Dwidha Movie: ‘द्विधा’मध्ये रेणुका दफ्तरदार दिसणार एका वेगळ्या रूपात, पाहण्याचं ‘शास्त्र असतं ते’

Dwidha Movie: भाडिपामधून ‘शास्त्र असतं ते’ म्हणत घराघरात पोहचलेली अभिनेत्री रेणुका दफ्तरदार आता द्विधा चित्रपटातून एका वेगळ्या रूपात प्रेक्षकांसमोर येणार आहे. लवकरच चित्रपट प्रदर्शित होणार आहे.

• द्विधा चित्रपटात दिसणार रेणुका दफ्तरदार 

• वेगळ्या भूमिकेत येणार प्रेक्षकांच्या समोर 

• ४ सप्टेंबरला होणार चित्रपट महाराष्ट्रात प्रदर्शित 

Dwidha Movie: ‘शास्त्र असतं ते…’ हे वाक्य ऐकलं की आपल्या चेहऱ्यावर हसू येतं आणि आठवते ती अनी आणि जुईची आई. आपल्या घरातलीच एक आई वाटावी, अशी सहजसुंदर भूमिका साकारणाऱ्या अभिनेत्री रेणुका दफ्तरदार यांनी आजवर आपल्या अभिनयातून प्रेक्षकांच्या मनात खास स्थान निर्माण केलं आहे. 

‘दोघी’, ‘बाधा’, ‘वळू’, ‘मन फकिरा’, ‘अनन्या’, ‘जग्गू आणि ज्युलिएट’ यांसारख्या चित्रपटांसह विविध नाटकं  आणि चित्रपटांमधून त्या प्रेक्षकांच्या भेटीला आल्या आहेत. आता रेणुका दफ्तरदार ‘द्विधा’ या आगामी चित्रपटातून एका वेगळ्या रूपात प्रेक्षकांसमोर येणार आहेत. चित्रपटाची कथा, पटकथा, दिग्दर्शन आणि संकलन निलेश भास्कर नाईक यांचे असून, निर्मिती विदुला रमेश आजगावकर यांनी केली आहे. ४ सप्टेंबरला ‘द्विधा’ महाराष्ट्रातील चित्रपटगृहांमध्ये प्रदर्शित होणार आहे.

Dwidha Movie: रिअल ते रील… ‘द्विधा’मध्ये दिसणार मायलेकीचं खास बॉन्डिंग; मानसी कुलकर्णींची लेक ओवी करणार अभिनयात पदार्पण

बेबी आत्याच्या रुपात येणार समोर 

‘द्विधा’मध्ये रेणुका दफ्तरदार ‘बेबी आत्या’ची व्यक्तिरेखा साकारत आहेत. प्रेमळ, समजूतदार आणि मायेने भरलेली ‘बेबी आत्या’ कुटुंबाचा भावनिक आधारस्तंभ आहे. पतीच्या निधनानंतर एकटं आयुष्य जगणाऱ्या ‘बेबी आत्या’ साठी तिचा भाऊ हाच सर्वात मोठा आधार आहे. भावासोबत खंबीरपणे उभं राहत ती घराची आणि कुटुंबाची मनापासून काळजी घेते. स्वतःच्या दुःखांना मनात दडवूनही ती कुटुंबाला एकत्र ठेवण्यासाठी कायम खंबीरपणे उभी राहते. चित्रपटात त्यांच्यासोबत सतीश पुळेकर, मानसी कुलकर्णी निमिष कुलकर्णी, आस्ताद काळे, तन्वी कुलकर्णी, पुष्कर सराड, मनोज कोल्हटकर, भूषण कडू, प्रफुल्ल सावंत, हेमांगी वेळणकर आणि ओवी तानवडे यांच्या महत्त्वपूर्ण भूमिका आहेत.

काय म्हणाल्या रेणुका दफ्तरदार 

या व्यक्तिरेखेबद्दल बोलताना रेणुका दफ्तरदार यांनी सांगितलं की,  ‘आजवर साकारलेल्या विविध भूमिकांपेक्षा ‘द्विधा’मधील ‘बेबी आत्या’ ही व्यक्तिरेखा त्यांच्या अभिनयाची एक वेगळी बाजू प्रेक्षकांसमोर आणणार आहे. मायेच्या ऊबेसोबतच आयुष्याने दिलेल्या दुःखांना सामोरं जाणारी, शांतपणे कुटुंबाचा भार पेलणारी आणि नात्यांना जपणारी ही आत्या ‘द्विधा’च्या कथानकातील महत्त्वाची भावनिक कडी ठरणार आहे’. आतापर्यंत रेणुका दफ्तरदार यांना प्रेक्षकांनी नेहमी हसवताना आणि आईच्या भूमिकेत पाहिलं आहे. त्यांचं कॉमेडी टायमिंग अत्यंत उत्तम आहे. पण पहिल्यांदाच अशा स्वरूपाच्या भूमिकेत प्रेक्षक रेणुका दफ्तरदार यांना पाहणार आहेत. त्यामुळे त्यांच्या चाहत्यांनाही आता उत्सुकता लागून राहिली आहे. 

Dwidha: ‘द्विधा’ चित्रपटाच्या ट्रेलरचे दिमाखदार अनावरण, बाप-लेकीच्या नात्यातील भावनिक द्वंद्वाची हृदयस्पर्शी झलक