
(फोटो सौजन्य- सोशल मीडिया)
Jay Jay Swami Samarth: कलर्स मराठीवरील ‘जय जय स्वामी समर्थ’ ही मालिका सध्या रंजक वळणावर आली आहे. मालिकेत स्वामींच्या भक्तीचा मार्ग नेहमीच श्रद्धा, संयम आणि विश्वासाची परीक्षा पाहणारा ठरला आहे. मात्र, जेव्हा संकट आपल्या जवळच्या माणसावर येतं, तेव्हा श्रद्धेवरचा विश्वास टिकवणं किती कठीण असतं, याची प्रचिती मालिकेच्या आगामी भागात प्रेक्षकांना पाहायला मिळणार आहे.
शंकरला तुरुंगात डांबून त्याचा अनन्वित छळ केला जात आहे. अशा परिस्थितीत त्याला भेटायला आलेली रुही त्याची अवस्था पाहून व्याकूळ होते. लग्नानंतरचा पहिलाच पाडवा आणि तोही पतीपासून दूर, तुरुंगाच्या चार भिंतींमध्ये साजरा करण्याची वेळ तिच्यावर आली आहे. तरीही या कठीण प्रसंगात रुही शंकरसोबत तुरुंगातच पाडवा साजरा करण्याचा प्रयत्न करते. मात्र, तिचा हा प्रयत्न अपयशी ठरतो.
मार्तंडचं स्वामींना थेट आव्हान
दुसरीकडे, शंकरच्या अटकेने मार्तंड आणि संपत यांचा उन्माद वाढला आहे. शंकरच्या अटकेचा आनंद साजरा करत ते गावोगावी दवंडी पिटून स्वामींच्या भक्तीविरोधात वातावरण निर्माण करण्याचा प्रयत्न करतात. एवढंच नाही, तर स्वामींच्या भक्तांची संख्या कमी झाल्याचा दावा करत मार्तंड त्यांच्यासमोर आपल्या नव्या भक्तांची यादीही सादर करतो.
मार्तंड आता शंकर आणि रुहीच्या नात्याला स्वामींनी दिलेल्या पाठिंब्यालाच आव्हान देतो. त्यांच्या प्रेमाची आणि नात्याची परीक्षा घेण्याचं तो ठरवतो. दिवाळीचा प्रकाश स्वामींसाठी अंधकारमय ठरेल, असं म्हणत तो स्वामींच्या श्रद्धेला आव्हान देतो. मात्र, या सगळ्या घडामोडींदरम्यान स्वामींचा आत्मविश्वास अढळ आहे. भक्ती ही केवळ भक्तांची संख्या मोजण्यात नसून श्रद्धेच्या सामर्थ्यात असते, हे स्वामी आपल्या कृतीतून कसं दाखवणार, याची उत्सुकता आहे.
शंकरच्या अटकेने खचलेल्या रुहीला स्वामी पुन्हा एकदा विश्वासाचा अर्थ समजावून सांगतात. संकट कितीही मोठं असलं, तरी गुरूंवरचा विश्वास डळमळू द्यायचा नसतो, हे ते तिला पटवून देतात. स्वामींच्या या शिकवणीनंतर रुही नव्या आशेने पाडव्याच्या तयारीला लागते.
मात्र, शंकर तुरुंगात असताना रुही त्याच्यासोबत पहिला पाडवा कसा साजरा करणार? शंकर-रुहीच्या नात्याची परीक्षा आणि मार्तंडने स्वामींसमोर उभं केलेलं आव्हान यामुळे कथानकाला कोणतं नवं वळण मिळणार? मार्तंडच्या कपटनीतीला स्वामी कशा प्रकारे उत्तर देणार, हे पाहणं औत्सुक्याचं ठरणार आहे.
‘जय जय स्वामी समर्थ’ ही मालिका दररोज रात्री ८.१० वाजता कलर्स मराठीवर पाहायला मिळते.