(फोटो सौजन्य- सोशल मीडिया)
Gondhal Movie: मराठी चित्रपट ‘गोंधळ’ला प्रेक्षकांकडून मिळणारं प्रेम पुन्हा एकदा पाहायला मिळालं. पुण्यात आयोजित करण्यात आलेल्या चित्रपटाच्या स्पेशल स्क्रीनिंगला प्रेक्षकांनी अक्षरशः तुफान गर्दी केली. थिएटरची आसनक्षमता सुमारे ३०० असताना तब्बल ६५० हून अधिक प्रेक्षक दाखल झाल्याने काही काळ परिस्थिती नियंत्रणाबाहेर गेली.
आंतरराष्ट्रीय चित्रपट समीक्षक संघटना फिप्रेस्की (FIPRESCI) यांच्या वतीने या विशेष स्क्रीनिंगचं आयोजन करण्यात आलं होतं. ‘फर्स्ट कम, फर्स्ट सर्व्हड’ पद्धतीने प्रवेश देण्यात येणार असल्याची माहिती असल्याने महाराष्ट्राच्या विविध भागांतून प्रेक्षक पुण्यात आले होते.
नगर, औरंगाबाद, कोल्हापूर, सातारा, सांगली यांसह अनेक शहरांतून ‘गोंधळ’ पाहण्यासाठी प्रेक्षक दाखल झाले. मात्र, थिएटरमध्ये केवळ ३०० आसनांची व्यवस्था असताना ६५० हून अधिक जण पोहोचल्याने थिएटरबाहेर मोठी गर्दी झाली.
प्रेक्षकांची संख्या वाढल्याने काही काळ थिएटरबाहेर गोंधळाची परिस्थिती निर्माण झाली. सुमारे ८० ते ९० प्रेक्षकांना जागेअभावी चित्रपट न पाहताच माघारी फिरावं लागलं. यावेळी काही प्रेक्षक आणि सिक्युरिटीमध्ये वादावादीही झाली.
मात्र, फिप्रेस्कीचे सदस्य नरेंद्र आणि त्यांच्या टीमने मध्यस्थी करत परिस्थिती शांततेत हाताळली.
या सगळ्या गोंधळानंतरही ‘गोंधळ’चं स्पेशल स्क्रीनिंग यशस्वीपणे पार पडलं. अभिनेता जितेंद्र जोशी यांच्यासह काही कलाकारांनीही स्क्रीनिंगला उपस्थिती लावली आणि प्रेक्षकांसोबत चित्रपटाचा आनंद घेतला.
स्क्रीनिंगनंतर प्रेक्षकांकडून चित्रपटाला सकारात्मक प्रतिसाद मिळाला. विशेष म्हणजे, ‘गोंधळ’ पुन्हा प्रदर्शित करावा, अशी मागणीही अनेक प्रेक्षकांनी केली.
या संपूर्ण प्रकाराबाबत चित्रपटाच्या दिग्दर्शकांनी प्रेक्षकांची दिलगिरी व्यक्त केली. ते म्हणाले की, दूरदूरहून येऊनही काही प्रेक्षकांना चित्रपट पाहता आला नाही, याचं वाईट वाटतं. ज्या प्रेक्षकांना ‘गोंधळ’ पाहता आला नाही, त्यांच्यासाठी पुन्हा स्क्रीनिंग आयोजित करण्याचं आश्वासन त्यांनी दिलं.
तसंच, ‘गोंधळ’च्या रिरिलीजचाही विचार सुरू असल्याचं त्यांनी सांगितलं. त्यामुळे चित्रपटाच्या चाहत्यांना लवकरच पुन्हा मोठ्या पडद्यावर ‘गोंधळ’ पाहण्याची संधी मिळू शकते.
बहुभाषिक प्रेक्षकांच्या भेटीला येणार ‘गोंधळ’
दरम्यान, ‘गोंधळ’ आता केवळ मराठी भाषेपुरता मर्यादित राहणार नाही. हा चित्रपट तमिळ, तेलुगू, कन्नड, मल्याळम, हिंदी आणि इंग्रजी भाषांमध्येही प्रदर्शित होणार आहे. त्यामुळे ‘गोंधळ’ची कथा आता देशभरातील प्रेक्षकांपर्यंत पोहोचणार आहे.
स्पेशल स्क्रीनिंगला मिळालेला हा अभूतपूर्व प्रतिसाद पाहता, आगामी काळात ‘गोंधळ’च्या बहुभाषिक प्रदर्शनाकडेही प्रेक्षकांचं लक्ष लागलं आहे.
.png "Videos"){kind=small}
