(फोटो सौजन्य-सोशल मीडिया)
Aai Tulja Bhavani Serial: कलर्स मराठीवरील लोकप्रिय ‘आई तुळजाभवानी’ मालिकेत सध्या प्रेक्षकांना एक अनोखा सामना पाहायला मिळत आहे. पार्वतीमातेला तिच्या तुळजाई अवतारात भेटण्यासाठी आलेल्या बालगणेश आणि कार्तिकेय यांच्यातील वाद आता एका महत्त्वाच्या वळणावर पोहोचला आहे. दोघांमध्ये श्रेष्ठ कोण, हे ठरवण्यासाठी तुळजाईने त्यांच्यासमोर तीन परीक्षा ठेवलेल्या आहेत.
बालगणेश आणि कार्तिकेय यांच्यातील वाद मिटवण्यासाठी तुळजाईने शक्ती, युक्ती आणि भक्ती अशा तीन परीक्षांचे आव्हान दिले आहे. या तीन परीक्षा जो जिंकेल, त्याला दैवी ‘त्रिदल राजदंड’ मिळणार आहे.
बालतुळजाईच्या दैवी अवतारात तिच्या हातातील तेजोवलयातून शक्तीचा राजदंड, युक्तीचे चक्र आणि भक्तीचे सुवर्णकमळ प्रकट होतात. ही तिन्ही दैवी चिन्हे एकत्र येऊन ‘त्रिदल राजदंडा’चे रूप धारण करतात. या राजदंडाच्या दिव्य प्रकाशाने संपूर्ण राजवाडा उजळून निघतो.
कार्तिकेयची शक्तीची तयारी, तर गणेश शांत
या महापरीक्षेसाठी कार्तिकेय आक्रमकपणे तयारी करत आहे. अचूक लक्षभेदाचा सराव करण्यासोबतच तो गावातील बलशाली आणि शक्तिशाली सवंगड्यांनाही आपल्या बाजूने गोळा करत आहे.
दुसरीकडे बालगणेश मात्र अत्यंत शांतपणे आणि निखळ भावनेने या स्पर्धेकडे पाहत आहे. त्यामुळे शक्ती आणि शांतता यांच्यातील हा सामना नेमका कोणत्या वळणावर जाणार, याची उत्सुकता वाढली आहे.
गणेश आणि कार्तिकेय यांच्यातील या स्पर्धेमुळे गावातील लोकही दोन गटांत विभागले गेले आहेत. तारा आणि पद्मा यांच्यातही आपल्या लाडक्या देवासाठी चुरस निर्माण झाली आहे. त्यामुळे मालिकेतील हा दैवी सामना आता गावातील वातावरणही बदलताना दिसत आहे.
मात्र, या स्पर्धेच्या आडून एक मोठं असुरी षड्यंत्रही रचलं जात आहे. शुक्राचार्य आणि भुजंग यांनी महिषासुराला मुक्त करण्यासाठी नवा डाव आखला आहे. त्यामुळे बालगणेश आणि कार्तिकेयच्या या स्पर्धेसोबतच असुरांचा कटही महत्त्वाचा ठरणार आहे.
‘त्रिदल राजदंडा’चा मानकरी कोण?
शक्ती, युक्ती आणि भक्तीच्या या तीन कठीण परीक्षा पार करून ‘त्रिदल राजदंडा’चा खरा मानकरी कोण ठरणार? बालगणेश आणि कार्तिकेय यांच्यातील या स्पर्धेचा निकाल काय लागणार? तसेच बालगणेशाच्या भक्तांना जाळ्यात ओढण्याचा असुरांचा डाव यशस्वी होणार की भगवान महादेव तुळजाईच्या भक्तांच्या रक्षणासाठी नवी लीला घडवणार, हे पाहणं महत्त्वाचं ठरणार आहे.
या सगळ्या प्रश्नांची उत्तरं मालिकेच्या आगामी भागात मिळणार आहेत. ‘आई तुळजाभवानी’ दररोज रात्री ८.५० वाजता फक्त कलर्स मराठीवर पाहता येणार आहे.
.png "Videos"){kind=small}
