"काँग्रेसचा महिलाविरोधी चेहरा उघड!"; शिवसैनिक आक्रमक (Photo Credit- X)
नारी शक्ती वंदन अधिनियम घटना दुरुस्ती विधेयकाकडे सगळ्या जगाचे लक्ष लागले होते, मात्र ते नामंजूर झाले. काँग्रेस आणि इंडी आघाडीने पुतना मावशीचे प्रेम दाखवले. सुरुवातीला या विधेयकाला पाठिंबा आहे, असे सांगणारे विरोधक मतदानावेळी उलटे फिरले, अशी टीका आमदार डॉ. निलम गोऱ्हे यांनी केली. नारी शक्ती वंदन विधेयकाबाबत मतदार संघ पुनर्रचनेचा खोटा प्रचार विरोधकांनी केला. यामुळे काँग्रेसला महिलांची मते मागण्याचा अधिकार नाही, असे डॉ. गोऱ्हे यांनी ठणकावले.
ज्या प्रमाणे विधीमंडळात एखाद्या विधेयकाच्या मंजुरीसाठी मुख्यमंत्री देवेंद्र फडणवीस आणि शिवसेना मुख्य नेते व उपमुख्यमंत्री एकनाथ शिंदे हे रणनिती आखतात. तसेच लोकसभेत विधेयकाच्या मतदानापूर्वी शिवसेना संसदीय पक्षाचे नेते डॉ. श्रीकांत शिंदे यांना नियोजनासाठी सहभागी केले असते तर कदाचित ‘नारी शक्ती वंदन अधिनियम’ मंजूर झाले असते, असे डॉ. गोऱ्हे म्हणाल्या. काँग्रेस नेत्या सोनिया गांधी यांनीही कधी लोकसभेत इच्छाशक्ती दाखवून महिला आरक्षणाचे विधेयक मंजूर केले नाही, अशी टीका डॉ. गोऱ्हे यांनी केली.
काँग्रेस इतकी वर्ष सत्तेत होती, मात्र त्यांना महिलांना आरक्षण देता आले नाही. मागील ३० वर्ष काँग्रेसच्याच आडमुठेपणामुळे महिला आरक्षण विधेयक रखडले होते, अशी टीका आमदार ड़ॉ. कायंदे यांनी केली. गोरगरिब, दलित, आदिवासी महिला लोकसभेत, विधानसभेत जाऊ नये, यासाठी काल काँग्रेस पक्षाने नारी शक्ती वंदन अधिनियमविरोघात मतदान केले. यातून काँग्रेसचा महिला विरोधी खऱा चेहरा समोर आला, अशी टीका आमदार डॉ. कायंदे यांनी केली. यावेळी समाजवादी पक्षाचे नेते अखिलेश यादव, काँग्रेस नेते राहुल गांधी यांच्या प्रतिमेला जोडे मारुन उपस्थित महिलांनी आपला संताप व्यक्त केला.
