(फोटो सौजन्य- सोशल मीडिया)
Ayushman Khurrana: बॉलिवूड अभिनेता आयुष्मान खुराना सध्या त्याच्या आगामी ‘ये प्रेम मोल लिया’ या चित्रपटामुळे चर्चेत आहे. दिग्दर्शक सूरज बडजात्या यांच्या या चित्रपटात आयुष्मानसोबत अभिनेत्री शर्वरी झळकणार आहे. विशेष म्हणजे, छठ पूजेच्या पार्श्वभूमीवर चित्रपटातील ‘बुलाए छठी मां’ हे खास गाणे प्रेक्षकांच्या भेटीला आले आहे. या गाण्यातून छठ पूजेची श्रद्धा, भक्ती आणि परंपरा सुंदरपणे मांडण्यात आली आहे. या गाण्याच्या निमित्ताने आयुष्मान खुराना याने पहिल्यांदाच छठ पूजा अनुभवण्याचा आपला खास अनुभव सांगितला आहे.
पंजाबी कुटुंबातून आलेल्या आयुष्मानने यापूर्वी कधीही छठ पूजा साजरी केली नव्हती. मात्र, ‘ये प्रेम मोल लिया’च्या शूटिंगदरम्यान त्याला या सणाचा भाग होण्याची संधी मिळाली. छठ पूजेशी जोडलेल्या भावना, श्रद्धा आणि परंपरा जवळून अनुभवता आल्यामुळे हा अनुभव त्याच्यासाठी विशेष ठरला.
याबद्दल बोलताना आयुष्मान म्हणाला, “पंजाबी असल्यामुळे मी यापूर्वी कधीही छठ पूजा साजरी केली नव्हती. त्यामुळे पहिल्यांदाच हा सण अनुभवणं माझ्यासाठी खूप खास होतं. छठशी जोडलेल्या भावना आणि त्याचं महत्त्व, तसेच हा सण किती सुंदरपणे लोकांना एकत्र आणतो, ही गोष्ट माझ्या मनाला विशेष भावली. प्रत्येक विधीमागे एक वेगळा अर्थ आहे आणि त्यामागे खूप श्रद्धा व भक्ती आहे. माझ्यासाठी हा अनुभव केवळ एका गाण्याच्या शूटिंगपुरता मर्यादित नव्हता, तर माझ्यासाठी पूर्णपणे नवीन असलेल्या एका सुंदर परंपरेचा भाग होण्याची संधी होती.”
शूटिंगदरम्यानचा तो भावूक क्षण आजही लक्षात
छठ पूजेच्या क्लायमॅक्स सीक्वेन्सच्या शूटिंगपूर्वी घडलेला एक खास प्रसंगही आयुष्मानने सांगितला. दिग्दर्शक सूरज बडजात्या यांनी संपूर्ण कलाकारांना एकत्र बोलावून छठ पूजेचं गाणं लावलं होतं. या प्रसंगाने संपूर्ण कलाकार मंडळी भावूक झाली होती.
या आठवणीबद्दल आयुष्मान म्हणाला, “छठ पूजेच्या क्लायमॅक्स सीक्वेन्सच्या शूटिंगपूर्वी एक अतिशय खास क्षण अनुभवायला मिळाला. सूरजजींनी संपूर्ण कास्टला एकत्र बोलावलं आणि आमच्यासाठी छठ पूजेचं गाणं लावलं. तो क्षण इतका भावूक करणारा होता की प्रत्येकाच्या डोळ्यांत अश्रू होते. तो अनुभव आम्हा सर्वांच्या मनात कायमचा राहिला आणि त्यामुळे हा सीक्वेन्स आणखी अर्थपूर्ण झाला. छठ पूजेचा सीक्वेन्स साकारताना सूरजजींनी घेतलेली भूमिका आणि या परंपरा व त्यामागील भावना अत्यंत वास्तववादी पद्धतीने मांडण्याला त्यांनी दिलेलं महत्त्व यामुळे संपूर्ण कास्ट भारावून गेली होती.”
छठ पूजा हा भारतातील अत्यंत श्रद्धेने साजरा केला जाणारा सण आहे. बिहार, झारखंड, उत्तर प्रदेश आणि छत्तीसगड या राज्यांमध्ये या सणाला विशेष महत्त्व आहे. याशिवाय दिल्ली, मुंबई, पश्चिम बंगाल आणि ओडिशासह देशातील विविध भागांमध्येही भाविक मोठ्या उत्साहाने छठ पूजा साजरी करतात. श्रद्धा, कृतज्ञता आणि एकजुटीचा संदेश देणारा हा सण ‘बुलाए छठी मां’ या गाण्यातून सुंदरपणे उलगडण्यात आला आहे.
दरम्यान, ‘ये प्रेम मोल लिया’च्या माध्यमातून आयुष्मान खुराना पहिल्यांदाच सूरज बडजात्या यांच्या चित्रपटविश्वात प्रवेश करत आहे. कौटुंबिक नाती, सण आणि भारतीय परंपरा यांना आपल्या चित्रपटांमधून विशेष स्थान देणारे सूरज बडजात्या यावेळीही प्रेक्षकांसाठी एक भावनिक आणि सांस्कृतिक अनुभव घेऊन येत आहेत. त्यामुळे आयुष्मान आणि शर्वरीची जोडी मोठ्या पडद्यावर पाहण्यासाठी चाहत्यांमध्ये उत्सुकता आहे.
.png "Videos"){kind=small}
