( फोटो सौजन्य- सोशल मिडिया)
Maitreya Movie: मराठी सिनेसृष्टीत आगामी ‘मैत्रेया’ या चित्रपटाची सध्या चर्चा सुरू आहे. मैत्रीच्या नात्यातील बॉण्डिंग आणि त्यापलीकडे दडलेल्या भावनांचा वेध घेणाऱ्या या चित्रपटाचे नवे पोस्टर नुकतेच प्रदर्शित करण्यात आले आहे. याआधीच्या पोस्टरमध्ये कलाकारांचे चेहरे समोर आले नव्हते. मात्र, नव्या पोस्टरमधून समर, आयुषी, स्काय आणि रुची या चार प्रमुख व्यक्तिरेखांची पहिली झलक प्रेक्षकांसमोर आली आहे.
नव्या पोस्टरमध्ये चौघांच्या चेहऱ्यावरील आनंद आणि त्यांच्यातील सहज नातं लक्ष वेधून घेत आहे. एकमेकांमधील जवळीक, मस्ती आणि मैत्रीचा सुंदर बॉण्ड पोस्टरमधून जाणवतो. पोस्टरसोबत ऐकू येणारे ‘मैत्रीच्या पल्याड हा मैत्रेया…’ हे शब्दही उत्सुकता वाढवत आहेत.
या टॅगलाइनमधून ‘मैत्रेया’ हा केवळ मैत्रीवर आधारित चित्रपट नसून, मैत्रीच्या पलीकडे जाऊन नात्यांमधील भावनिक गुंतागुंत उलगडणारा असल्याचे संकेत मिळतात. मैत्री, जवळीक आणि त्यातून निर्माण होणाऱ्या भावनांचा प्रवास चित्रपटात नेमका कसा मांडला आहे, हे पाहणे उत्सुकतेचे ठरणार आहे.
‘काकण’नंतर लेखिका-दिग्दर्शिका क्रांती रेडकर वानखेडे पुन्हा एकदा नव्या प्रेमकथेसह प्रेक्षकांच्या भेटीला येत आहेत. ‘मैत्रेया’मधील कलाकारांचे लूक आधुनिक आणि जेन-झी पिढीला साजेसे असले, तरी चित्रपटाची कथा आणि पार्श्वभूमी मध्यमवर्गीय मुळांशी जोडलेली आहे.
त्यामुळे मॉडर्न दिसणाऱ्या या व्यक्तिरेखांच्या आयुष्यातील नाती, भावना आणि अनुभव प्रेक्षकांना आपलेसे वाटण्याची शक्यता आहे. आधुनिक जीवनशैली आणि भावनिक नात्यांचा सुंदर मेळ या चित्रपटातून पाहायला मिळणार आहे.
‘मैत्रेया’ची आणखी एक महत्त्वाची बाजू म्हणजे संगीतकार पंकज पाडघन यांचे संगीत. चित्रपटाच्या कथेला आणि भावविश्वाला साजेसे संगीत या चित्रपटाच्या अनुभवात महत्त्वाची भूमिका बजावणार आहे.
क्रांती रेडकर वानखेडे यांनी सांगितले की, समर, आयुषी, स्काय आणि रुची यांच्यातील नातं ही चित्रपटाच्या कथेची महत्त्वाची बाजू आहे. मैत्रीचं नातं वरकरणी सहज वाटत असलं, तरी त्यात अनेक भावना आणि अनुभव दडलेले असतात. याच नात्याचा वेगळा प्रवास ‘मैत्रेया’मधून प्रेक्षकांसमोर आणण्याचा प्रयत्न करण्यात आला आहे.
निर्माते मनोज खळतकर यांच्या मते, ‘मैत्रेया’ हा केवळ तरुणाईला डोळ्यांसमोर ठेवून बनवलेला चित्रपट नाही. आजच्या पिढीच्या भावविश्वासोबतच कुटुंबातील प्रत्येक सदस्याला आपलासा वाटेल, अशा पद्धतीने चित्रपटाची कथा मांडण्यात आली आहे.
मनोरंजनासोबतच नात्यांकडे पाहण्याचा सुंदर आणि सहज दृष्टिकोन या चित्रपटातून मांडण्यात आला आहे. त्यामुळे तरुणांसोबतच संपूर्ण कुटुंबाने हा चित्रपट एकत्र पाहावा, अशी निर्मात्यांची इच्छा आहे.
‘मैत्रेया’चे सहनिर्माते अमन खळतकर आहेत. येत्या २३ ऑक्टोबरला हा चित्रपट प्रेक्षकांच्या भेटीला येणार आहे.
.png "Videos"){kind=small}
