(फोटो सौजन्य- सोशल मीडिया)
शीतल उपारे हिने केवळ मॉडेलिंगपुरतं स्वतःला मर्यादित न ठेवता आंतरराष्ट्रीय स्तरावर भारताचं प्रतिनिधित्व केलं आहे. ‘मिस हेरिटेज इंटरनॅशनल’ या स्पर्धेत तिने भारताचं प्रतिनिधित्व करत द्वितीय उपविजेतेपद मिळवलं. तसेच ‘मिस इंडिया प्रोग्रेस इंटरनॅशनल’ या स्पर्धेचा किताबही तिने पटकावला. सौंदर्य स्पर्धांमधील या यशामुळे तिला आंतरराष्ट्रीय स्तरावर ओळख मिळाली.
एअर होस्टेस ते अभिनेत्री; शीतलचा प्रवास प्रेरणादायी
अभिनयक्षेत्रात येण्यापूर्वी शीतलने विमान वाहतूक क्षेत्रातही काम केलं आहे. तिने एका खासगी जेट कंपनीतून आपल्या कारकिर्दीची सुरुवात केली. त्यानंतर सिंगापूर एअरलाईन्समध्ये केबिन क्रू म्हणूनही ती कार्यरत होती. मात्र, नाटक आणि अभिनयाविषयीची आवड तिला मनोरंजनविश्वाकडे घेऊन आली.
५० हून अधिक नाटकांत साकारल्या भूमिका
शीतलने विविध नाट्यसंस्थांसोबत काम करत ५० हून अधिक नाटकांमध्ये भूमिका साकारल्या आहेत. ‘पाषाण’, ‘तथागत’ आणि ‘व्याकुळ चांदण्या’ यांसारख्या नाटकांमधील तिचं काम उल्लेखनीय ठरलं. रंगभूमीवरील या अनुभवामुळे तिच्या अभिनयाला वेगळी दिशा मिळाली.
आंतरराष्ट्रीय लघुपटासाठी पटकथालेखनही
अभिनयासोबतच शीतलने पटकथालेखन क्षेत्रातही आपली क्षमता दाखवली आहे. ‘तारा द लॉक’ (Tara the Lock) या आंतरराष्ट्रीय लघुपटात तिने काम केलं असून या लघुपटाची पटकथाही तिने लिहिली आहे. ‘तारा’ या चित्रपटाला इटली आणि जर्मनीतील आंतरराष्ट्रीय चित्रपट महोत्सवांमध्ये नामांकन मिळाल्याची माहिती आहे. तसेच या चित्रपटाने दादासाहेब फाळके आंतरराष्ट्रीय पुरस्कार जिंकल्याचाही उल्लेख केला जातो.
यानंतर शीतलने ‘इंडियन प्रेमाचा लफडा’ (IPL) या व्यावसायिक मराठी चित्रपटात काम केलं. हा चित्रपट डिसेंबर २०१६ मध्ये प्रदर्शित झाला होता. अशा प्रकारे मॉडेलिंग, रंगभूमी, चित्रपट आणि पटकथालेखन या विविध क्षेत्रांत तिने काम केलं आहे.
आता शीतल उपारे लवकरच बॉलिवूडमध्ये नव्या प्रोजेक्टमधून झळकणार असल्याची चर्चा आहे. मात्र, या आगामी प्रोजेक्टबाबत अद्याप अधिकृत माहिती समोर आलेली नाही. ती कोणत्या भूमिकेत दिसणार, प्रोजेक्टमध्ये कोणते कलाकार असणार आणि हा चित्रपट असेल की अन्य माध्यमातील निर्मिती, याबाबत चाहत्यांमध्ये उत्सुकता आहे.
शीतलचा आतापर्यंतचा बहुआयामी प्रवास पाहता तिच्या आगामी कामाबद्दल कुतूहल निर्माण झालं आहे. आता तिच्या नव्या प्रोजेक्टची अधिकृत घोषणा कधी होते आणि ती प्रेक्षकांसमोर कोणत्या नव्या रूपात येते, हे पाहणं महत्त्वाचं ठरणार आहे.
.png "Videos"){kind=small}
