(फोटो सौजन्य- सोशल मीडिया)
AR Rahman Son Accident: संगीत दिग्दर्शक ए. आर. रहमान (AR Rahman ) यांचा मुलगा ए. आर. अमीन एका मोठ्या कार अपघातातून थोडक्यात बचावला आहे. रविवारी चेन्नईतील काथीपारा उड्डाणपुलावर अमीनच्या कारची दुसऱ्या वाहनाशी धडक झाली. सुदैवाने या अपघातात अमीन आणि त्याचा मित्र दोघेही सुखरूप असून, त्यांना मोठी दुखापत झालेली नाही.
मिळालेल्या माहितीनुसार, अमीन आपल्या मित्रासोबत कोयंबीडूच्या दिशेने जात होता. त्यावेळी गिंडीजवळील काथीपारा उड्डाणपुलावर त्यांच्या कारची दुसऱ्या वाहनाशी धडक झाली. पोलिसांच्या माहितीनुसार, अमीन स्वतः पोर्श कार चालवत होता.
एका बाजूच्या रस्त्यावरून अचानक वॅगन-आर कार मुख्य रस्त्यावर आल्याने हा अपघात झाल्याचे सांगितले जात आहे. यावेळी अमीनसोबत त्याचा मित्रही कारमध्ये होता.
अपघातानंतर अमीन आणि त्याच्या मित्राला उपचारासाठी कावेरी रुग्णालयात नेण्यात आले. दोघांनाही किरकोळ दुखापत झाली असून, कोणतीही गंभीर इजा झालेली नाही. डॉक्टरांनी तपासणीनंतर दोघांनाही रुग्णालयातून डिस्चार्ज दिला आहे. सध्या दोघेही घरी परतले आहेत.
या प्रकरणी पोलिसांनी गुन्हा दाखल करून पुढील तपास सुरू केला आहे.
ए. आर. रहमान यांचा मुलगा अमीनदेखील संगीत क्षेत्रात सक्रिय आहे. त्याने मणिरत्नम यांच्या ‘ओ कादल कणमणी’ या चित्रपटातून पार्श्वगायन क्षेत्रात पदार्पण केले. या चित्रपटातील ‘मौला सल्ली’ या गाण्याला त्याने आवाज दिला आहे. याशिवाय तो विविध संगीत मैफिलींमध्येही सहभागी होताना दिसतो.
दरम्यान, ए. आर. रहमान यांच्या आगामी कामांबद्दल बोलायचे झाल्यास, ते नमित मल्होत्रा आणि नितेश तिवारी यांच्या ‘रामायण’ चित्रपटासाठी संगीत देत आहेत. तसेच सनी देओल आणि प्रीती झिंटा यांच्या ‘बंटवारा’ या चित्रपटासाठीही त्यांचे संगीत ऐकायला मिळणार आहे.
.png "Videos"){kind=small}
