(फोटो सौजन्य- सोशल मीडिया)
Bollywood Couple Wedding: टीव्ही आणि बॉलिवूडमधील लोकप्रिय जोडप्यांपैकी एक असलेले अभिनेत्री अर्चना पूरण सिंह आणि अभिनेता परमीत सेठी पुन्हा एकदा चर्चेत आले आहेत. त्यांच्या लग्नाला जवळपास ३४ वर्षे पूर्ण झाली आहेत. मात्र, आता हे जोडपे पुन्हा एकदा विवाहबंधनात अडकणार आहे. विशेष म्हणजे, यावेळी त्यांचा लग्नसोहळा अगदी थाटामाटात पार पडणार असून, चाहत्यांना या खास सोहळ्याची झलक छोट्या पडद्यावर पाहायला मिळणार आहे.
अर्चना पूरण सिंह आणि परमीत सेठी यांचा हा खास विवाहसोहळा ‘पती, पत्नी और पंगा सीझन २’ या कार्यक्रमात पाहायला मिळण्याची शक्यता आहे. नुकतेच अर्चनाने स्वतः तिच्या दुसऱ्या लग्नाची तारीख जाहीर केली. ‘पती, पत्नी और पंगा सीझन २’च्या सेटवर पापाराझींशी संवाद साधताना तिने आपल्या पुनर्विवाहाबद्दल माहिती दिली. तसेच या आनंदाच्या निमित्ताने एक खास पार्टी आयोजित करण्याची इच्छाही तिने गंमतीने व्यक्त केली.
अर्चनाने सांगितले की, ती आणि परमीत सेठी येत्या १२ डिसेंबर रोजी पुन्हा एकदा लग्न करणार आहेत. याआधी १९९२ मध्ये या दोघांनी लग्न केले होते. मात्र, त्यावेळी त्यांचा विवाहसोहळा अत्यंत साध्या पद्धतीने पार पडला होता. या लग्नाला मोजकेच कुटुंबीय उपस्थित होते. कोणताही मोठा समारंभ न करता त्यांनी संसाराला सुरुवात केली होती. त्यामुळे आता तब्बल ३४ वर्षांनंतर त्यांना आपला लग्नसोहळा कुटुंबीय, मित्रमंडळी आणि जवळच्या लोकांच्या उपस्थितीत मोठ्या थाटामाटात साजरा करायचा आहे.
दरम्यान, अर्चना आणि परमीत यांच्या पुन्हा लग्न करण्याच्या निर्णयावर परमीतनेही आपल्या खास विनोदी अंदाजात प्रतिक्रिया दिली. ‘चुका होतात,’ असे तो गंमतीने म्हणाला. त्यावर अर्चनानेही हसत आपण पुन्हा तीच चूक करणार असल्याचे सांगितले. मात्र, यावेळी ही चूक अनेक लोकांच्या उपस्थितीत होणार असल्याचेही तिने मजेशीरपणे स्पष्ट केले. या दोघांमधील हा संवाद सध्या चर्चेचा विषय ठरत आहे.
‘पती, पत्नी और पंगा’च्या पहिल्या सीझनमध्येही निर्मात्यांनी प्रेक्षकांना असेच खास सरप्राईज दिले होते. या शोमध्ये अभिनेत्री अविका गौर आणि तिचा पती मिलिंद चंदवाणी यांचा विवाहसोहळा पार पडला होता. आता दुसऱ्या सीझनमध्ये अर्चना पूरण सिंह आणि परमीत सेठी यांच्या पुनर्विवाहाची झलक पाहायला मिळणार असल्याने प्रेक्षकांमध्ये उत्सुकता निर्माण झाली आहे.
.png "Videos"){kind=small}
