(फोटो सौजन्य- सोशल मीडिया)
Ranabaali OTT Release: विजय देवरकोंडा आणि रश्मिका मंदाना यांची मुख्य भूमिका असलेला ‘रणबाली’ हा पीरियड अॅक्शन चित्रपट आता ओटीटीवर प्रदर्शित होण्यासाठी सज्ज झाला आहे. थिएटरमध्ये रिलीज झाल्यानंतर अवघ्या एका महिन्याच्या आत हा चित्रपट डिजिटल प्लॅटफॉर्मवर येणार आहे. विशेष म्हणजे, मूळ तेलुगू भाषेतील या चित्रपटाचा आनंद प्रेक्षकांना हिंदी, तमिळ, कन्नड आणि मल्याळम भाषांमध्येही घेता येणार आहे.
दिग्दर्शक राहुल संकृतियन यांनी या चित्रपटाचं दिग्दर्शन केलं असून मैत्री मूव्ही मेकर्सने त्याची निर्मिती केली आहे. नेटफ्लिक्सने आपल्या अधिकृत सोशल मीडिया पेजवर चित्रपटाचं पोस्टर शेअर करत ओटीटी रिलीजची घोषणा केली आहे. त्यानुसार, ‘रणबाली’ १३ नोव्हेंबरपासून नेटफ्लिक्सवर स्ट्रीम होणार आहे. त्यामुळे थिएटरमध्ये चित्रपट पाहता न आलेल्या प्रेक्षकांना आता घरबसल्या तो पाहण्याची संधी मिळणार आहे.
लग्नानंतर पहिल्यांदाच रश्मिका मंदाना आणि विजय देवरकोंडा ही जोडी मोठ्या पडद्यावर एकत्र दिसल्याने ‘रणबाली’बद्दल प्रेक्षकांमध्ये उत्सुकता होती. मात्र, बॉक्स ऑफिसवर चित्रपटाला अपेक्षित यश मिळालं नाही. १२० कोटी रुपयांच्या बजेटमध्ये तयार झालेल्या या चित्रपटाने जगभरात सुमारे ८०.८० कोटी रुपयांची कमाई केली. त्याच काळात प्रदर्शित झालेल्या रजनीकांत यांच्या ‘जेलर २’ चित्रपटाने मात्र जगभरात ८२८.५० कोटी रुपयांची कमाई केल्याचा दावा वृत्तात करण्यात आला आहे.
‘रणबाली’ची कथा १९व्या शतकातील ब्रिटिश राजवटीच्या काळात दक्षिण भारतातील रायलसीमा प्रदेशात घडते. सिंगणमाला गावातील रणबाली म्हणजेच विजय देवरकोंडा याच्या आयुष्याभोवती चित्रपटाचं कथानक फिरतं. गूढ परिस्थितीत जन्मलेल्या रणबालीच्या आयुष्याबद्दल एक आध्यात्मिक भविष्यवाणी केली जाते. आपलं ठरलेलं ध्येय पूर्ण होईपर्यंतच तो जिवंत राहील, असं या भविष्यवाणीत सांगितलं जातं.
मोठा झाल्यानंतर रणबाली एक पराक्रमी योद्धा बनतो. पुढे त्याचं जयम्मा म्हणजेच रश्मिका मंदाना हिच्याशी लग्न होतं. तिच्या आयुष्यात येण्याने रणबालीच्या कठोर स्वभावामागील हळवी बाजू समोर येते. दरम्यान, रायलसीमा प्रदेशात १८७६ ते १८७८ या काळात भीषण दुष्काळ पडतो. अन्नटंचाई आणि ब्रिटिशांच्या जाचक करांमुळे स्थानिक नागरिकांचे हाल होतात. मात्र, ब्रिटिश अधिकारी धान्य निर्यात आणि कर वसुली सुरूच ठेवतात. या अन्यायाविरोधात रणबाली कसा उभा राहतो, हे चित्रपटात पाहायला मिळतं.
थिएटरमध्ये अपेक्षित यश न मिळाल्यानंतर आता ‘रणबाली’ला ओटीटीवर प्रेक्षकांचा कसा प्रतिसाद मिळतो, हे पाहणं महत्त्वाचं ठरणार आहे. १३ नोव्हेंबरपासून नेटफ्लिक्सवर हा चित्रपट तेलुगू, हिंदी, तमिळ, कन्नड आणि मल्याळम अशा पाच भाषांमध्ये पाहता येईल.
.png "Videos"){kind=small}
