पुढील दोन दिवस अनेक राज्यांना बसणार तीव्र उष्णतेच्या झळा, इशान्येत मुसळधार पाऊस आणि वादळाचा इशारा!

येत्या दोन दिवसांत भारताच्या पूर्वेकडील आणि द्वीपकल्पीय भागांना उष्णतेच्या लाटेचा सामना करावा लागेल, असा इशारा हवामान खात्याने दिला आहे.

गेल्या काही दिवसापासून देशात काही ठिकाणी सुर्य आग ओकताना दिसत आहे तर काही ठिकाणी अवेळी वरुणराजानं हजेरी लावलेली दिसत आहे. या अशा वातावरणाचा नागरिकांना मोठ फटका बसत असून आता येत्या दोन दिवसांत देशात तीव्र उष्णता आणि उष्णतेच्या लाटेचा इशारा (IMD Alert) देण्यात आला आहे. येत्या दोन दिवसांत भारताच्या पूर्वेकडील आणि द्वीपकल्पीय भागांना उष्णतेच्या लाटेचा सामना करावा लागेल, तर  9 एप्रिलपर्यंत ईशान्य भागात जोरदार पावसासह वादळाचा हवामान खात्यानं असा इशारा दिला आहे.

[read_also content=”जपान, तैवाननंतर आता अमेरिकेला भूकंपाचे धक्के, 5.5 रिश्टर स्केल तिव्रता; जिवीतहानी नाही! https://www.navarashtra.com/world/earthquake-hits-united-states-of-5-5-righter-scale-nrps-520896.html”]

भारतीय हवामान विभाग (IMD) ने सांगितले की, 9 एप्रिलपर्यंत ईशान्येकडील भागात जोरदार पाऊस आणि वादळ येऊ शकते. ओडिशा, गंगेच्या पश्चिम बंगाल, झारखंड, विदर्भ, उत्तर अंतर्गत कर्नाटक, किनारी आंध्र प्रदेश आणि यानम, रायलसीमा आणि तेलंगणा या भागात दोन दिवस उष्णतेची लाट राहण्याची शक्यता आहे.

‘या’ भागात पाऊस

तमिळनाडू, पुद्दुचेरी, केरळ, आसाम, मेघालय, नागालँड, मणिपूर, त्रिपुरा, अरुणाचल प्रदेश, ओडिशा आणि गंगेच्या पश्चिम बंगालच्या काही भागांमध्ये मोठ्या प्रमाणावर पावसाचा अंदाज वर्तवण्यात आला आहे, असे आयएमडीने म्हटले आहे. आयएमडीने म्हटले आहे की उत्तर कर्नाटक, रायलसीमा, किनारी आंध्र प्रदेश आणि यानामच्या वेगळ्या भागांमध्ये आधीच उष्णतेच्या लाटेची स्थिती आहे.

हवामान खात्याने सांगितले की, येत्या सात दिवसांत पश्चिम बंगाल आणि सिक्कीममध्ये तुरळक ते मुसळधार पाऊस आणि वादळ येण्याची शक्यता आहे. गारपिटीसह विजांचा कडकडाट होण्याची शक्यता असल्याने सतर्कतेचा इशारा देण्यात आला आहे.

यंदा तापमान अधिक असेल

यावेळी देशातील तापमान खूप वाढण्याची शक्यता आहे. आयएमडीने अलीकडेच अंदाज वर्तवला आहे की यावर्षी देशातील कमाल तापमान सामान्यपेक्षा जास्त असेल. एप्रिल महिन्याच्या सुरुवातीपासूनच देशातील अनेक भागात ४० ते ४२ अंश सेल्सिअस तापमानाची नोंद झाल्याने उष्माघाताचा धोका वाढला आहे. अति उष्मा आणि उष्माघाताचा लोकांच्या आरोग्यावर विपरीत परिणाम होऊ शकतो, असा इशारा हवामान खात्याने दिला आहे.