(फोटो सौजन्य- सोशल मीडिया)
Amitabh Bachchan: बॉलिवूडचे महानायक अमिताभ बच्चन यांच्या मुंबईतील जुहू येथील ‘जलसा’ बंगल्याला बॉम्बने उडवण्याची धमकी मिळाल्याची माहिती समोर आली आहे. पोलिस कंट्रोल रूममध्ये धमकी देण्यात आल्याचे सांगितले जात आहे. या घटनेमुळे परिसरात खळबळ उडाली असून पोलिसांकडून सुरक्षेच्या दृष्टीने तपास सुरू करण्यात आला आहे.
धमकीची माहिती मिळताच पोलिसांनी अमिताभ बच्चन यांच्या ‘जलसा’ बंगल्याची तपासणी केली. मात्र, या तपासणीत कोणतीही संशयास्पद वस्तू आढळून आली नाही. ही धमकी नेमकी कोणी आणि कुठून दिली, याचा शोध सध्या पोलीस घेत आहेत. विशेष म्हणजे, यापूर्वीही अमिताभ बच्चन यांचा बंगला उडवून देण्याची धमकी देण्यात आली होती.
दरम्यान, प्रसिद्ध गायक आणि अभिनेता दिलजीत दोसांझ यांच्या कॉन्सर्टलाही ग्रेनेडने उडवून देण्याची धमकी मिळाल्याची माहिती समोर आली आहे. त्यामुळे मनोरंजन विश्वातील कलाकार आणि त्यांच्या कार्यक्रमांच्या सुरक्षेचा प्रश्न पुन्हा ऐरणीवर आला आहे. सतत मिळणाऱ्या धमक्यांमुळे सेलिब्रिटींच्या सुरक्षेतही वाढ करण्यात येत असल्याचे सांगितले जात आहे.
गेल्या काही दिवसांत धमक्यांच्या घटनांमध्ये वाढ झाल्याचे पाहायला मिळत आहे. अभिनेता टायगर श्रॉफशी संबंधित गोळीबाराच्या घटनेनंतर महापौर कार्यालय आणि काही शाळांनाही धमकी मिळाल्याच्या बातम्या समोर आल्या होत्या. आता अमिताभ बच्चन यांच्या ‘जलसा’ बंगल्याला आणि दिलजीत दोसांझ यांच्या कॉन्सर्टला धमकी मिळाल्याने पुन्हा एकदा चिंता व्यक्त केली जात आहे.
सध्या पोलिसांकडून या धमकीच्या प्रकरणांचा तपास केला जात आहे. अमिताभ बच्चन यांच्या बंगल्याला धमकी देणारी व्यक्ती कोण, धमकीमागचा नेमका हेतू काय आणि यामागे काही कट आहे का, हे तपासानंतरच स्पष्ट होणार आहे.
.png "Videos"){kind=small}
