(फोटो सौजन्य- सोशल मीडिया)
Darshan Raval New Song: ‘पहला प्यार दूसरी बार’ या आगामी चित्रपटाच्या निर्मात्यांनी ‘जाने किस मोड़ पे’ हे नवं गाणं प्रदर्शित केलं आहे. गायक दर्शन रावलच्या सुरेल आवाजातील हे गाणं जुन्या आठवणी, पहिलं प्रेम आणि पुन्हा एकदा प्रेमाला संधी देण्याची आशा यांचं सुंदर चित्रण करतं. तरुणाईच्या भावना, मैत्री आणि प्रेमाचा प्रवास उलगडणारं हे गाणं प्रेक्षकांच्या भेटीला आलं आहे.
या गाण्याला दर्शन रावलने आवाज दिला असून, त्याचे बोल गुरप्रीत सैनी यांनी लिहिले आहेत. रोचक कोहली यांनी संगीतबद्ध केलेलं हे गाणं चित्रपटातील तीन मित्रांच्या प्रवासाभोवती फिरतं. शाळेच्या रियुनियनसाठी निघालेल्या या मित्रांच्या मनात आपल्या पहिल्या क्रशला पुन्हा भेटण्याची उत्सुकता आहे. मात्र, या प्रवासात त्यांच्या आयुष्यात कोणते अनपेक्षित बदल घडणार आहेत, याची त्यांना कल्पनाही नसते.
हलकेफुलके संगीत आणि भावस्पर्शी शब्द असलेल्या या गाण्यात मैत्री, प्रेम आणि आयुष्यात दुसरी संधी मिळण्याची भावना व्यक्त करण्यात आली आहे. पहिल्या प्रेमाला पुन्हा भेटण्याची ओढ, मनातील उत्सुकता आणि जुन्या आठवणींना उजाळा देणारा हा अनुभव गाण्यातून प्रभावीपणे मांडण्यात आला आहे.
‘जाने किस मोड़ पे’ या गाण्याबद्दल बोलताना दर्शन रावल म्हणाला की, या गाण्यात प्रतीक्षा आणि आशेची सुंदर भावना आहे. तरुणाईला भावणाऱ्या आणि जुन्या आठवणी जागवणाऱ्या भावना त्याला विशेष आवडल्या. हे गाणं ऐकल्यानंतर श्रोत्यांना त्यांच्या आयुष्यातील काही खास क्षण पुन्हा अनुभवता येतील, अशी आशाही त्याने व्यक्त केली.
संगीतकार रोचक कोहली यांनीही या गाण्याविषयी सांगितलं की, अनेक वर्षांनंतर पहिल्या क्रशला पुन्हा भेटण्याची उत्सुकता आणि मनातील धाकधूक संगीताच्या माध्यमातून व्यक्त करण्याचा प्रयत्न करण्यात आला आहे. दर्शन रावलचा आवाज आणि गुरप्रीत सैनी यांचे शब्द या गाण्यातील भावना अधिक प्रभावी बनवतात.
गीतकार गुरप्रीत सैनी यांच्या मते, हे गाणं आशा जिवंत ठेवण्याबद्दल आणि आयुष्यात नव्या मार्गांनी प्रेम शोधण्याबद्दल आहे. चित्रपटातील पात्रांप्रमाणेच प्रत्येकाच्या मनात प्रेमाची एक आशा असते. मैत्री, रोमान्स आणि तरुणाईचा उत्साह यांचा सुंदर संगम या गाण्यात पाहायला मिळतो.
‘जाने किस मोड़ पे’ हे गाणं टी-सीरिज म्युझिकवर प्रदर्शित करण्यात आलं आहे. या गाण्यात स्पर्श वालिया, अलीशा चोप्रा, कुणाल वैद, साक्षी वैद्या, तुषार छिब्बर आणि सरगुन कौर लुथरा दिसत आहेत. हे कलाकार या चित्रपटातून चित्रपटसृष्टीत पदार्पण करत आहेत.
लव रंजन आणि अंकुर गर्ग यांनी संयुक्तपणे या चित्रपटाची निर्मिती केली आहे. तरुणाई, पहिलं प्रेम, मैत्री आणि नात्यांना पुन्हा एक संधी देण्याची भावना यांची गोष्ट सांगणारा हा चित्रपट २३ ऑक्टोबर २०२६ रोजी देशभरातील चित्रपटगृहांमध्ये प्रदर्शित होणार आहे.
.png "Videos"){kind=small}
