(फोटो सौजन्य-सोशल मिडिया)
Ramayana Movie Collection: बॉलिवूडमधील आतापर्यंतच्या सर्वात महागड्या भारतीय चित्रपटांपैकी एक असलेला रणबीर कपूरचा ‘रामायणम्’ सध्या बॉक्स ऑफिसवर दमदार कामगिरी करताना दिसत आहे. प्रदर्शनापासूनच या चित्रपटाने कमाईचे नवनवे विक्रम केले आहेत. विशेष म्हणजे, दिवाळीच्या मुहूर्तावर चित्रपटाने आणखी एक मोठा विक्रम आपल्या नावावर केला आहे. अवघ्या चार दिवसांत ‘रामायणम्’ने जगभरात ५०० कोटी रुपयांचा टप्पा पार केला असून, प्रभासच्या ‘आदिपुरुष’ चित्रपटाच्या ३९३ कोटी रुपयांच्या जागतिक कमाईलाही मागे टाकलं आहे.
‘रामायणम्’ने प्रदर्शनाच्या पहिल्याच दिवशी हाऊसफुल्ल शोसह सुरुवात केली. भारतात पहिल्या दिवशी चित्रपटाने ६४.८५ कोटी रुपयांची निव्वळ कमाई केली. हा आकडा चित्रपटाच्या भव्य बजेटच्या तुलनेत कमी वाटत असला, तरी बॉलिवूडच्या इतिहासातील चौथ्या क्रमांकाची सर्वाधिक ओपनिंग ठरली आहे.
पहिल्या दिवसानंतर शुक्रवारी चित्रपटाच्या कमाईत काहीशी घट झाली. या दिवशी चित्रपटाने ४८ कोटी रुपयांचा व्यवसाय केला. मात्र, शनिवारी कमाईत मोठी वाढ पाहायला मिळाली. शनिवारी चित्रपटाने जवळपास ७० कोटी रुपयांची निव्वळ कमाई केली. त्यामुळे पहिल्या तीन दिवसांतच ‘रामायणम्’ची भारतातील एकूण निव्वळ कमाई १८३ कोटी रुपयांवर पोहोचली.
रविवारी दिवाळीचा सण असल्यामुळे देशातील काही भागांमध्ये चित्रपटगृहांमधील गर्दी कमी होण्याची शक्यता व्यक्त केली जात होती. मात्र, या सगळ्या अंदाजांना मागे टाकत ‘रामायणम्’ने रविवारीही चांगली कमाई केली. चौथ्या दिवशी चित्रपटाने भारतात ५६.१५ कोटी रुपयांची निव्वळ कमाई केली.
विशेष म्हणजे, दिवाळीच्या विकेंडला प्रदर्शित झालेल्या चित्रपटांमध्ये ‘रामायणम्’ने नवा विक्रम केला आहे. रविवारी रात्री ९ वाजेपर्यंत चित्रपटाने सलमान खानच्या ‘टायगर ३’चा दिवाळीतील सर्वाधिक कमाईचा विक्रम मोडला. २०२३ मध्ये दिवाळीच्या दिवशी प्रदर्शित झालेल्या ‘टायगर ३’ने ४४.५० कोटी रुपयांची निव्वळ कमाई केली होती.
चार दिवसांच्या कमाईनंतर ‘रामायणम्’ची भारतातील निव्वळ कमाई २३८.८५ कोटी रुपयांवर पोहोचली आहे. तर भारतातील एकूण कमाई २८५.२० कोटी रुपये असल्याचं वृत्तात नमूद करण्यात आलं आहे. जगभरातील कमाईनेही ५०० कोटी रुपयांचा टप्पा ओलांडला आहे.
अवघ्या चार दिवसांत प्रभासच्या ‘आदिपुरुष’च्या ३९३ कोटी रुपयांच्या जागतिक कमाईला मागे टाकत ‘रामायणम्’ने बॉक्स ऑफिसवर आपली ताकद दाखवून दिली आहे. आगामी दिवसांत हा चित्रपट आणखी किती विक्रम आपल्या नावावर करतो, याकडे आता प्रेक्षकांचं लक्ष लागलं आहे.
.png "Videos"){kind=small}
