महाराष्ट्र हा गुजरातला आंदण देणाऱ्या महायुती सरकारला धडा शिकवा…; जयंत पाटलांचा एल्गार
विधानसभा निवडणुकीच्या पार्श्वभूमीवर शरद पवार गटाचे प्रदेशाध्यक्ष जयंत पाटील यांनी माढ्यामध्ये सभा घेतली. या सभेमध्ये जयंत पाटील यांनी महायुतीचा आणि भाजपचा खरपूस समाचार घेतला.
पंढरपूर : विधानसभा निवडणुकीच्या पार्श्वभूमीवर सभा व बैठका वाढल्या आहेत. शरद पवार गटाकडून सभा घेऊन जोरदार प्रचार केला जात आहे. शरद पवार गटाचे प्रदेशाध्यक्ष जयंत पाटील यांनी माढामध्ये प्रचारसभा घेतली. यावेळी महाराष्ट्र राज्यातील मोठमोठे उद्योगधंदे गुजरातला नेऊन येथील रोजगार पळविला जात असताना बघ्याची भूमिका घेणाऱ्या शिंदे सरकारने महाराष्ट्र राज्य जणू गुजरातलाच आंदण दिले आहे. शिवाजी महाराजांच्या पुतळा उभारणीतही भ्रष्टाचार करून त्याची परिसीमा गाठणाऱ्या त्रिकुटाला पुन्हा सत्तेत बसवणे म्हणजे राज्याला अधोगतिकडे नेण्यासारखे आहे. हे राज्यातील जनतेने ओळखले आहे. सध्या निवडणूक आपल्या टप्प्यात आली असून विजयाचे मताधिक्य वाढवा, असे आवाहन प्रदेशाध्यक्ष जयंत पाटील यांनी केले.
माढा विधानसभा मतदारसंघाचे महाविकास आघाडीचे उमेदवार अभिजित पाटील यांच्या प्रचारासाठी उपळाई (ता.माढा) येथे सभा आयोजित करण्यात आली होती. यावेळी जयंत पाटील यांनी आकडेवारीसह महायुतीच्या सरकारवर सडकून टीका केली. या सरकारच्या धोरणामुळे राज्याच्या उत्पन्नात घट झाली असून भारताच्या एकूण उत्पन्नात महाराष्ट्राचा 15 टक्के असणारा वाटा 13 टक्क्यांपर्यंत खाली आल्याचे त्यांनी सांगितले. याशिवाय 2014 पर्यंत दरडोई उत्पन्नात कायम गुजरातच्या पुढे आणि प्रथम चार क्रमांकात असणारे आपले राज्य आता गुजरातच्या खाली असून त्याची घसरण अकराव्या क्रमांकावर आली आहे. असा घणाघात जयंत पाटील यांनी केला.
माढा मतदारसंघातून महाविकास आघाडीकडून शरद पवार यांना उमेदवार देण्यात आला आहे. अभिजित पाटील यांना उमेदवारी देण्यात आली आहे. याबाबत विश्वास व्यक्त करताना जयंत पाटील म्हणाले की, अभिजित पाटील यांना शरद पवारांनी पूर्ण अभ्यास करून उमेदवारी दिली असल्याचे सांगून त्यांनी कोणतीही राजकीय पार्श्वभूमी नसताना आबांनी पाच साखर कारखाने चालवण्याचे शिवधनुष्य लीलया पेलले आहे. शिवाय त्यांच्याकडे विकासाचे व्हीजन असून गोरगरिबांची तळमळ आहे आणि तरुण आहेत. म्हणूनच शरद पवारांच्या विचारांच्या लढाईला साथ देण्यासठी त्यांना भरघोस मतांनी निवडून देण्याचे आवाहन त्यांनी केले. त्यांनी महाविकास आघाडीच्या शासनाची पंचसूत्री विषयी सविस्तर माहिती दिली.
यावेळी उमेदवार अभिजीत पाटील यांनी माढा विधानसभा मतदार संघाच्या विजयाचे व्हिजन मांडून अभिजीत पाटलाला मत म्हणजे शरद पवार साहेबांना मत असे सांगत ही निवडणूक आपण एकतर्फी जिंकू असा विश्वास व्यक्त केला. शरद पवार म्हणजे ऊर्जा तर जयंत पाटील म्हणजे संयम असा उल्लेख त्यांनी केला तेव्हा उपस्थित हजारो नागरिकांनी टाळ्यांच्या कडकडाटात त्यांना दाद दिली. माढ्याने लोकसभेला नवा खासदार दिला आता नवा आमदार देऊन येथील जनता इतिहास घडविणार असा आशावाद त्यांनी व्यक्त केला.
Web Title: Madha constituency assembly 2024 jayant patil targeted the mahayuti
.png "Videos"){kind=small}
