(फोटो सौजन्य- सोशल मीडिया)
Bappa Majha Song: गणेशोत्सवाच्या पार्श्वभूमीवर गणेशभक्तांसाठी एक नवा संगीतमय नजराणा प्रेक्षकांच्या भेटीला आला आहे. ‘वीरता प्रॉडक्शन’च्या ‘बाप्पा माझा’ या नव्या गाण्याने अल्पावधीतच प्रेक्षकांचे लक्ष वेधून घेतले आहे. प्रसिद्ध गायक दिव्या कुमार यांच्या दमदार आवाजातील या गाण्याने प्रदर्शित झाल्यानंतर अवघ्या चार दिवसांत 1 मिलियन व्ह्यूजचा टप्पा पार केला आहे.
‘बाप्पा माझा’ या गाण्याच्या माध्यमातून राजे यशोवर्धन यांनी मनोरंजनसृष्टीत पदार्पण केलं आहे. त्यांच्यासोबत रितेश कांबळे आणि अंकिता मेस्त्री प्रमुख भूमिकेत झळकत आहेत.
गाण्याची कथा तीन गणेशोत्सवप्रेमी तरुणांभोवती फिरते. गणेशोत्सवाचे खास क्षण आपल्या ब्लॉगच्या माध्यमातून टिपण्यासाठी हे तरुण खेडेगावात पोहोचतात. गावात साधेपणाने आणि आपुलकीने साजरा होणारा गणेशोत्सव ते आपल्या कॅमेऱ्यात कैद करतात.
गावात फिरत असताना या तरुणांना एका शाळेची बिकट परिस्थिती दिसते. शाळेच्या दुरुस्तीसाठी ठेवलेली दानपेटीही त्यांच्या नजरेस पडते. शाळेची अवस्था पाहून ते त्यावर व्हिडीओ तयार करतात आणि सोशल मीडियावर शेअर करतात.
पाहता पाहता हा व्हिडीओ मोठ्या प्रमाणात व्हायरल होतो. त्यानंतर बाप्पाच्या कृपेने शाळेच्या दुरुस्तीसाठी शासनाकडून निधी मंजूर होतो. त्यामुळे भक्ती आणि गणेशोत्सवाच्या उत्साहासोबतच सोशल मीडियाच्या माध्यमातून सकारात्मक बदल घडवता येतो, असा सुंदर संदेश या गाण्यातून देण्यात आला आहे.
Drishyam 3: विजय साळगावकरची कथा इथेच संपणार? ‘दृश्यम 4’बाबत दिग्दर्शकांनी केला मोठा खुलासा
दिव्या कुमार यांच्या आवाजाने गाण्याला खास रंग
‘बाप्पा माझा’ हे गाणं बॉलिवूड आणि मराठी सिनेसृष्टीतील प्रसिद्ध गायक दिव्या कुमार यांच्या आवाजात रेकॉर्ड करण्यात आलं आहे. तर तरुणाईमध्ये लोकप्रिय असलेले संगीतकार-गीतकार प्रशांत नाकती आणि करण सावंत यांनी गाण्याचं संगीत आणि बोल तयार केले आहेत.
खेड्यापाड्यात साधेपणाने साजरा होणाऱ्या गणेशोत्सवाची सुंदर झलक या गाण्यात पाहायला मिळते. रोहित जाधव यांनी या गाण्याचं दिग्दर्शन केलं असून, सध्या सोशल मीडियावरही या गाण्याची चर्चा सुरू आहे. गाण्याच्या निर्मितीची जबाबदारी स्मिता वीरेंद्रसिंग यांनी सांभाळली आहे.
गणरायाचं जल्लोषात स्वागत करण्यासोबतच सामाजिक संदेश देणारं ‘बाप्पा माझा’ हे गाणं प्रेक्षकांच्या पसंतीस उतरलं आहे. गाण्याचे बोल आणि संगीत गणेशभक्तांना ठेका धरायला लावत असून, प्रदर्शित झाल्यानंतर अवघ्या चार दिवसांत 1 मिलियन व्ह्यूज मिळवण्यात या गाण्याला यश आलं आहे.
गणेशोत्सवाचा उत्साह, भक्ती आणि सामाजिक जाणीव यांचा सुंदर मेळ साधणारं हे गाणं यंदाच्या गणेशोत्सवात गणेशभक्तांच्या प्लेलिस्टमध्ये स्थान मिळवत आहे.
.png "Videos"){kind=small}
