( फोटो सौजन्य- सोशल मिडिया)
Eetha Movie Postponed: श्रद्धा कपूर सध्या तिच्या आगामी ‘ईठा’ या चित्रपटामुळे चर्चेत आहे. महाराष्ट्राच्या महान लावणी आणि तमाशा लोककलाकार विठ्ठाबाई नारायणगावकर यांच्या जीवनावर आधारित या चित्रपटाच्या प्रदर्शनाच्या तारखेबाबत महत्त्वाची अपडेट समोर आली आहे. निर्मात्यांनी ‘ईठा’ची रिलीज डेट पुढे ढकलली असून, आता हा चित्रपट ४ डिसेंबर २०२६ रोजी चित्रपटगृहात दाखल होणार आहे.
‘ईठा’ यापूर्वी २८ ऑगस्ट २०२६ रोजी प्रदर्शित होणार होता. त्याच काळात यशचा बहुप्रतीक्षित ‘टॉक्सिक’ हा चित्रपट २६ ऑगस्ट २०२६ रोजी रिलीज होणार असल्याने दोन्ही चित्रपटांमध्ये बॉक्स ऑफिसवर मोठी टक्कर पाहायला मिळणार होती. मात्र, ‘ईठा’ची रिलीज डेट पुढे ढकलण्यात आल्याने श्रद्धा कपूर आणि यश यांच्यातील हा क्लॅश आता टळला आहे.
चित्रपटाची निर्मिती करणाऱ्या मॅडॉक फिल्म्सने सोशल मीडियावर पोस्ट शेअर करत ‘ईठा’च्या नव्या प्रदर्शनाची तारीख जाहीर केली. “वादळासाठी तयार व्हा… कारण #EETHA येत आहे, ४ डिसेंबरला!” अशा कॅप्शनसह ही घोषणा करण्यात आली.
मात्र, यशसोबतची टक्कर टळली असली तरी श्रद्धा कपूरच्या ‘ईठा’समोर आता आणखी मोठे आव्हान असणार आहे. कारण ४ डिसेंबर रोजी प्रभास आणि अक्षय कुमार यांच्या चित्रपटांशी ‘ईठा’ची बॉक्स ऑफिसवर स्पर्धा होण्याची शक्यता आहे.
नव्या रिलीज डेटनुसार श्रद्धा कपूरचा ‘ईठा’ ४ डिसेंबर २०२६ रोजी प्रदर्शित होणार आहे. याच काळात प्रभासचा पॅन-इंडिया चित्रपट ‘फौजी ३’ रिलीज होण्याची शक्यता आहे. तसेच अक्षय कुमार आणि विद्या बालन यांच्या प्रमुख भूमिका असलेला अनीस बाझमी यांचा आगामी चित्रपटही याच दिवशी प्रदर्शित होणार असल्याचे सांगितले जात आहे.
त्यामुळे डिसेंबरच्या पहिल्या वीकेंडमध्ये बॉक्स ऑफिसवर तीन मोठ्या चित्रपटांमध्ये जबरदस्त स्पर्धा पाहायला मिळू शकते. मात्र, डिसेंबरला अजून काही महिने बाकी असल्याने यापैकी कोणता चित्रपट ठरलेल्या तारखेला रिलीज होतो आणि कोणाच्या प्रदर्शनाची तारीख बदलते, हे पाहणे महत्त्वाचे ठरणार आहे.
‘ईठा’चा टीझर सर्वप्रथम ‘कॉकटेल २’ या चित्रपटासोबत थिएटरमध्ये दाखवण्यात आला होता. त्यानंतर हा टीझर ऑनलाइन प्रदर्शित करण्यात आला. टीझरला प्रेक्षकांकडून चांगला प्रतिसाद मिळाला असून श्रद्धा कपूरच्या अभिनयाची विशेष चर्चा झाली.
अनेक प्रेक्षकांनी श्रद्धा या चित्रपटातून तिच्या कारकिर्दीतील सर्वोत्तम अभिनय सादर करू शकते, असा अंदाज व्यक्त केला आहे. काही चाहत्यांनी तर तिच्या अभिनयासाठी राष्ट्रीय पुरस्काराचीही शक्यता व्यक्त केली आहे.
‘ईठा’चे दिग्दर्शन लक्ष्मण उतेकर यांनी केले आहे. त्यांच्या मागील ‘छावा’ चित्रपटाने बॉक्स ऑफिसवर दमदार कामगिरी करत ब्लॉकबस्टर यश मिळवले होते. त्यामुळे ‘ईठा’कडूनही प्रेक्षकांच्या अपेक्षा मोठ्या आहेत. आता श्रद्धा कपूर विठ्ठाबाई नारायणगावकर यांची भूमिका किती प्रभावीपणे साकारते आणि हा चित्रपट बॉक्स ऑफिसवर किती कमाई करतो, याकडे सर्वांचे लक्ष लागले आहे.
.png "Videos"){kind=small}
