KEM Hospital: २५ आठवड्यांचं ६०० ग्रॅमचं बाळ… मृत्यूवर मात करून ‘इवला योद्धा’ जिंकला!

अवघ्या २५ आठवड्यांत आणि ६०० ग्रॅम वजनाने जन्मलेल्या बाळाने मृत्यूशी झुंज देत अखेर जीवनाची लढाई जिंकली. हे बाळ स्थिर होऊन केईएम रुग्णालयातून सुखरूप घरी परतले आहे.

• महिन्यांच्या उपचारानंतर सुखरूप घरी डिस्चार्ज
• २५ आठवड्यांचं ६०० ग्रॅमचं बाळ
• ‘इवलाशा योद्धा’ने केली मृत्यूवर मात

मुंबई : अवघ्या २५ आठवड्यांत आणि केवळ ६०० ग्रॅम वजनाने जन्मलेले बाळ… सुरुवातीपासूनच मृत्यूशी झुंज देत होते. मात्र डॉक्टरांच्या अथक प्रयत्नांमुळे आणि स्वतःच्या जिद्दीच्या जोरावर या ‘इवल्या योद्ध्या’ने अखेर जीवनाची लढाई जिंकली. महिन्यांच्या उपचारानंतर केईएम रुग्णालयातील नवजात अतिदक्षता विभागातून हे बाळ आता पूर्णपणे स्थिर होऊन सुखरूप घरी परतले आहे.

जन्मानंतर लगेचच बाळाला तीव्र श्वसनाचा त्रास जाणवू लागल्याने व्हेंटिलेशनवर ठेवावे लागले. त्याचबरोबर सेप्सिस आणि पॅटन्ट डक्टस आर्टेरिओसस यांसारख्या गंभीर गुंतागुंतींनाही सामोरे जावे लागले. अत्यंत नाजूक स्थितीत असलेल्या या बाळावर दीर्घकाळ उपचार सुरू ठेवण्यात आले. तज्ज्ञ डॉक्टरांचे सातत्यपूर्ण मार्गदर्शन, बारकाईने निरीक्षण आणि नर्सिंग स्टाफच्या समर्पित सेवेमुळे बाळाची प्रकृती हळूहळू सुधारत गेली. अनेक महिन्यांच्या प्रयत्नांनंतर अखेर बाळ पूर्णपणे स्थिर झाले आणि त्याला घरी सोडण्यात आले. या यशस्वी उपचारामागे डॉ. अनिता हरिबालकृष्णा यांच्या नेतृत्वाखालील टीमचे मोठे योगदान असल्याचे केईएम रुग्णालय अधिष्ठात्री डॉ. संगीता रावत यांनी सांगितले. अत्यंत प्रतिकूल परिस्थितीतही या लहान जीवाने दाखवलेली जिद्द आणि वैद्यकीय टीमच्या मेहनतीमुळे मिळालेले हे यश वैद्यकीय क्षेत्रासाठी प्रेरणादायी ठरत आहे.

पोटाला सूज आल्यानंतर शरीरात दिसून येतात ‘ही’ गंभीर लक्षणे, वेळीच उपचार करून टाळता येईल मोठा धोका

‘प्रसूतीपूर्व कळा लवकर आल्याने बाळाचा अकाली जन्म झाला. अशा वेळी मेंदूतील रक्तप्रवाह अत्यल्प असतो आणि परिस्थिती अत्यंत आव्हानात्मक असते. मात्र हे बाळ कोणतीही मोठी गुंतागुंत न ठेवता सुखरूप घरी गेले, ही अत्यंत दुर्मिळ आणि समाधानकारक बाब आहे.’ अशी प्रतिक्रिया केईएम रुग्णालय शिशु विभाग प्रमुख डॉ. अनिता हरिबालकृष्णा यांनी दिली.

दरम्यान, मुंबईच्या केईएम रुग्णालयाने आपला १०० वा वर्धापनदिन साजरा केला आहे. याप्रसंगी, रुग्णालयाच्या अधिष्ठाता डॉ. संगीता रावत यांनी रुग्णालयाच्या गौरवशाली इतिहासाविषयी आणि भविष्यातील ‘आयुष्मान शताब्दी टॉवर’ प्रकल्पाविषयी माहिती दिली. रोबोटिक शस्त्रक्रिया, स्पोर्ट्स मेडिसिन आणि नवीन आयसीयू केंद्र सुरू करून केईएम रुग्णालय आता रुग्णांना अधिक चांगली सेवा कशी देत ​​आहे, हे त्यांनी स्पष्ट केले.

दररोजच्या छोट्या बदलांनी टाळा मोठे आजार: मधुमेह, लठ्ठपणा आणि बीपीवर प्रभावी उपाय