(फोटो सौजन्य- सोशल मीडिया)
Shah Rukh Khan Birthday:बॉलिवूडचा किंग खान अर्थात अभिनेता शाहरुख खान आज, २ नोव्हेंबर रोजी आपला ६१ वा वाढदिवस साजरा करत आहे. शाहरुखचा वाढदिवस हा त्याच्या चाहत्यांसाठी एखाद्या उत्सवापेक्षा कमी नसतो. दरवर्षी देशभरातून चाहते मुंबईतील वांद्रे येथील बॅण्डस्टॅण्ड परिसरातील त्याच्या ‘मन्नत’ या निवासस्थानाबाहेर मोठ्या संख्येने गर्दी करतात. यंदाही शाहरुखच्या वाढदिवसानिमित्त ‘मन्नत’बाहेर जय्यत तयारी सुरू आहे. विशेष म्हणजे, यावेळी त्याच्या घराबाहेर लावण्यात आलेल्या एका मोठ्या स्क्रीनने चाहत्यांचे लक्ष वेधून घेतले आहे.
शाहरुख खानच्या ‘मन्नत’ बंगल्याबाहेर एक मोठी स्क्रीन लावण्यात आली आहे. त्यामुळे या स्क्रीनवरून चाहत्यांना काही खास सरप्राइज मिळणार का, याबद्दल चर्चा सुरू झाली आहे. शाहरुखच्या आगामी ‘किंग’ चित्रपटाशी या स्क्रीनचा संबंध असल्याची शक्यताही व्यक्त केली जात आहे.
दरम्यान, दिग्दर्शक सिद्धार्थ आनंद याने ‘एक्स’ या सोशल मीडिया प्लॅटफॉर्मवर एक पोस्ट शेअर केली आहे. शाहरुखच्या एका फॅन पेजने शेअर केलेला व्हिडीओदेखील सोशल मीडियावर व्हायरल होत आहे.
शाहरुखच्या वाढदिवसाच्या पार्श्वभूमीवर ‘मन्नत’बाहेरील सुरक्षा व्यवस्थाही वाढवण्यात आली आहे. आपल्या लाडक्या अभिनेत्याची एक झलक पाहण्यासाठी सोमवारी सकाळपासूनच चाहत्यांनी घराबाहेर गर्दी केली आहे. गर्दीवर नियंत्रण ठेवण्यासाठी मुंबई पोलिसांचे जवान तैनात करण्यात आले आहेत. तसेच परिसरातून जाणाऱ्या वाहनांची तपासणी करतानाही पोलीस दिसत आहेत.
दरवर्षी शाहरुखच्या वाढदिवशी चाहते त्याला शुभेच्छा देण्यासाठी आणि त्याची एक झलक पाहण्यासाठी ‘मन्नत’बाहेर जमा होतात. चाहत्यांसाठी हा दिवस खास ठरतो. शाहरुखही अनेकदा आपल्या घराच्या बाल्कनीत येऊन चाहत्यांना अभिवादन करतो. त्यामुळे यंदा किंग खान चाहत्यांना कोणतं सरप्राइज देणार, याकडे सर्वांचे लक्ष लागले आहे.
.png "Videos"){kind=small}
