( फोटो सौजन्य- सोशल मिडिया)
Shweta Tiwari: टीव्ही अभिनेत्री श्वेता तिवारी सध्या ‘द ट्रेटर्स २’मुळे चर्चेत आहे. मात्र, आता ती एका वेगळ्याच कारणामुळे सोशल मीडियावर चर्चेत आली आहे. श्वेता तिवारीने ऑनलाइन ऑर्डर केलेल्या रेड बुलच्या डिलिव्हरीसोबत चक्क एक झुरळ घरात आल्याचा दावा केला आहे. याचा व्हिडीओ तिने आपल्या इन्स्टाग्राम स्टोरीवर शेअर केला असून, मजेशीर अंदाजात आयएएस अधिकारी तुकाराम मुंडे यांना टॅग करत मदतीची मागणी केली आहे.
श्वेता तिवारीने इन्स्टामार्टवरून रेड बुल ऑर्डर केल्याचं व्हिडीओमध्ये सांगितलं. मात्र, डिलिव्हरी मिळाल्यानंतर तिच्या घरात एक झुरळ फिरताना दिसलं. श्वेताने या झुरळाचा व्हिडीओ शूट केला आणि तो सोशल मीडियावर शेअर केला.
व्हिडीओमध्ये झुरळ घरात इकडून तिकडे फिरताना दिसत आहे. श्वेताने कॅमेऱ्याने त्यावर झूम करत संपूर्ण प्रकार चाहत्यांना दाखवला.
‘मुंडेजी, तुम्ही कुठे आहात?’
श्वेता तिवारीने हा प्रकार गंभीरपणे सांगण्याऐवजी विनोदी अंदाजात मांडला. ती म्हणताना दिसते, “मी इन्स्टामार्टवरून रेड बुल ऑर्डर केले होते आणि त्या रेड बुलसोबतच इन्स्टामार्टमधून एक झुरळही आमच्या घरात आले.”
यानंतर झुरळ संपूर्ण घरात पळत असल्याचं दाखवत तिने म्हटलं, “आपण तुकाराम मुंडे यांना टॅग करायचे का? मुंडेजी, इन्स्टामार्टमधून आमच्या घरात झुरळे येत आहेत. तुम्ही कुठे आहात? कृपया लक्ष द्या.” श्वेताने संबंधित डिलिव्हरी ॲपलाही टॅग केलं आहे.
तुकाराम मुंडे हे त्यांच्या कडक प्रशासकीय शैलीसाठी ओळखले जातात. अन्न आणि औषध प्रशासनाशी संबंधित कारवाईमुळे ते अलीकडे चर्चेत आहेत. त्यामुळेच श्वेताने आपल्या व्हिडीओमध्ये त्यांना मजेशीर पद्धतीने टॅग केल्याचं दिसतं.
श्वेताचा हा व्हिडीओ विनोदी असला तरी, ऑनलाइन फूड डिलिव्हरीदरम्यान स्वच्छता आणि अन्नसुरक्षेचा मुद्दाही यामुळे पुन्हा चर्चेत आला आहे.
दरम्यान, कामाच्या आघाडीवर श्वेता तिवारी सध्या ‘द ट्रेटर्स २’मध्ये दिसत आहे. करण जोहर होस्ट करत असलेला हा शो प्राईम व्हिडीओवर स्ट्रीम होत आहे. या सीझनमध्ये क्रिस्टल डिसूझा, मल्लिका शेरावत, मुनव्वर फारुकी, रिया चक्रवर्ती, रणवीर ब्रार यांच्यासह अनेक सेलिब्रिटी सहभागी झाले आहेत.
शोमध्ये श्वेता तिवारीच्या स्पष्टवक्तेपणाचीही चर्चा होत आहे. स्पर्धकांमधील नातेसंबंध आणि तिच्या वक्तव्यांमुळे ती सातत्याने चर्चेत राहिली आहे. आता रेड बुलच्या डिलिव्हरीसोबत आलेल्या झुरळाच्या या मजेशीर किस्स्यामुळे तिचा व्हिडीओ सोशल मीडियावर लक्ष वेधून घेत आहे.
.png "Videos"){kind=small}
