(फोटो सौजन्य- सोशल मीडिया)
Actor Heart Attack: ‘हुंकार: द रोअर’ ही मालिका उत्कंठावर्धक कथा, प्रभावी मांडणी आणि कलाकारांच्या दमदार अभिनयामुळे प्रेक्षकांचे लक्ष वेधून घेत आहे. या मालिकेत अभिनेते रघुबीर यादव यांनी साकारलेली ‘बापजी’ ही नकारात्मक भूमिका विशेष चर्चेत आहे. आपल्या अभिनयातील बारकावे आणि प्रभावी व्यक्तिमत्त्वाच्या जोरावर त्यांनी या भूमिकेला वेगळी ओळख मिळवून दिली आहे.
मालिकेतील एका महत्त्वाच्या दृश्याच्या विश्लेषणादरम्यान दिग्दर्शक करण कपाडिया आणि रघुबीर यादव यांनी चित्रीकरणादरम्यानचे काही खास अनुभव प्रेक्षकांसोबत शेअर केले. यावेळी त्यांनी या दृश्यामागील सर्जनशील प्रक्रिया आणि पडद्यामागे घडलेल्या अविस्मरणीय प्रसंगांनाही उजाळा दिला.
यावेळी करण कपाडिया यांनी एक धक्कादायक खुलासा केला. मालिकेतील एका महत्त्वाच्या साक्षीच्या दृश्याचे चित्रीकरण होण्याच्या आदल्या रात्री रघुबीर यादव यांना हृदयविकाराचा झटका आला होता. या घटनेमुळे या दृश्याच्या चित्रीकरणामागील अनुभवाला एक वेगळे वळण मिळाले.
रघुबीर यादव यांची मिश्कील टिप्पणी चर्चेत
या प्रसंगाची आठवण सांगताना रघुबीर यादव यांनी आपल्या खास विनोदी शैलीत टिप्पणी केली. हे दृश्य इतके थरारक होते की त्यापेक्षा हृदयविकाराचा झटका आलेला बरा वाटला, अशा आशयाची मिश्कील प्रतिक्रिया त्यांनी दिली. त्यांच्या या वक्तव्यामुळे संवादातील हलकाफुलका अंदाजही पाहायला मिळाला.
या किस्स्यातून मालिकेतील थरारक दृश्यांची निर्मिती करताना कलाकार आणि दिग्दर्शकांना कोणत्या आव्हानांना सामोरे जावे लागते, याची झलक मिळते. कॅमेऱ्यासमोर दिसणाऱ्या दृश्यांमागे अनेक अनुभव आणि अनपेक्षित प्रसंग दडलेले असतात, हेही या संवादातून समोर आले.
‘हुंकार: द रोअर’ या मालिकेची निर्मिती बिर्ला स्टुडिओज आणि अप्लॉज एंटरटेनमेंट यांनी पर्पल पेबल पिक्चर्सच्या सहकार्याने केली आहे. ही मालिका मंगाता फिल्म्सची निर्मिती आहे. करण डी. कपाडिया आणि नित्या मेहरा यांनी मालिकेची संकल्पना मांडली असून, प्रियंका चोप्रा जोनस या कार्यकारी निर्मात्या आहेत.
रघुबीर यादव यांचा आजवरच्या भूमिकांपेक्षा वेगळा आणि दमदार नकारात्मक अंदाज पाहायचा असेल, तर ‘हुंकार: द रोअर’ ही मालिका जिओहॉटस्टारवर पाहता येईल.
.png "Videos"){kind=small}
