(फोटो सौजन्य-सोशल मीडिया)
Vicky Kaushal Sleep Talking: बॉलिवूड अभिनेता विकी कौशलने आपल्या दमदार अभिनयाने आणि डान्स कौशल्याने लाखो चाहत्यांची मनं जिंकली आहेत. मात्र, त्याच्या अभिनयाची आवड लहानपणापासूनच होती, हे फार कमी लोकांना माहिती आहे. विशेष म्हणजे, ही आवड इतकी होती की, विकी गाढ झोपेत असतानाही बोलायचा आणि त्याच्या हालचाली पाहून तो खरोखर जागा आहे की स्वप्नात आहे, हे घरच्यांनाही समजत नसे. विकीच्या याच मजेशीर सवयीचा खुलासा त्याचा धाकटा भाऊ सनी कौशलने केला होता. ‘द ग्रेट इंडियन कपिल शो’मध्ये त्याने सांगितलेला हा किस्सा ऐकून उपस्थितांना हसू आवरता आले नव्हते.
‘द ग्रेट इंडियन कपिल शो’च्या पहिल्या सीझनमध्ये सनी कौशलने मोठा भाऊ विकीच्या लहानपणीच्या अनेक आठवणी सांगितल्या. सनीच्या म्हणण्यानुसार, बहुतेक लोक झोपेत हळू आवाजात काहीतरी पुटपुटतात. मात्र, विकीची झोपेत बोलण्याची पद्धत अगदी वेगळी होती. तो केवळ बोलायचाच नाही, तर संपूर्ण देहबोलीसह संवाद साधायचा. त्यामुळे तो खरोखर जागा आहे की झोपेतच बोलत आहे, हे समजणे कठीण व्हायचे. त्याच्या या कृती एखाद्या प्रत्यक्ष सादरीकरणासारख्या वाटायच्या. त्यामुळे आई-वडीलही अनेकदा आश्चर्यचकित व्हायचे.
झोपेतच म्हणाला, ‘माझी परीक्षा संपली आहे, बघ!’
सनीने यावेळी एक भन्नाट किस्साही सांगितला. एकदा रात्री दोघे भाऊ एकाच खोलीत झोपले होते. विकीला झोपून जवळपास ४५ मिनिटे झाली होती, तर सनी झोपण्याच्या तयारीत होता. अचानक विकीने पांघरूण बाजूला केले आणि सनीला ‘हे बघ’ असे म्हटले. सनीने आश्चर्याने काय बघायचे, असे विचारले. त्यावर विकीने गाढ झोपेतच उत्तर दिले, ‘माझी परीक्षा संपली आहे, बघ.’
विकी झोपेतच बोलत असल्याचे सनीच्या लक्षात आले. त्यामुळे त्याने त्याला उठवण्याऐवजी त्याच्या बोलण्याला प्रतिसाद दिला. त्यानंतर विकी पुन्हा शांतपणे झोपी गेला. हा किस्सा ऐकून शोमधील सर्वजण खळखळून हसू लागले.
विकीच्या या सवयीचा अनुभव केवळ सनीलाच नव्हे, तर त्याच्या आईलाही आला होता. शोमध्ये विकीने स्वतःच याबद्दलचा एक किस्सा सांगितला. एका रात्री तो गाढ झोपेत असताना अचानक दचकून जागा झाला आणि मोठ्याने ओरडू लागला. कोणीतरी त्याच्या आईची पर्स हिसकावून पळून गेले आहे, असे तो सांगत होता. त्यामुळे घरात काही क्षणांसाठी भितीचे वातावरण पसरले. मात्र, नंतर हा सगळा प्रकार स्वप्नात घडल्याचे समोर आले.
विकी कौशलच्या अभिनयाची आवड आणि त्याच्या झोपेत बोलण्याच्या या अनोख्या सवयीचे किस्से ऐकून चाहत्यांनाही त्याच्या बालपणीच्या खोडकर स्वभावाची झलक पाहायला मिळाली.
.png "Videos"){kind=small}
