पूर्णेकर हत्याकांडाचा कट कुठे शिजला? 'पप्या'च्या कोठडीत वाढ, 19 ऑक्टोबरपर्यंत कोठडी
हत्येच्या वेळी डोक्यात हेल्मेट घालून आलेला हल्लेखोर दुसरा तिसरा कोणी नसून अमितसिंग ऊर्फ पपलूच असल्याचे निष्पन्न झाले आहे, असा दावा पोलिसांनी न्यायालयात कोठडी मागताना केला. तसेच एफआयआरमध्ये नाव असलेल्या टल्लीचाही गुन्ह्यात थेट सहभाग समोर आला आहे. दरम्यान, याप्रकरणी पोलिसांचा अधिक तपास सुरू असून, हत्या प्रकरण्यापूर्वी आरोपींनी सराव कोठे केला? त्यांना इतरांची मदत होते का? याचा तपास होत असल्याचे अधिकाऱ्यांनी सांगितले.
हत्याकांडात दोन पिस्तुल, तीन चॉपरचा वापर
हत्याकांडात दोन पिस्तूल आणि तीन चॉपर वापरल्याचे स्पष्ट झाले असून, नितेश पवार ऊर्फ भावड्या याच्याकडून एक पिस्तूल हस्तगत करण्यात आले आहे. उर्वरित पिस्तूल आणि तीन चॉपर अद्याप जप्त व्हायचे आहेत. ही शस्त्रे नेमकी कुठून आणली ? रसद कोणी पुरवली? आणि आर्थिक मदत कोणाची होती? याचा माग पोलिस घेत आहेत. हल्ल्याच्या वेळी आरोपींनी घातलेले कपडे, हेल्मेट आणि त्यांचे मोबाईल फोन जप्त करणे बाकी असून, दोघांच्या घरांची झडती आणि बँक खात्यांतील संशयास्पद व्यवहारांचीही तपासणी केली जाणार आहे.
बैठकीत नेमकी काय खलबते झाली?
गुन्ह्यानंतर एकमेकांच्या संपर्कात राहण्यासाठी मुख्य संशयित पप्प्याने दुसऱ्याच व्यक्तीच्या नावाने मोबाईल व सिमकार्ड विकत घेऊन ते टल्लीला दिल्याचे तपासात समोर आले आहे. पप्प्या पोलिसांची दिशाभूल करत असून, सहकार्य करत नसल्याने, त्याला इतर आरोपींसमोर बसवून चौकशी केली जाणार आहे. जयनाथ पूर्णेकर यांनी दिलेल्या माहितीनुसार, २४ सप्टेंबर रोजी अटक केलेले सर्व प्रमुख आरोपी ‘नीळकंठ ग्रीन्स’ येथे एकत्र जमले होते. या बैठकीत नेमकी काय खलबते झाली आणि हत्येचा कट याच बैठकीत शिजला का, यादृष्टीने तपास होणार आहे.
.png "Videos"){kind=small}
