
(फोटो सौजन्य- सोशल मीडिया)
Jijai Movie: मराठी चित्रपटसृष्टीत सध्या आगामी चित्रपटांची जोरदार चर्चा सुरू आहे. अशातच झी स्टुडिओज प्रस्तुत ‘जिजाई’ या आगामी मराठी चित्रपटाचा ट्रेलर नुकताच प्रेक्षकांच्या भेटीला आला असून, त्याला चांगला प्रतिसाद मिळत आहे.
अभिनेत्री रिंकू राजगुरू मध्यवर्ती भूमिकेत असलेल्या या चित्रपटाच्या ट्रेलरने केवळ प्रेक्षकांचेच नव्हे, तर बॉलिवूडमधील अनेक दिग्गज कलाकारांचेही लक्ष वेधून घेतले आहे. विशेष म्हणजे, बॉलिवूडकरांनी सोशल मीडियावर ट्रेलर शेअर करत संपूर्ण चित्रपटाच्या टीमचे कौतुक केले आहे.
अभिनेता रितेश देशमुख, कुमुद मिश्रा, के. के. मेनन, निवेदिता भट्टाचार्य, दिग्दर्शक सुरेश त्रिवेणी, वासन बाला, स्वानंद किरकिरे, मनीष चौधरी आणि सिद्धार्थ जाधव यांच्यासह अनेक कलाकारांनी ‘जिजाई’च्या ट्रेलरला पसंती दिली आहे. या मान्यवरांनी ट्रेलर शेअर करत चित्रपटाच्या संपूर्ण टीमचे अभिनंदन केले असून, आगामी चित्रपटासाठी शुभेच्छाही दिल्या आहेत. बॉलिवूडमधील या दिग्गजांकडून मिळालेली कौतुकाची थाप ‘जिजाई’च्या टीमसाठी नक्कीच विशेष ठरली आहे.
स्त्रीची जिद्द आणि आत्मसन्मानाची कहाणी; रिंकू राजगुरूच्या भूमिकेने वेधले लक्ष
‘जिजाई’च्या ट्रेलरमध्ये एका स्त्रीची जिद्द, आत्मसन्मान आणि प्रतिकूल परिस्थितीशी दोन हात करण्याची ताकद पाहायला मिळते. आयुष्यातील संघर्षांना सामोरे जात स्वतःचे अस्तित्व टिकवून ठेवणाऱ्या स्त्रीची प्रभावी कथा या चित्रपटातून उलगडणार असल्याची झलक ट्रेलरमध्ये दिसते. रिंकू राजगुरूच्या भूमिकेबद्दलही प्रेक्षकांमध्ये उत्सुकता निर्माण झाली आहे. त्यामुळे चित्रपटाच्या प्रदर्शनापूर्वीच ‘जिजाई’ची चर्चा रंगू लागली आहे.
या चित्रपटाचे दिग्दर्शन तृशांत फुलवंती इंगळे यांनी केले असून, झी स्टुडिओज आणि कोकोनट फिल्म्सने निर्मिती केली आहे. नुपूर गुहा आणि तुषार राऊत हे या चित्रपटाचे सहनिर्माते आहेत. रिंकू राजगुरूसोबत किशोर कदम, मयूर मोरे, रोहित कोकाटे आणि सानिका दिवाण हे कलाकारही महत्त्वपूर्ण भूमिकांमध्ये दिसणार आहेत. येत्या २० नोव्हेंबरला ‘जिजाई’ चित्रपटगृहांमध्ये प्रदर्शित होणार असून, या चित्रपटाला प्रेक्षकांचा कसा प्रतिसाद मिळतो, हे पाहणे औत्सुक्याचे ठरणार आहे.