भारतीय हवामान विभागाकडून रेमल चक्रीवादळाबाबत अलर्ट जारी करण्यात आला. हे वादळ काही तासांत भारताच्या पूर्व किनारपट्टीवर धडकणार असून आज (26 मे) आणि उद्या (२७) कोलकाता तसेच पश्चिम बंगालमधील इतर जिल्ह्यांमध्ये मुसळधार ते अति मुसळधार पावसाची शक्यता वर्तवण्यात आली आहे. त्यामुळे नागरिकांनी योग्य ती खबरदारी घेण्याचे आवाहन हवामान खात्याने केले आहे. या चक्रीवादळाचा महाराष्ट्रावर काय परिणाम होणार ते जाणून घ्या…
या भागात पावसाचा इशारा
बंगालच्या उपसागरावरील खोल दाब रविवारी संध्याकाळपर्यंत चक्री वादळात बदलू शकते आणि 26 मेच्या रात्री पश्चिम बंगाल आणि बांगलादेशच्या किनारपट्टीवर धडकू शकते. बंगालच्या उपसागरात निर्माण झालेले चक्रीवादळ ताशी 110-120 किलोमीटर वेगाने जमिनीवर धडकू शकते. तसेच ताशी 135 किलोमीटरचा वेग गाठू शकते. परिणामी हवामान विभागाने २६-२७ मे रोजी पश्चिम बंगाल आणि उत्तर ओडिशाच्या किनारी जिल्ह्यांमध्ये अतिवृष्टीचा इशारा दिला आहे. ईशान्य भारताच्या काही भागांमध्ये 27-28 मे रोजी अतिवृष्टी होऊ शकते, असं हवामान विभागाकडून सांगण्यात आले आहे.
[read_also content=”दिल्लीत बेबी केअर हॉस्पिटला आग, 7 नवजात बालकांचा मृत्यू https://www.navarashtra.com/india/delhi-breaking-news-in-marathi-7-babies-killed-as-massive-fire-breaks-out-at-children-hospital-538424.html”]
मच्छीमारांना बंदी
रेमल चक्रीवादळ येण्यापूर्वी समुद्रात 1.5 ते 2 मीटर उंच लाटा उसळण्याची शक्यता आहे, ज्यामुळे किनारपट्टीवरील पश्चिम बंगाल आणि बांगलादेशातील सखल भाग पाण्याखाली जाऊ शकतात. बंगालच्या उपसागराच्या उत्तरेकडील भागात 27 मेच्या सकाळपर्यंत मच्छीमारांनी समुद्रात जाऊ नये, असा इशारा हवामान खात्याने दिला आहे. हवामान विभागाने 26 आणि 27 मे रोजी पश्चिम बंगालच्या किनारी जिल्ह्यांसाठी (दक्षिण आणि उत्तर 24 परगणा) रेड अलर्ट जारी केला आहे. येथे काही ठिकाणी मुसळधार पावसाची शक्यता आहे.
महाराष्ट्रावर काय परिणाम?
रेमल चक्रीवादळामुळे पश्चिम बंगाल, उत्तर ओडिशा, मिझोराम, त्रिपुरा आणि दक्षिण मणिपूरमध्ये मुसळधार पावसाची शक्यता आहे. तर महाराष्ट्रावर या चक्रीवादळाचा कोणताही परिणाम होणार नसल्याची माहिती हवामान खात्याने दिली आहे.
‘या’ चक्रीवादळा नेमकं नाव कसं पडलं?
उष्णकटिबंधीय भागातून तयार होणाऱ्या वादळाच्या प्रकारात मोडत असलेलं हे चक्रीवादळ, सर्वात प्रथम ओमानमध्ये २०२४ च्या मान्सून हंगामापूर्वीच दाखल होणार आहे. त्यामुळं ओमान देशाच्या हवामानखात्याने या वादळाला एक नाव द्यायचं ठरवलं आणि ‘रेमल’ असं नाव त्यांनी या चक्रीवादळाला दिलं आहे. अरबी भाषेत ” या नावाचा अर्थ ‘वाळू’ असा होतो.
