सोमवार, 5 ऑक्टोबर 2026
सौजन्य फोटो - सोशल मिडीया
बंगळुरू : कन्नड मनोरंजनसृष्टीतील ज्येष्ठ अभिनेत्री ललिताम्मा यांचे वयाच्या ६५व्या वर्षी निधन झाले. नाटक, टीव्ही मालिका आणि चित्रपट अशा तिन्ही माध्यमांत आपल्या अभिनयाची वेगळी छाप पाडणाऱ्या ललिताम्मा यांच्या निधनाने कन्नड मनोरंजन आणि नाट्यविश्वावर शोककळा पसरली आहे. ‘सुंतरा गळी’ या चित्रपटातील सराई शारदे या खलनायिकेच्या भूमिकेमुळे त्या विशेष प्रसिद्ध झाल्या होत्या.
ललिताम्मा यांचे कन्नड रंगभूमीशी अनेक दशकांचे नाते होते. तब्बल ३५ वर्षे त्यांनी रंगभूमीवर काम केले. विविध नाटकांमधून साकारलेल्या व्यक्तिरेखांना त्यांनी आपल्या अभिनयातून वेगळी ओळख मिळवून दिली. रंगभूमीवरील याच प्रदीर्घ अनुभवाचा प्रभाव त्यांच्या टीव्ही आणि चित्रपटांमधील अभिनयातही दिसून आला.
रंगभूमीनंतर ललिताम्मा कन्नड टेलिव्हिजनवरील परिचित चेहरा बनल्या. ‘रंगोली’, ‘मांगल्य’ आणि ‘महामयी’ यांसारख्या लोकप्रिय मालिकांमध्ये त्यांनी महत्त्वाच्या भूमिका साकारल्या. सहाय्यक आणि चरित्र भूमिकांमधून त्यांनी घराघरांत आपली वेगळी ओळख निर्माण केली. अनेक वर्षे त्या विविध मालिकांमधून प्रेक्षकांच्या भेटीला येत राहिल्या.
चित्रपटसृष्टीत ललिताम्मा यांना सर्वाधिक ओळख मिळाली ती दर्शन दिग्दर्शित ‘सुंतरा गळी’ चित्रपटातील सराई शारदेच्या भूमिकेमुळे. खलनायिकेची ही भूमिका प्रेक्षकांच्या पसंतीस उतरली आणि त्यांच्या कारकिर्दीतील महत्त्वाची भूमिका ठरली. यानंतर त्यांनी ‘जोंधळी’, ‘लाइफू इश्टेने’, ‘वज्रकाया’, ‘पुत्र’ आणि ‘जॅकी’ यांसह अनेक कन्नड चित्रपटांमध्ये काम केले. प्रामुख्याने सहाय्यक आणि चरित्र भूमिका साकारत त्यांनी कन्नड चित्रपटसृष्टीत आपली स्वतंत्र ओळख निर्माण केली.
मिळालेल्या माहितीनुसार, ललिताम्मा गेल्या काही महिन्यांपासून वृद्धापकाळाशी संबंधित आजारांनी त्रस्त होत्या. त्यांच्या निधनाच्या सुमारे अडीच महिने आधी त्यांना स्ट्रोक आला होता. त्यानंतर बंगळुरू येथील अम्माना मडिलू ट्रस्ट येथे त्यांच्यावर उपचार सुरू होते. वृत्तानुसार, सकाळी साडेनऊच्या सुमारास त्यांनी अखेरचा श्वास घेतला. ललिताम्मा यांच्या निधनाची बातमी समोर आल्यानंतर कन्नड मनोरंजनसृष्टी आणि नाट्यविश्वातील कलाकारांनी शोक व्यक्त केला. रंगभूमीपासून टीव्ही आणि चित्रपटांपर्यंत आपल्या अभिनयाने वेगळी छाप पाडणाऱ्या या ज्येष्ठ अभिनेत्रीच्या निधनाने कलाविश्वाने एक अनुभवी कलाकार गमावला आहे.
