(फोटो सौजन्य- सोशल मीडिया)
ulhas kamathe: सोशल मीडियावर ‘चिकन लेग पीस’चे व्हिडीओ बनवून लोकप्रिय झालेले इन्फ्लुएन्सर उल्हास कामटे सध्या चर्चेत आले आहेत. त्यांच्या निधनाची बातमी सोशल मीडियावर वेगाने व्हायरल होत होती. हृदयविकाराच्या झटक्याने त्यांचे निधन झाल्याचा दावा केला जात होता. मात्र, आता स्वतः उल्हास कामटे यांनी इन्स्टाग्रामवर व्हिडीओ शेअर करत या वृत्ताचे खंडन केले आहे. आपण पूर्णपणे ठीक आणि जिवंत असल्याचे त्यांनी स्पष्ट केले आहे.
सोशल मीडियावर एक व्हिडीओ मोठ्या प्रमाणात शेअर केला जात होता. या व्हिडीओमध्ये उल्हास कामटे यांची प्रकृती बिघडल्याचे आणि त्यांना रुग्णालयात नेले जात असल्याचे दिसत होते. या व्हिडीओमुळे त्यांना हृदयविकाराचा झटका आल्याची आणि त्यांचे निधन झाल्याची चर्चा सुरू झाली. अनेकांनी त्यांच्या निधनाबद्दल पोस्टही शेअर केल्या. मात्र, या बातम्यांमध्ये कोणतेही तथ्य नसल्याचे आता स्वतः उल्हास यांनी स्पष्ट केले आहे.
‘जड-फूंक’ चित्रपटाच्या प्रीमियरवेळी आला होता पॅनिक अटॅक
उल्हास कामटे यांनी व्हायरल व्हिडीओमागील नेमकी घटना सांगितली आहे. त्यांनी शेअर केलेल्या व्हिडीओमध्ये त्या दिवशी उपस्थित असलेले काही लोकही दिसत आहेत. त्यांच्या माहितीनुसार, हा प्रसंग ‘जड-फूंक’ या चित्रपटाच्या प्रीमियरदरम्यान घडला होता.
चित्रपट पाहिल्यानंतर भयावह दृश्यांमुळे उल्हास कामटे यांना अँक्झायटी अटॅक म्हणजेच पॅनिक अटॅक आला आणि ते काही काळ बेशुद्ध झाले. त्यानंतर त्यांना तातडीने कोकिलाबेन रुग्णालयात दाखल करण्यात आले. डॉक्टरांनी तपासणी केल्यानंतर काही तासांतच त्यांना घरी जाण्याची परवानगी दिली होती.
‘जड-फूंक’ चित्रपटाच्या टीममधील एका सदस्यानेही त्या दिवसाचा प्रसंग सांगितला. उल्हास कामटे यांनी सुरुवातीला भयपट पाहण्यास नकार दिला होता. मात्र, विनंती केल्यानंतर ते प्रीमियरला उपस्थित राहिले. चित्रपटातील भीतीदायक दृश्ये पाहिल्यानंतर त्यांना पॅनिक अटॅक आला आणि ते बेशुद्ध झाले. त्यानंतर दिग्दर्शक राजन वर्मा यांच्यासह चित्रपटाच्या टीमने त्यांना रुग्णालयात नेले.
डॉक्टरांनी तपासणी केल्यानंतर त्यांची प्रकृती ठीक असल्याचे सांगितले आणि काही तासांत त्यांना डिस्चार्ज देण्यात आला. त्यामुळे सध्या सोशल मीडियावर त्यांच्या निधनाबाबत पसरत असलेल्या बातम्या खोट्या असल्याचे स्पष्ट झाले आहे.
उल्हास कामटे यांनी स्वतः व्हिडीओ शेअर करून चाहत्यांमधील संभ्रम दूर केला आहे. त्यामुळे ‘चिकन लेग पीस’ फेम उल्हास कामटे यांच्या निधनाच्या अफवांवर विश्वास न ठेवण्याचे आवाहन केले जात आहे.
.png "Videos"){kind=small}
