गुरुवार, 5 नोव्हेंबर 2026
(फोटो सौजन्य- सोशल मीडिया)
Miss Universe 2026: मिस युनिव्हर्स २०२६ स्पर्धेकडे सध्या सर्वांचे लक्ष लागले आहे. यंदाच्या स्पर्धेत भारत आणि पाकिस्तान या दोन्ही देशांच्या सुंदरी सहभागी होणार असल्याने चाहत्यांमध्ये विशेष उत्सुकता पाहायला मिळत आहे. भारताकडून काझिया लिझ मेझो तर पाकिस्तानकडून मिस्बाह अर्शद या स्पर्धेत सहभागी होणार आहेत. त्यामुळे यंदा मिस युनिव्हर्सच्या मंचावर भारत विरुद्ध पाकिस्तान अशी चुरशीची स्पर्धा पाहायला मिळणार आहे.
भारताची प्रतिनिधी काझिया लिझ मेझो ७५ व्या मिस युनिव्हर्स स्पर्धेत सहभागी होण्यासाठी पोर्तो रिकोला रवाना झाली आहे. मिस युनिव्हर्स इंडियाच्या अधिकृत इन्स्टाग्राम अकाउंटवर तिचे काही खास फोटो शेअर करण्यात आले आहेत. या फोटोंमध्ये काझिया विमानतळावर दिसत असून तिने सुंदर साडी नेसली आहे. तिच्या हातात भारताचा तिरंगा असून तिच्या चेहऱ्यावर देशाचे प्रतिनिधित्व करण्याचा अभिमान स्पष्टपणे दिसत आहे.
या फोटोंसोबत मिस युनिव्हर्स इंडियाने खास कॅप्शनही लिहिले आहे. “एक राणी केवळ मुकुटच नाही, तर राष्ट्राची स्वप्ने आणि आशाही घेऊन फिरते,” अशा शब्दांत तिच्या प्रवासाचे वर्णन करण्यात आले आहे. पुढे कॅप्शनमध्ये म्हटले आहे की, परंपरेने नटलेली आणि अभिमानाने मुकुट परिधान केलेली मिस युनिव्हर्स इंडिया २०२६ काझिया लिझ मेझो ७५ व्या मिस युनिव्हर्स स्पर्धेत भारताचे प्रतिनिधित्व करण्यासाठी पोर्तो रिकोच्या प्रवासाला निघाली आहे. मोहकता, दृढनिश्चय आणि अब्जावधी स्वप्नांचा उत्साह घेऊन ती जागतिक स्तरावर चमकण्यासाठी सज्ज झाली आहे.
काझियाचे हे फोटो सोशल मीडियावर चांगलेच व्हायरल होत असून चाहत्यांकडून तिच्यावर शुभेच्छांचा वर्षाव केला जात आहे. भारताला यंदाचा मिस युनिव्हर्सचा मुकुट मिळावा, अशी अपेक्षा चाहते व्यक्त करत आहेत.
दरम्यान, काझिया लिझ मेझोने मिस युनिव्हर्स इंडिया २०२६ चा किताब जिंकला होता. तिचे बालपण संयुक्त अरब अमिरातीमधील अबू धाबी येथे गेले आहे. आता आंतरराष्ट्रीय स्तरावर भारताचे प्रतिनिधित्व करण्यासाठी ती सज्ज झाली असून तिच्या कामगिरीकडे सर्वांचे लक्ष लागले आहे. पाकिस्तानची मिस्बाह अर्शदही या स्पर्धेत सहभागी होत असल्याने दोन्ही देशांच्या चाहत्यांमध्ये उत्सुकता वाढली आहे.
