(फोटो सौजन्य-सोशल मीडिया)
Yash Ravan Look: दिग्दर्शक नितेश तिवारी यांचा बहुचर्चित ‘रामायण’ चित्रपट सध्या प्रेक्षकांमध्ये उत्सुकतेचा विषय ठरत आहे. या चित्रपटातील कलाकारांच्या लूकची आणि भूमिकांचीही जोरदार चर्चा सुरू आहे. रणबीर कपूर प्रभू श्रीरामाच्या भूमिकेत, साई पल्लवी सीतेच्या भूमिकेत, तर दाक्षिणात्य अभिनेता यश रावणाच्या भूमिकेत दिसणार आहे. विशेष म्हणजे, यशचा रावणाच्या रूपातील लूक चाहत्यांचे लक्ष वेधून घेत आहे. आता या लूकमागील मेहनतीचे अनेक रंजक तपशील समोर आले आहेत.
चित्रपटाच्या कॉस्च्युम स्टायलिस्ट आणि डिझायनर सानिया यांनी नुकत्याच दिलेल्या एका मुलाखतीत यशच्या रावणाच्या पोशाखाबद्दल माहिती दिली. त्यांनी सांगितले की, रावणाच्या भूमिकेसाठी यशला तब्बल ३३ किलो वजनाचा पोशाख परिधान करावा लागत होता. यामध्ये कपडे, दागिने, चिलखत आणि इतर डिझाइन घटकांचा समावेश होता. एवढंच नाही, तर त्याच्या मुकुटाचे वजनही जवळपास १.८ किलो होते.
‘इंडिया टुडे’ला दिलेल्या मुलाखतीत सानिया यांनी सांगितले की, रावणाच्या काही खास पोशाखांचे वजन ३० ते ३३ किलोपर्यंत होते. यामध्ये लंकेशी संबंधित पोशाख, रावणाचा लग्नाचा पोशाख आणि शूर्पणखेच्या लग्नात परिधान केलेला पोशाख यांचा समावेश होता. दागिन्यांसह इतर बहुतांश पोशाखांचे वजन साधारण १६ ते २० किलो होते.
रावणाच्या लूकमधील सर्वात कठीण भाग म्हणजे त्याचा मुकुट तयार करणे. सुरुवातीला यासाठी अनेक ३डी मुकुट तयार करण्यात आले आणि त्यानंतर त्याचे अंतिम डिझाइन निश्चित करण्यात आले. मुकुटाचे वजन कमी करण्यासाठीही अनेक प्रयोग करण्यात आले. मात्र, तो १.८ किलोपेक्षा हलका करता आला नाही. एवढा जड मुकुट असूनही यशच्या चेहऱ्यावरील हावभावांमधून त्याला होणारा त्रास जाणवत नव्हता, असे सानिया यांनी सांगितले.
एवढ्या जड पोशाखात चित्रीकरण करणे यशसाठी अजिबात सोपे नव्हते. प्रत्येक शॉटनंतर तो पोशाखाचे काही भाग काढून ठेवत असे. मुकुट घातल्यानंतर मान हलवणे, छातीवर चिलखत आणि खांद्यांवर जड रचना असताना हातांची हालचाल करणे, ही मोठी कसरत होती. प्रत्येक हालचाल नैसर्गिक दिसावी, यासाठी यशला अनेकदा शॉट द्यावे लागत होते.
पोशाख शक्य तितका आरामदायक बनवण्याचा प्रयत्न करण्यात आला. मात्र, त्याचे वजन आणि सर्व भाग एकमेकांशी योग्य प्रकारे जुळवून घेणे हे मोठे आव्हान होते. असे असूनही यशने संपूर्ण चित्रीकरणादरम्यान उत्साह कायम ठेवला. त्यामुळे पडद्यावर रावणाची भूमिका प्रभावीपणे साकारण्यासाठी यशने किती मेहनत घेतली आहे, याची कल्पना या तपशीलांवरून येते.
.png "Videos"){kind=small}
