नवी दिल्ली : पर्यटक सफारी वाहनाच्या मागे लागलेल्या गेंड्याने तब्बल दीड किमीपर्यंत पाठलाग केल्याची थरारक घटना समोर आली. सोशल मीडियावर व्हायरल झालेल्या व्हिडिओतून हा भयंकर प्रकार समोर आला आहे.
गेंडा आपल्याकडे येताना पाहून पर्यटक जीवाच्या आकांताने ओरडत असल्याचे दिसत आहे. आपल्यामागे धावत येणारा गेंडा पाहून वाहनातील पर्यटकांची मात्र पाचावर धारण बसली होती. आसामच्या मानस नॅशनल पार्कमध्ये घडलेल्या प्रकाराचा व्हिडिओ कधी शूट करण्यात आला हे कळू शकलेले नाही.
राष्ट्रीय उद्यानातील बांसबारी जंगल परिसरात पर्यटक वाहनाने वेग वाढविल्यानंतर गेंड्याने त्याचा पाठलाग सोडून दिल्याचे व्हिडिओत दिसत आहे. अर्थात गेंड्याने पर्यटकांच्या वाहनाचा पाठलाग केल्याची किंवा जवळ येण्याची ही पहिलीच घटना नाही.
जागतिक वारसास्थळ ठरलेले नॅशनल पार्क
हिमालयाच्या पायथ्याशी असलेल्या मानस राष्ट्रीय उद्यानाला 1985 मध्ये युनेस्कोने जागतिक वारसा स्थळ म्हणून घोषित केले होते. भूतानच्या सीमेजवळ असलेल्या या राष्ट्रीय उद्यानात समृद्ध जैवविविधता आहे. सस्तन प्राणी, पक्षी, वाघ, सरपटणारे प्राणी आणि उभयचर प्राण्यांच्या विविध प्रजातींचा या जंगलात अधिवास आहे.
.png "Videos"){kind=small}
