री साडेअकराच्या सुमारास काळ्या रंगाचे कपडे घातलेल्या आणि अंगाने सडपातळ असलेल्या चार अज्ञात दरोडेखोरांनी त्यांच्या बंगल्याच्या किचनच्या दरवाजाचा कडी-कोयंडा तोडून घरात प्रवेश केला. त्यानंतर दवंगे यांना लाकडी काठ्यांनी मारहाण केली. कोयत्याचा धाक दाखवत घरातील सदस्यांना गप्प राहण्यास भाग पाडले.
गळ्यातील दागिनेही बळजबरीने काढले
दरोडेखोरांनी दवंगे यांच्या बेडरूममधील कपाटात ठेवलेली ५० हजार रुपयांची रोकड, पत्नी अनिता यांचे सोन्याचे दागिने, मुलगा आकाश याचे चांदीचे ब्रेसलेट आणि बहीण लंकाबाई यांचे सोन्याचे दागिने लुटले. हॉलमध्ये झोपलेल्या अनिता, मुलगी अंकिता आणि लंकाबाई यांच्या गळ्यातील दागिनेही बळजबरीने काढून घेतले. अंकिता धनवटे हिच्या गळ्यातील सोन्याची पोत कापून नेल्याचे फिर्यादीत नमूद आहे. दरोडेखोरांनी सोन्याच्या पोती, मण्यांची पोत, अंगठ्या, कानातील झुबे, डोरले आणि चांदीचे ब्रेसलेट यांसह एकूण ११ लाख ९७ हजार रुपयांचा ऐवज लुटला. त्यानंतर चौघांनी जवळच्या उसाच्या शेतात धूम ठोकली.
शस्त्रांचा धाक दाखवत दरोडेखोरांची दहशत
शस्त्रांचा धाक दाखवून दरोडेखोरांनी घरात दहशत निर्माण केली. याप्रकरणी वावी पोलीस ठाण्यात चार अज्ञात आरोपीविरुद्ध गुन्हा दाखल करण्यात आला आहे. दरोडेखोरांचा शोध घेण्यासाठी पोलिसांची विविध पथके रवाना झाली आहेत. भरवस्तीजवळील शेतवस्तीवर सशस्त्र दरोडा पडल्याने शेतकरी आणि परिसरातील नागरिकांमध्ये भीतीचे वातावरण निर्माण झाले आहे.
.png "Videos"){kind=small}
