(फोटो सौजन्य- सोशल मीडिया)
King Movie Song: बॉलिवूडचा किंग शाहरुख खान आज आपला ६१ वा वाढदिवस साजरा करत आहे. या खास दिवशी त्याने चाहत्यांना एक खास भेट दिली आहे. शाहरुखच्या आगामी ‘किंग’ चित्रपटातील पहिलं गाणं ‘तू मिल जाए’ मध्यरात्री प्रदर्शित करण्यात आलं. हे गाणं रिलीज होताच सोशल मीडियावर चाहत्यांच्या प्रतिक्रियांचा वर्षाव सुरू झाला आहे. शाहरुखच्या नव्या अंदाजाची आणि दीपिका पदुकोणसोबतच्या त्याच्या केमिस्ट्रीची सध्या जोरदार चर्चा रंगली आहे.
‘डंकी’ चित्रपटानंतर जवळपास तीन वर्षांनी शाहरुख खान मोठ्या पडद्यावर पुनरागमन करण्यासाठी सज्ज झाला आहे. त्याचा आगामी ‘किंग’ चित्रपट गेल्या काही काळापासून चर्चेत आहे. आता वाढदिवसाचं औचित्य साधत निर्मात्यांनी या चित्रपटातील पहिलं गाणं प्रेक्षकांच्या भेटीला आणलं आहे.
‘तू मिल जाए’ या गाण्यात शाहरुख खानचा रोमँटिक अंदाज पाहायला मिळतो. गाण्याच्या सुरुवातीपासूनच त्याची खास शैली लक्ष वेधून घेते. अभिनेत्री दीपिका पदुकोणसोबतची त्याची केमिस्ट्रीही प्रेक्षकांना भावत आहे. ही जोडी पुन्हा एकदा मोठ्या पडद्यावर एकत्र दिसणार असल्याने चाहत्यांमध्ये उत्सुकता आहे.
रोमान्ससोबत अॅक्शनचाही तडका
या गाण्यात केवळ रोमान्सच नाही, तर अॅक्शनचीही झलक पाहायला मिळते. रोमँटिक दृश्यांसोबतच शाहरुख धोकादायक फाईट सीक्वेन्समध्ये दिसतो. काही दृश्यांमध्ये तो शस्त्रांच्या तस्करीशी संबंधित प्रसंगांतही दिसत असल्याचं गाण्यातून समोर येतं. विशेष म्हणजे, शाहरुखचा शर्टलेस लूकही या गाण्यात पाहायला मिळतो. त्यामुळे त्याच्या फिटनेसचीही चर्चा सुरू झाली आहे.
सुहाना खानसोबत पहिल्यांदाच मोठ्या पडद्यावर
‘किंग’ चित्रपटाचं आणखी एक खास वैशिष्ट्य म्हणजे या चित्रपटाचं दिग्दर्शन सिद्धार्थ आनंद करत आहेत. या चित्रपटातून शाहरुख खान पहिल्यांदाच आपली मुलगी सुहाना खानसोबत मोठ्या पडद्यावर झळकणार आहे. सुहानासाठीही हा पहिला थिएटरमध्ये प्रदर्शित होणारा चित्रपट ठरणार आहे.
या मल्टीस्टारर चित्रपटात शाहरुख आणि दीपिका यांच्यासोबत अभिषेक बच्चन, अनिल कपूर, जॅकी श्रॉफ, राणी मुखर्जी आणि राघव जुयाल यांच्याही महत्त्वाच्या भूमिका आहेत.
सिद्धार्थ आनंद दिग्दर्शित ‘किंग’ हा चित्रपट २४ डिसेंबर रोजी चित्रपटगृहांमध्ये प्रदर्शित होणार आहे. शाहरुखचा रोमँटिक अंदाज, अॅक्शन सीन्स आणि दमदार कलाकारांची फळी यामुळे या चित्रपटाबद्दल प्रेक्षकांमध्ये आतापासूनच उत्सुकता निर्माण झाली आहे.
.png "Videos"){kind=small}
