सोमवार, 28 सप्टेंबर 2026
(फोटो सौजन्य-सोशल मीडिया)
Sushant Singh Rajput Case: अभिनेता सुशांत सिंह राजपूतच्या निधनाला सहा वर्षे झाली असली तरी त्याच्या मृत्यूशी संबंधित चर्चा अद्याप थांबलेल्या नाहीत. आता पुन्हा एकदा सुशांतची बहीण श्वेता सिंह कीर्ती यांनी त्याच्या पोस्टमॉर्टमबाबत नवा दावा केला आहे. श्वेता यांनी सोशल मीडियावर शेअर केलेल्या व्हिडीओमध्ये पोस्टमॉर्टम करणाऱ्या व्यक्तीकडून आपल्याला काही माहिती मिळाल्याचं सांगितलं आहे.
श्वेता सिंह कीर्ती यांनी आपल्या व्हिडीओमध्ये दावा केला की, नुकतंच त्यांचं सुशांतच्या पोस्टमॉर्टमशी संबंधित व्यक्तीसोबत बोलणं झालं. त्यांच्या म्हणण्यानुसार, त्या व्यक्तीने सुशांतच्या शरीरावर दुखापतींच्या खुणा असल्याचं सांगितलं.
श्वेता यांच्या दाव्यानुसार, सुशांतचा पाय तुटलेला होता, त्याच्या डोळ्यांना दुखापत झाली होती आणि त्याच्यावर मोठ्या प्रमाणात बळाचा वापर करण्यात आला होता. त्यांनी स्टन गनच्या वापराबाबतही दावा केला आहे. मात्र, श्वेता यांनी या व्यक्तीची ओळख सार्वजनिक केलेली नाही तसेच या दाव्यांच्या समर्थनार्थ कोणतेही दस्तऐवज सादर केलेले नाहीत.
श्वेता यांच्या नव्या दाव्यांनंतर सुशांतच्या मृत्यूशी संबंधित चर्चा पुन्हा सोशल मीडियावर सुरू झाली आहे. सुशांत 14 जून 2020 रोजी मुंबईतील त्याच्या राहत्या घरात मृतावस्थेत आढळला होता. त्यानंतर या प्रकरणाची मोठ्या प्रमाणावर चर्चा झाली आणि विविध तपास यंत्रणांनी प्रकरणाच्या वेगवेगळ्या पैलूंची चौकशी केली.
दरम्यान, 2020 मधील पोस्टमॉर्टमबाबतच्या आधीच्या वृत्तांमध्ये सुशांतच्या शरीरावर संघर्षाच्या खुणा किंवा बाह्य दुखापती आढळल्या नसल्याचं नमूद करण्यात आलं होतं. त्यामुळे श्वेता यांनी आता केलेले दावे आणि यापूर्वी समोर आलेली माहिती यामध्ये फरक दिसून येतो.
‘अटलांटाहून परतल्यानंतर अनेकजण भेटले’
श्वेता यांनी आपल्या व्हिडीओमध्ये अटलांटाहून परतल्यानंतर त्यांना भेटण्यासाठी आलेल्या लोकांचाही उल्लेख केला. अनेकजण त्यांना भेटले, त्यांनी सुशांतची आठवण काढत आपल्या भावना व्यक्त केल्या आणि काही जण भावूक झाल्याचं श्वेता यांनी सांगितलं.
त्यांच्या म्हणण्यानुसार, सुशांतसोबत जे घडलं ते चुकीचं होतं, अशी भावना आजही अनेकांच्या मनात आहे.
‘द्वेष आणि सूडामध्ये अडकायचं नाही’
या सगळ्या परिस्थितीवर बोलताना श्वेता यांनी आपल्या मनातील भावनांबद्दलही भाष्य केलं. जवळच्या व्यक्तीसोबत काही वाईट घडलं की दुःख आणि राग येणं स्वाभाविक आहे, असं त्या म्हणाल्या. मात्र, आपल्याला द्वेष, सूड आणि कटुतेमध्ये अडकायचं नसल्याचं त्यांनी स्पष्ट केलं.
प्रेम, श्रद्धा, चांगुलपणा आणि ईश्वरासाठी उभं राहणं हा आपल्या आयुष्याचा उद्देश असल्याचं श्वेता यांनी सांगितलं. जगात अन्याय असला तरी लोकांनी चांगुलपणा आणि देवावरील श्रद्धा गमावू नये, असं आवाहनही त्यांनी केलं. त्यांच्या मते, कठीण प्रसंगातून मिळणारी वेदना ही परिवर्तनाचं माध्यम ठरू शकते.
श्वेता सिंह कीर्ती यांनी केलेले हे नवे दावे सध्या चर्चेत आले असले तरी त्यांना स्वतंत्र अधिकृत पुष्टी मिळालेली नाही. त्यामुळे या दाव्यांकडे दावे म्हणूनच पाहणे महत्त्वाचे आहे.
