संग्रहित फोटो
सोलापूर / नवराष्ट्र न्यूज नेटवर्क : पंढरपूर येथे हाेणाऱ्या माघवारीचा (Maghi Yatra Pandharpur) गुरूवारी मुख्य दिवस आहे. पंढरपूर शहरात वाहतूकीची कोंडी निर्माण होऊ नये, म्हणून शहरातील महत्वाच्या रस्त्यावर एकेरी वाहतूक, पार्कींग नियोजन करणे व शहरात प्रवेश करणाऱ्या वाहनांना काही ठिकाणी प्रवेश बंद करणे गरजेचे असल्याने वाहतूक व्यवस्थेत बदल करण्यात आला आहे. हे आदेश १६ फेब्रुवारीपर्यंत लागू राहणार आहेत.
तसेच जड वाहतूक पर्यायी मार्गाने करण्यात आली आहे. याचा अवलंब वाहनचालकांनी करावा, असे आवाहन जिल्हा पोलीस अधीक्षक तेजस्वी सातपुते यांनी केले आहे. कोणताही अनूचित प्रकार घडू नये व भाविकांच्या सुरक्षेसाठी ८० अधिकारी व १५०० पोलीस व होमगार्ड यांची नियुक्ती करण्यात आली आहे.
जारी केलेल्या आदेशात म्हटल्याप्रमाणे प्रवेश व्यवस्था खालीलप्रमाणे –
शहरात प्रवेश करणाऱ्या वाहनांबाबत
नगर, बार्शी, सोलापूर, मोहोळकडून येणारी वाहने अहिल्या चौक, शेटफळ चौकमार्गे मोहोळ रोड विसावा येथे पार्किंग करतील. तसेच ६५ एकर येथे फक्त दिंडी व पालखीचे वाहने पार्किंग करतील. पुणे, सातारा, वाखरीमार्गे येणारी वाहने इसबाबी विसावा येथे पार्किंग करतील. कंडरे जीमचे समोरील जागेत व कॉलेज क्रॉस चौकी येथील पाठीमागील मैदानात पार्किंग करतील.
कराड, आटपाडी, दिघंचीकडून येणारी वाहने कराड रोड वेअर हाउसमध्ये पार्किंग करतील. कोल्हापूर, सांगली, मिरज, सांगोलाकडून येणारी वाहने ही कासेगांव फाटा, टाकळी बायपास मार्गे वेअर हाउसमध्ये पार्किंग करतील. विजापूर, मंगळवेढामार्गे येणारी वाहने ही कासेगाव फाटा, टाकळी बायपास मार्गे वेअर हाउस आणि यमाई तुकाई मंदिर मैदान येथे पार्किंग करतील.
शहरातून बाहेर जाणाऱ्या वाहतूकीबाबत
टेंभूर्णी, अहमदनगर, सोलापूर, लातूर, बीड, उस्मानाबादकडे जाणाऱ्या सर्व गाड्या सावरकर चौक, नवीन कराड नाका, कॉलेज क्रॉस चौक, कौठाळी बायपास, नविन सोलापूर नाका या मार्गाने जातील. पुणे, साताराकडे जाणाऱ्या सर्व गाड्या सावरकर चौक, नविन कराड नाका, कॉलेज क्रॉस चौक, वाखरी मार्गे जातील. विजापूर, कराड, आटपाडी, कोल्हापूर, सांगली, मिरज, मंगळवेढाकडे जाणा-या सर्व गाडया सावरकर चौक, नवीन कराड नाका, टाकळी बायपास, गादेगाव फाटापासून संबंधीत आपल्या मार्गे जातील.
शहरातील अंतर्गत वाहतूकीबाबत
प्रदक्षिणा मार्ग सर्व प्रकारच्या वाहनास बंद करण्यात येत आहे. महाव्दार चौक ते शिवाजी चौक आणि सावरकर चौक ते शिवाजी चौक हा मार्ग सर्व प्रकारच्या वाहनांच्या वाहतुकीसाठी प्रवेश बंद करण्यात येत आहे. बार्शी, सोलापूर या मार्गावरून तीन रस्ता मार्गे येणारी हलकी वाहने फक्त अंबाबाई पंटागणात उतरतील. नियमित ट्रक व यात्रेसाठी सोडण्यात येणा-या एस. टी. बसेस यांना जुना दगडीपूल, नवीन पुल, तीन रस्ता मार्ग बंद ठेवण्यात येत आहे.
मंगळवेढा नाका, महात्मा फुले चौक, लहुजी वस्ताद चौक या मार्गाने शहरात सर्व प्रकारचे वाहनास प्रवेश बंद करण्यात येत आहे. अंबाबाई पटांगण ते भजनदास चौक, अंबाबाई पंटागण ते अर्बन बँक, शिवाजी चौक ते अर्बन बँक, संकुल कॉर्नर ते नगरपालिका हा मार्ग पासेसच्या वाहनाव्यतिरीक्त इतर सर्व वाहनास प्रवेश बंद करण्यात येत आहे.
पोलिसांचा मोठा फौजफाटा
माघी यात्रेत विठ्ठलाच्या दर्शनासाठी लाखो भाविक येतात. यात्रा कालावधीत कोणताही अनूचित प्रकार घडू नये व भाविकांच्या सुरक्षेसाठी ८० अधिकारी व १५०० पोलीस व होमगार्ड यांची नियुक्ती करण्यात आली आहे. यात्रा कालावधीत विविध पथकांमार्फत करडी नजर ठेवण्यात येणार असल्याची माहिती पोलिस निरीक्षक अरुण पवार यांनी दिली.
