Bank Manager Suicide: वरिष्ठांच्या मानसिक त्रासाला कंटाळून इंडियन बँकेच्या अधिकाऱ्याची आत्महत्या; चिठ्ठीतून धक्कादायक खुलासे!

Bank Manager Suicide: "टार्गेट पूर्ण होऊनही सतत अपमान आणि मानसिक त्रास!" कराडमध्ये इंडियन बँकेच्या अधिकाऱ्याने संपवले आयुष्य; मृत्यूपूर्वीच्या चिठ्ठीतील धक्कादायक खुलाशाने उडाली खळबळ!

• कराडमधील इंडियन बँक मॅनेजर यांनी राहत्या फ्लॅटमध्ये केली आत्महत्या
• वरिष्ठांकडून मानसिक त्रास आणि अपमानास्पद वागणूक दिल्याचे सुसाईड नोटमध्ये नमूद
• भावाच्या तक्रारीवरून दोन उच्चाधिकारी महिलांवर गुन्हा दाखल

Bank Manager Suicide: गेल्या काही दिवसांपासून कामाच्या ताणतणावामुळे कर्मचाऱ्यांनी टोकाची पावले उचलल्याच्या घटना समोर येत असतानाच, आता साताऱ्यातून एक मन हेलावून टाकणारी घटना समोर आली आहे. कराडमध्ये इंडियन बँकेच्या एका अधिकाऱ्याने आपल्या राहत्या फ्लॅटमध्ये आत्महत्या केल्याची धक्कादायक घटना घडली आहे. रविकिरण केशव लाडे असे मृत बँक अधिकाऱ्याचे नाव असून, ते कराड शाखेत मॅनेजर म्हणून कार्यरत होते. मृत्यूआधी त्यांनी लिहिलेल्या सुसाईड नोटमधून (चिठ्ठी) धक्कादायक खुलासे झाले आहेत.

हेही वाचा: Dating App Story: “लग्नासाठी कॅनडाहून भारतात आली, पण…” डेटिंग ॲपवरील प्रेमाचा भयंकर अंत; तरुणाने दिला लग्नास स्पष्ट नकार!

राहत्या फ्लॅटमध्ये संपवले जीवन

बँकेतील पुणे उपक्षेत्रीय आणि क्षेत्रीय अधिकाऱ्यांकडून अपमानास्पद वागणूक आणि असह्य मानसिक त्रास दिला जात असल्याचा आरोप करत रविकिरण लाडे यांनी हे टोकाचे पाऊल उचलले. मूळचे लातूर जिल्ह्यातील मुरूड येथील असलेले रविकिरण नोव्हेंबर २०२४ पासून कराड येथील इंडियन बँकेच्या शाखेत मॅनेजर म्हणून कार्यरत होते. ते गेल्या ११ वर्षांपासून बँकिंग क्षेत्रात सेवा देत होते. मात्र, वरिष्ठांचा त्रास सहन न झाल्याने त्यांनी आपल्या राहत्या फ्लॅटमध्येच आयुष्य संपवले. या प्रकरणी त्यांचे बंधू अक्षय केशव लाडे यांनी पोलिसांत फिर्याद दिली आहे.

विनाकारण मानसिक त्रास आणि अपमानास्पद वागणूक

मृत रविकिरण लाडे यांना उपक्षेत्रीय अधिकारी मैथिली शरण सावला आणि क्षेत्रीय अधिकारी अर्चना सहदेव या रजा देत नव्हत्या, असा गंभीर आरोप करण्यात आला आहे. कार्यालयीन मीटिंगमध्ये इतर सहकाऱ्यांसमोर त्यांना वारंवार अपमानास्पद वागणूक दिली जात होती. बँकेचे टार्गेट पूर्ण झाले असतानाही त्यांना सातत्याने घालून पाडून बोलले जात असे आणि विनाकारण मानसिक त्रास दिला जात होता, असे सुसाईड नोटमध्ये नमूद आहे. या सततच्या त्रासामुळेच त्यांना तीव्र वेदना सहन कराव्या लागल्या. याप्रकरणी आता उपक्षेत्रीय अधिकारी मैथिली सावला आणि क्षेत्रीय अधिकारी अर्चना सहदेव यांच्यावर गुन्हा दाखल करण्यात आला आहे.

हेही वाचा: PSI Suicide: पोलीस दलात खळबळ! प्रेयसीच्या त्रासाला कंटाळून युवा पोलीस उपनिरीक्षकाची धावत्या ट्रेनसमोर उडी घेऊन आत्महत्या

हसत्याखेळत्या कुटुंबावर ओढवली वेळ

रविकिरण लाडे यांच्या अचानक जाण्याने त्यांच्या कुटुंबावर दुःखाचा डोंगर कोसळला आहे. त्यांच्या पश्चात आई, वडील, पत्नी, सात वर्षांची मुलगी, भाऊ, वहिनी आणि पुतणी असा परिवार आहे. या घटनेमुळे बँक कर्मचारी वर्तुळात आणि कराड परिसरात मोठी हळहळ व्यक्त होत असून, कर्मचाऱ्यांच्या मानसिक आरोग्याचा प्रश्न पुन्हा एकदा ऐरणीवर आला आहे.