शुक्रवार, 13 नोव्हेंबर 2026
(फोटो सौजन्य- सोशल मीडिया)
Govinda-Komal Rani Romantic Photos: बॉलिवूड अभिनेता गोविंदा सध्या त्याच्या वैयक्तिक आयुष्यामुळे पुन्हा एकदा चर्चेत आला आहे. पत्नी सुनीता आहुजासोबतच्या मतभेदांच्या बातम्यांमुळे गेल्या काही काळापासून तो चर्चेत आहे. अशातच गोविंदा जवळपास सात वर्षांनंतर बॉलिवूडमध्ये पुनरागमन करण्यासाठी सज्ज झाला आहे. तो लवकरच ‘रूपा’ या चित्रपटातून प्रेक्षकांच्या भेटीला येणार असून, या चित्रपटात अभिनेत्री कोमल राणी स्वर्णकर मुख्य भूमिकेत दिसणार आहे.
‘रूपा’ चित्रपटाची घोषणा झाल्यापासून गोविंदा आणि कोमल राणी अनेकदा एकत्र दिसले आहेत. त्यांच्या एकत्र दिसण्यामुळे दोघांच्या नात्याबद्दल सोशल मीडियावर चर्चा रंगल्या होत्या. आता कोमल राणीने गोविंदासोबतचे काही रोमँटिक फोटो सोशल मीडियावर शेअर केले आहेत. त्यामुळे पुन्हा एकदा या दोघांची चर्चा सुरू झाली आहे.
कोमल राणीने तिच्या सोशल मीडिया अकाउंटवर ‘रूपा’ चित्रपटातील काही खास फोटो पोस्ट केले आहेत. या फोटोंमध्ये गोविंदा आणि कोमल राणी एकमेकांसोबत रोमँटिक अंदाजात दिसत आहेत. ही छायाचित्रे चित्रपटातील एका प्रसंगाची झलक असल्याचं कोमलने कॅप्शनमधून स्पष्ट केलं आहे. तिने या पोस्टला ‘रूपा’मधील एक सुंदर झलक’, असं कॅप्शन दिलं आहे.
या फोटोंमध्ये कोमल राणीने हलक्या जांभळ्या रंगाची साडी नेसली आहे. तर गोविंदा पांढरा शर्ट, ब्लेझर आणि काळ्या पँटमध्ये दिसत आहे. दोघांचा हा रोमँटिक अंदाज चाहत्यांचं लक्ष वेधून घेत आहे. सध्या हे फोटो सोशल मीडियावर व्हायरल होत असून, त्यावर नेटकऱ्यांकडून विविध प्रतिक्रिया दिल्या जात आहेत.
कोमल राणीच्या या पोस्टवर अनेकांनी कमेंट केल्या आहेत. मात्र, अभिनेत्री राखी सावंतच्या कमेंटने विशेष लक्ष वेधून घेतलं आहे. राखीने या फोटोंवर राग व्यक्त करणारे इमोजी शेअर केले आहेत. तिच्या या प्रतिक्रियेमुळे सोशल मीडियावर पुन्हा चर्चा सुरू झाली आहे.
दरम्यान, गोविंदा आणि कोमल राणी यांच्या अफेअरच्या चर्चा याआधीही रंगल्या होत्या. गोविंदाची पत्नी सुनीता आहुजा यांनीही त्यांच्या वैवाहिक आयुष्याबद्दल काही गंभीर आरोप केले होते. मात्र, गोविंदाने कोमलसोबत अफेअर असल्याच्या चर्चा फेटाळून लावल्या होत्या. त्यामुळे आता कोमलने शेअर केलेल्या रोमँटिक फोटोंची आणि त्यावर राखी सावंतने दिलेल्या प्रतिक्रियेची सोशल मीडियावर चर्चा होत आहे.
