(फोटो सौजन्य- सोशल मिडिया)
Guru Purnima: गुरु-शिष्य परंपरेचा गौरव आणि गुरूंच्या संगीतवारशाला अभिवादन करण्यासाठी उस्ताद अल्लारखा इन्स्टिट्यूट ऑफ म्युझिकतर्फे ‘प्रणाम – गुरुपौर्णिमा सोहळा’ या विशेष संगीतोत्सवाचे आयोजन करण्यात आले आहे. १३ ऑगस्ट २०२६ रोजी दुपारी २ ते रात्री ११ वाजेपर्यंत वीर सावरकर सभागृह, शिवाजी पार्क, मुंबई येथे हा दिवसभराचा कार्यक्रम रंगणार आहे. विशेष म्हणजे, या सोहळ्याला प्रवेश विनामूल्य असून तो सर्वांसाठी खुला आहे.
उस्ताद अल्लारखा आणि उस्ताद झाकीर हुसेन यांच्या संगीत, शिस्त, ज्ञान आणि कलात्मक मूल्यांना अभिवादन करण्यासाठी हा सोहळा आयोजित करण्यात आला आहे. गुरु-शिष्य परंपरेतून पिढ्यानपिढ्या पुढे आलेला संगीतवारसा विविध कलाकारांच्या सादरीकरणातून रसिकांसमोर उलगडणार आहे.
कार्यक्रमाची सुरुवात किराणा घराण्याचे प्रसिद्ध गायक जयतीर्थ मेवुंडी यांच्या एकल गायनाने होणार आहे. या मैफलीत ते दुर्मीळ दुपारच्या रागांचे सादरीकरण करणार आहेत.
निखळ स्वर आणि हिंदुस्थानी शास्त्रीय संगीताची सखोलता अनुभवण्याची संधी या मैफलीत रसिकांना मिळणार आहे. गुरु-शिष्य परंपरेतून एका पिढीकडून दुसऱ्या पिढीकडे संक्रमित होणाऱ्या ज्ञानाचा सूर या सत्रातून उमटणार आहे.
कार्यक्रमाच्या दुसऱ्या सत्रात ‘Changing of Face and Phase of Indian Classical Music’ या विषयावर विशेष चर्चासत्र आयोजित करण्यात आले आहे. तबलावादक योगेश सम्सी, गायिका देवकी पंडित, कलारसिक राजीव सेठी आणि सतारवादक मेहताब अली नियाझी या चर्चेत सहभागी होणार आहेत.
भारतीय शास्त्रीय संगीताचं बदलतं स्वरूप, सादरीकरणातील बदल, कलाकार-रसिकांचं बदलतं नातं आणि बदलत्या काळाशी संगीत क्षेत्र जुळवून घेत असताना निर्माण होणारी आव्हानं यावर या चर्चेत विचारमंथन होणार आहे. पंचम निषादचे संस्थापक शशी व्यास या सत्राचे सूत्रसंचालन करणार आहेत.
‘प्रणाम’ सोहळ्याची सांगता उस्ताद फजल कुरेशी यांच्या नेतृत्वाखालील तालवाद्यांच्या विशेष मैफलीने होणार आहे. या मैफलीत तौफिक कुरेशी, गिनो बँक्स, जयतीर्थ मेवुंडी, श्रीधर पार्थसारथी, शेल्डन डिसिल्वा, संगीत हल्दीपूर आणि नितीन शंकर यांसारखे नामांकित कलाकार सहभागी होणार आहेत.
याशिवाय रामकांत गायकवाड आणि भाग्यश्री पांचाळे यांच्या गायनाचीही मेजवानी रसिकांना मिळणार आहे. विविध पिढ्या आणि संगीत परंपरांतील कलाकार ताल, वादन आणि सहवादनाच्या माध्यमातून एकत्र येणार असल्याने हे सत्र विशेष ठरणार आहे.
भारतीय शास्त्रीय संगीतातील गुरु-शिष्य नातं हे केवळ राग किंवा तंत्र शिकण्यापुरतं मर्यादित नाही. शिस्त, सौंदर्यदृष्टी, मूल्यं, अर्थनिर्णय आणि सातत्यपूर्ण रियाझातून विकसित होणारी संगीताची सखोल जाण या नात्याचा महत्त्वाचा भाग आहे.
याच परंपरेचा गौरव करत ‘प्रणाम’ हा सोहळा गुरूंच्या ऋणाची जाणीव करून देतानाच त्यांच्याकडून मिळालेलं ज्ञान, मूल्यं आणि संगीतपरंपरा पुढील पिढीकडे नेणाऱ्या कलाकारांचा सन्मान करणार आहे.
कार्यक्रमाचा तपशील
कार्यक्रम: प्रणाम – गुरुपौर्णिमा सोहळा
आयोजक: उस्ताद अल्लारखा इन्स्टिट्यूट ऑफ म्युझिक
दिनांक: १३ ऑगस्ट २०२६, गुरुवार
वेळ: दुपारी २ ते रात्री ११
स्थळ: वीर सावरकर सभागृह, शिवाजी पार्क, मुंबई
प्रवेश: विनामूल्य आणि सर्वांसाठी खुला
.png "Videos"){kind=small}
