(फोटो सौजन्य- सोशल मीडिया)
Eisha Singh Avinash Mishra: बिग बॉस १८’मधून प्रेक्षकांच्या मनात स्थान निर्माण करणारी अभिनेत्री ईशा सिंह आणि खतरों के खिलाडी १५चा विजेता अभिनेता अविनाश मिश्रा यांची जोडी पुन्हा एकदा चर्चेत आली आहे. या दोघांच्या मैत्रीची आणि जवळिकीची बऱ्याच काळापासून चर्चा सुरू होती. चाहत्यांनाही त्यांची जोडी खूप आवडत होती. काही दिवसांपूर्वीच ‘खतरों के खिलाडी १५’च्या सक्सेस पार्टीमध्ये दोघांनी एकमेकांवरील प्रेम व्यक्त केल्याचे पाहायला मिळाले होते. मात्र, आता ईशाने सोशल मीडियावर अविनाशला अनफॉलो केल्याने त्यांच्या नात्यात दुरावा निर्माण झाल्याच्या चर्चांना सुरुवात झाली आहे.
समोर आलेल्या माहितीनुसार, ईशा सिंह आता इन्स्टाग्रामवर अविनाश मिश्राला फॉलो करत नाही. विशेष म्हणजे, अविनाश मात्र अजूनही ईशाला फॉलो करत आहे. त्यामुळे या दोघांमध्ये काहीतरी बिनसल्याचा अंदाज चाहते व्यक्त करत आहेत. ईशाच्या या कृतीने सोशल मीडियावर चर्चांना उधाण आले आहे. मात्र, या दोघांपैकी कोणीही त्यांच्या नात्याबाबत किंवा संभाव्य दुराव्याबाबत अधिकृतपणे कोणतीही प्रतिक्रिया दिलेली नाही.
ईशाच्या आईची रहस्यमयी पोस्ट चर्चेत
ईशाने अविनाशला अनफॉलो केल्यानंतर तिची आई रेखा सिंह यांची एक इन्स्टाग्राम स्टोरीही चर्चेचा विषय ठरली आहे. त्यांनी सोशल मीडियावर एक रहस्यमयी पोस्ट शेअर केली होती. या पोस्टमध्ये लिहिले होते की, ‘वेळ प्रत्येक व्यक्तीला त्याच्या कर्माचा आरसा नक्की दाखवते. म्हणूनच कोणाच्या वागण्यामुळे स्वतःला कधीही खचू देऊ नका. योग्य मार्ग म्हणजे शांत राहून आपल्या वाटेने पुढे जात राहणे, कारण उत्तर शब्द देत नाहीत, तर वेळ देते.’
रेखा सिंह यांच्या या पोस्टचा संबंध ईशा आणि अविनाश यांच्या नात्याशी असल्याचा अंदाज काही चाहत्यांनी व्यक्त केला आहे. ईशाने केलेले अनफॉलो आणि तिच्या आईची ही पोस्ट या दोन्ही गोष्टी जोडून सोशल मीडियावर वेगवेगळ्या चर्चा सुरू झाल्या आहेत.
काही दिवसांपूर्वीच एकमेकांना म्हणाले होते ‘आय लव्ह यू’
विशेष म्हणजे, काही दिवसांपूर्वीच अविनाश मिश्रा यांच्या ‘खतरों के खिलाडी १५’च्या सक्सेस पार्टीमध्ये ईशा आणि अविनाश एकमेकांच्या खूप जवळ दिसले होते. या पार्टीदरम्यान अविनाशने ईशाचे आभार मानताना ती आपल्या आयुष्यात असल्यामुळे आपण स्वतःला भाग्यवान समजतो, असे म्हटले होते. त्यानंतर ईशाने त्याला पुढे बोलण्यास सांगितले. यावर अविनाशने ‘आय लव्ह यू, बेबी’ असे म्हटले, तर ईशानेही ‘आय लव्ह यू टू’ म्हणत त्याला प्रतिसाद दिला.
दोघांमधील हा संवाद सोशल मीडियावर चांगलाच चर्चेत आला होता. त्यामुळे आता अचानक ईशाने अविनाशला अनफॉलो केल्याने चाहत्यांना आश्चर्याचा धक्का बसला आहे.
‘बिग बॉस १८’च्या घरात ईशा सिंह आणि अविनाश मिश्रा यांच्यात चांगली मैत्री निर्माण झाली होती. शो संपल्यानंतरही त्यांची मैत्री कायम होती. इतकेच नाही, तर अलीकडेच दोघे ‘पती, पत्नी और पंगा २’ या टीव्ही शोमध्येही एकत्र दिसले होते. त्यांच्या जवळिकीमुळे चाहत्यांमध्ये त्यांच्या नात्याबाबत अनेकदा चर्चा रंगल्या आहेत. आता मात्र सोशल मीडियावरील या घडामोडींमुळे त्यांच्या नात्यात नेमके काय सुरू आहे, असा प्रश्न चाहत्यांना पडला आहे. या चर्चांवर ईशा किंवा अविनाश काय प्रतिक्रिया देतात, हे पाहणे महत्त्वाचे ठरणार आहे.






