(फोटो सौजन्य- सोशल मीडिया)
Jailer 2 Trailer: सुपरस्टार रजनीकांत यांच्या ‘जेलर २’ या बहुप्रतिक्षित चित्रपटाची प्रेक्षक आतुरतेने वाट पाहत होते. अखेर या चित्रपटाचा हिंदी ट्रेलर प्रदर्शित झाला आहे. नेल्सन दिलीपकुमार दिग्दर्शित हा सिक्वेल पहिल्या भागापेक्षा अधिक अॅक्शन, थरार आणि मनोरंजनाने भरलेला असणार असल्याची झलक ट्रेलरमधून पाहायला मिळते. रजनीकांत पुन्हा एकदा मुथुवेल पांडियनच्या दमदार भूमिकेत दिसणार आहेत. हा चित्रपट १५ ऑक्टोबर रोजी चित्रपटगृहात प्रदर्शित होणार आहे.
सन पिक्चर्सने सोमवार, ५ ऑक्टोबर रोजी ‘जेलर २’चा हिंदी ट्रेलर रिलीज केला. चित्रपटाच्या प्रदर्शनाला अवघे काही दिवस बाकी असताना ट्रेलरमधून प्रेक्षकांना सिक्वेलमधील कलाकार आणि कथानकाची पहिली झलक पाहायला मिळाली आहे. ट्रेलरमध्ये अॅक्शनसोबतच नेल्सन दिलीपकुमार यांच्या खास डार्क ह्युमरचीही झलक पाहायला मिळते.
मुथुवेल पांडियन पुन्हा अॅक्शन मोडमध्ये
‘जेलर’च्या पहिल्या भागात निवृत्त तुरुंग अधिकारी मुथुवेल पांडियन यांच्या शांत आयुष्यात मुलाच्या बेपत्ता होण्यामुळे मोठा बदल घडतो. आता सिक्वेलमध्ये मुथुवेल पांडियन आणखी धोकादायक परिस्थितींचा सामना करताना दिसणार आहेत. ट्रेलरमध्ये रजनीकांत यांचा दमदार अंदाज, अॅक्शन सीक्वेन्स आणि त्यांच्या खास स्टाइलची झलक पाहायला मिळते.
स्टारकास्टमध्ये नव्या कलाकारांची भर
‘जेलर २’मध्ये रजनीकांत यांच्यासोबत एस. जे. सूर्या, मिथुन चक्रवर्ती, विद्या बालन, सूरज वेंजारामूडू, अण्णा राजन आणि जतीन सरना यांसारखे कलाकार दिसणार आहेत. रम्या कृष्णन, योगी बाबू, मिर्ना आणि ऋत्विक हे कलाकारही पुन्हा आपल्या भूमिकांमध्ये दिसणार आहेत.
खलनायिकेच्या भूमिकेने गाजलेल्या ज्येष्ठ अभिनेत्रीने घेतला वयाच्या ६५व्या वर्षी अखेरचा श्वास
मोहनलाल, शिव राजकुमार आणि जॅकी श्रॉफची खास झलक
‘जेलर २’च्या ट्रेलरमधील सर्वात लक्षवेधी भाग म्हणजे विशेष कलाकारांची एन्ट्री. शिव राजकुमार ‘नरसिंह’च्या भूमिकेत जबरदस्त स्लो-मोशन शॉटमध्ये दिसतात. तर मोहनलाल ‘मॅथ्यू’ या अंडरवर्ल्ड बॉसच्या भूमिकेत पुन्हा एकदा आपल्या खास अंदाजात एन्ट्री घेताना दिसतात.
जॅकी श्रॉफदेखील ‘क्यूपिड’च्या भूमिकेत परतले आहेत. ट्रेलरमध्ये ते हातात ग्लास घेऊन एका अंधाऱ्या खोलीत बसलेले दिसतात. या कलाकारांच्या एन्ट्रीमुळे चित्रपटाबद्दलची उत्सुकता आणखी वाढली आहे.
विद्या बालनचा रहस्यमय अंदाज
ट्रेलरमध्ये विद्या बालन साडीतील डॅशिंग आणि रहस्यमय अवतारात दिसते. एका दृश्यात ती डायनिंग टेबलवर रजनीकांत यांच्यासोबत धूम्रपान करत आणि गप्पा मारताना दिसते. तिची भूमिका नेमकी काय असणार, याबाबत मात्र अद्याप अधिकृत माहिती समोर आलेली नाही.
एस. जे. सूर्या साकारणार खलनायक?
एस. जे. सूर्या यांचीही ट्रेलरमध्ये दमदार झलक पाहायला मिळते. एका दृश्यात ते जेवताना स्नायपर सेटअपबाबत चर्चा करताना दिसतात. त्यामुळे चित्रपटात त्यांची भूमिका खलनायकाची किंवा प्रतिनायकाची असू शकते, अशी चर्चा सुरू झाली आहे.
शाहरुख खान आणि हृतिक रोशनच्या नावांचीही चर्चा
‘जेलर २’मध्ये काही मोठे स्पेशल अपिअरन्स असण्याची शक्यता आहे. मिळालेल्या माहितीनुसार, शाहरुख खान आणि हृतिक रोशन हे देखील चित्रपटात दिसू शकतात, अशी चर्चा आहे. मात्र त्यांच्या सहभागाबाबत अधिकृत पुष्टी झालेली नाही.
अनिरुद्ध रविचंद्रन यांच्या संगीताचीही ‘जेलर २’साठी उत्सुकता आहे. प्रमोशनदरम्यान त्यांच्या अल्बममधील चार गाणी प्रदर्शित करण्यात आली असून, त्यात नोरा फतेहीच्या ‘बिंदास’ या विशेष गाण्याचाही समावेश आहे. आता ट्रेलरनंतर रजनीकांत यांचा मुथुवेल पांडियन अवतार मोठ्या पडद्यावर पाहण्यासाठी चाहते उत्सुक आहेत. ‘जेलर २’ १५ ऑक्टोबर रोजी चित्रपटगृहात प्रदर्शित होणार आहे.
.png "Videos"){kind=small}
