(फोटो सौजन्य- सोशल मीडिया)
Purva Kaushik: दिवाळी म्हटलं की डोळ्यांसमोर येतात ते लखलखते दिवे, आकाशकंदील, फटाक्यांची आतषबाजी, घराघरांतून दरवळणारा फराळाचा सुगंध आणि कुटुंबीयांसोबत साजरे केलेले आनंदाचे क्षण. प्रत्येकाच्या दिवाळीच्या आठवणी खास असतात. बालपणी मित्रमैत्रिणींसोबत किल्ला बनवण्यापासून ते आईच्या हातच्या फराळाचा आस्वाद घेण्यापर्यंत अनेक आठवणी मनात घर करून असतात. झी मराठीवरील ‘दीपज्योती’ या मालिकेत ज्योतीची भूमिका साकारणारी अभिनेत्री पूर्वा कौशिक हिच्याही दिवाळीच्या अनेक गोड आठवणी आहेत. बालपणीची धमाल, किल्ला बनवण्याची मजा, आईच्या हातचा फराळ आणि आज कलाकार म्हणून सेटवर अनुभवायला मिळणारी दिवाळी, अशा अनेक गोष्टी तिने खास गप्पांमध्ये सांगितल्या.
पूर्वा सांगते, “सर्वांना दिवाळीच्या खूप खूप शुभेच्छा! मी अंबरनाथला राहते आणि मुळची मुंबई-ठाण्याची आहे. लहानपणी माझी दिवाळी घरीच साजरी व्हायची. आम्ही खूप छान दिवाळी साजरी करायचो. माझे बाबा मला नेहमी खूप फटाके आणून द्यायचे. मात्र, मला बॉम्बसारखे मोठे फटाके फोडायला आवडायचे नाहीत. सुरसुरी आणि छोटे छोटे फटाके फोडण्यात मला जास्त आनंद मिळायचा. मुळात मला दिवाळी हा सणच खूप आवडायचा आणि आजही आवडतो.
आकाशकंदील विकत आणायचा की घरी बनवायचा, हे दरवर्षी आमच्या मूडवर अवलंबून असायचं. लहानपणी प्रत्येक बिल्डिंगमध्ये किल्ला बनवण्याची जणू स्पर्धाच असायची. कोणाचा किल्ला सर्वात छान झाला आहे, याची उत्सुकता असायची. आम्ही सगळे मिळून किल्ला बनवायचो आणि तुळशीपूजनाच्या वेळी किल्ला फोडण्याची वेळ आली की त्या स्पर्धेचा विजेता जाहीर करायचो. किल्ला असो किंवा आकाशकंदील, या सगळ्या गोष्टी करताना मी खूप मजा करायचे.”
आईच्या हातचा फराळ आणि चिवडा म्हणजे पूर्वाचा वीक पॉइंट!
दिवाळीच्या फराळाबद्दल बोलताना पूर्वाने तिच्या आवडीचाही खुलासा केला. ती म्हणाली, “माझ्या घरी दिवाळीला सगळ्या प्रकारचा फराळ बनायचा. आमची आई एकटीच सगळा फराळ करायची. फराळाची तयारी जवळपास आठवडाभर आधीच सुरू व्हायची. शाळेतून घरी आल्यानंतर मी आईला फराळ बनवण्यासाठी मदत करायचे. फराळात मला सगळ्यात जास्त चिवडा आवडतो. मला चिवडा इतका आवडतो की सकाळी, दुपारी किंवा संध्याकाळी कधीही खायला दिला तरी मी खात बसेन!”
नवीन कपड्यांबद्दलही पूर्वाच्या अनेक गोड आठवणी आहेत. लहानपणी शॉपिंगला गेल्यावर मोठी झाल्यानंतर खूप कपडे खरेदी करण्याचे स्वप्न ती पाहायची. वर्षातील ३६५ दिवसांसाठी ३६५ वेगवेगळे ड्रेस असावेत, अशी तिची इच्छा होती. आई-बाबांसोबत कपड्यांच्या खरेदीला जाण्यातही तिला खूप मजा यायची.
आताच्या दिवाळीबद्दल बोलताना पूर्वा सांगते, “आताची माझी दिवाळी मी घरीच भावंडांसोबत साजरी करते. आम्ही सगळे एकत्र आलो की खूप धमाल करतो. सध्या अनेक गोष्टी वैयक्तिक पातळीवर केल्या जातात. त्यामुळे प्रत्येकाची दिवाळी वेगळी झाली आहे, असं मला वाटतं. पूर्वीसारखे किल्ले आता दिवाळीत क्वचितच पाहायला मिळतात. आमच्या लहानपणी पहाटे चार वाजता उठून आंघोळ आवरायची आणि मग फटाके फोडायला जायचं. आता मात्र लहान मुलं-मुली पहाटे चार वाजता उठून फटाके फोडताना दिसत नाहीत. ही परंपराही आता जवळपास बंद झाल्यासारखी वाटते.”
सध्या कामाच्या व्यापामुळे घरी फारसे पदार्थ बनवले जात नसले तरी गेल्या दोन वर्षांपासून पूर्वा आवर्जून घरी चिवडा बनवते. त्यामुळे तिच्या दिवाळीच्या फराळात चिवड्याला खास स्थान आहे.
कलाकार म्हणून सेटवर दोनदा साजरी होते दिवाळी!
एक कलाकार म्हणून सण साजरे करण्याचा अनुभव वेगळाच असतो, असं पूर्वाला वाटतं. याबद्दल ती म्हणते, “एक कलाकार म्हणून मला असं वाटतं की प्रत्येक कलाकार सण दोनदा अनुभवत असतो. दिवाळीचंही तसंच आहे. सेटवरची दिवाळी वेगळी असते आणि आपण घरी साजरी करतो ती दिवाळी वेगळी असते. एक माणूस म्हणून जगताना आपल्याला एखादा अनुभव एकदाच घेता येतो, पण कलाकार म्हणून तोच अनुभव दोनदा घेता येतो. सेटवर जरी सगळं खोटं असलं तरी त्या सणांमध्ये आणि उत्सवांमध्ये आपलं मन मात्र खरंच गुंतलेलं असतं. त्यामुळे ते सगळं खूप खरं आणि आपलंसं वाटतं.”
मालिकांमधून मिळणाऱ्या नात्यांबद्दलही तिने एक खास अनुभव सांगितला. वैयक्तिक आयुष्यात एखादी मुलगी घरात एकुलती एक असू शकते, पण मालिकेत तिला दोन भाऊ आणि दोन बहिणी असं कुटुंब मिळू शकतं. मालिकेतून अचानक मिळणारं भावंडांचं प्रेम अनुभवताना खूप छान वाटतं. कलाकार म्हणून मालिकांमधून नाती नव्याने जगता आणि अनुभवता येतात, ही एक वेगळीच भेट असल्याचं पूर्वाने सांगितलं.
पूर्वाच्या या दिवाळीच्या आठवणींमधून सणाचा खरा आनंद हा केवळ रोषणाई आणि फराळात नसून कुटुंबीयांसोबत वेळ घालवण्यात, एकत्र येण्यात आणि नाती जपण्यात आहे, हे पुन्हा एकदा अधोरेखित होतं. ‘दीपज्योती’ मालिकेतील ज्योती अर्थात पूर्वा कौशिकच्या या खास आठवणींनी तिच्या चाहत्यांनाही आपल्या बालपणीच्या दिवाळीची आठवण नक्कीच करून दिली असेल.
.png "Videos"){kind=small}
